1 CRÓNICAS 19 - Biblia Quichua Cañar 2010

Siriocunatapish amonitacunatapish mishashcamanta(2 Sam 10.1-19)

1Chai punzhacuna quipa amonitacunata jatun mandac Nahas huañucpica, paipac churimi paipac randi mandai callarirca.

2Chaipimi Davidca: «Nahaspac churi Hanuntaca paipac taita ñucata llaquishca shinallatacmi llaquina cani» nirca. Chaimantami Hanún paipac taita huañushcamanta llaquilla cacpi, cushichichun paita serviccunata cacharca. Davidta serviccuna Hanunta cushichingapac hamonitacunapac llactaman chayacpica,

3amonitacunata mandaccunaca Hanuntaca: «¿Canca David cambac taita huañushcamanta cushichichun cachashcatachu yuyangui? Ashtahuanpish, ¿manachu cai llactata ricushpa purichun, paipac serviccunataca cachashca canga?» nirca.

4Shina nicpimi, Hanunca Davidta serviccunata japishpa barbasta pitichishpa, churanacunatapish cinturamanta uraiman pitishpa cacharca.

5Chashna tucushcataca Davidpacman rishpami huillarcacuna. Chaimantami paicuna yallita pingaihuan cacpi paicunata tupachun cacharca. Davidca: «Jericó pueblopi barbas huiñangacaman saquirichic, quipataca shamunguichicllami» nichun cacharca.

6Amonitacunaca David paicunata mana ricunayachicushcata yachac chayashpami Hanunhuan, amonitacunahuan carretacunatapish, caballocunapi puric soldadocunatapish, alquilachun huaranga talento cullquita cushpa Mesopotamia, Siria, Maaca, Soba llactacunaman cacharca.

7Shina cachacpimi, quimsa chunga ishcai huaranga carretacunata, Maaca llactata jatun mandacta paipac soldadocunandi alquilarca. Paicuna shamushpami, Medeba pueblo chimba ladopi carpacunata shayachishpa tiyarirca. Amonitacunapish paicunapac pueblocunamanta tucui tandanacushpami macanacuiman shamurca.

8David chaita uyashpa Joabtami paipac sinchi soldadocunahuan cacharca.

9Amonitacuna llucshimushpaca, pueblo yaicunapimi macanacungapac allichirirca. Paicunahuan shamuc jatun mandaccunaca shuc lado pambapimi shuyacurca.

10Joabca ñaupa ladomanpish, huasha ladomanpish macanacungapac allichirishca shayacucpimi, Israel llactamanta ashtahuan sinchi soldadocunata acllashpa, siriocunahuan macanacungapac rirca.

11Cutin shuctac soldadocunataca amonitacunahuan macanacuchunmi paipac huauqui Abisai mandachun curca.

12Chashna cushpami paica: «Siriocuna ñucata atishpa, ashtahuan sinchi cacpica, can ayudangui. Cutin amonitacuna canta atishpa ashtahuan sinchi cacpica, ñucami canta ayudasha.

13Ñucanchic llactamantapish, ñucanchic Mandac Diospac pueblomantapish mana manchashpa sinchita macanacushunchic. Mandac Diosca pai munashca shina imatapish ruhuachun» nirca.

14Joabca paipac gentecunandi siriocunahuan macanacungapac chayacpica, paipac ñaupamantaca miticushpami callparcacuna.

15Siriocuna manchashpa callpacta ricushpaca amonitacunapish Joabpac huauqui Abisaipac ñaupamanta manchashpa callpashpami, shuc puebloman yaicurca. Chashna tucucpica, Joabca Jerusalenmanmi cutimurca.

16Siriocunaca israelcuna paicunata mishashcata yachashpami, huillaccunata Eufrates yacu chimba ladopi causac sirio soldadocunata mañachun cacharca. Chai soldadocunataca Hadad-ezerpac soldadocunata mandac Sofacmi mandacurca.

17Chaita Davidman huillacpimi, tucui israelcunata tandachishpa, Jordán yacuta pasashpa paicunapacman chayashpa paicunahuan macanacuchun mandarca. Chashna David mandacpimi, paicunaca siriocunahuan macanacurca.

18Ashtahuanpish siriocunaca israelcunapac ñaupamanta miticushpa callparcacunami. Chashna callpacpimi, Davidca canchis huaranga carretapi ric soldadocunata, chuscu chunga huaranga chaquillahuan ric soldadocunata shinallatac soldadocunata mandac Sofactapish huañuchirca.

19Hadad-ezerta ayudaccunaca israelcuna paicunata mishacta ricushpami, Davidhuan cushilla causangapac parlanacurca. Shinami Davidta servishpa causarca. Cutin siriocunaca amonitacunataca mana ashtahuan ayudanata munarcachu.