2 REYES 23 - Biblia Quichua Cañar 2010

1Chaimantami jatun mandac Josiasca Judá llactamanta, Jerusalén llactamanta pushac yuyaccunata paipacman tandachirca.

2Chai quipami jatun mandacca Judá llactapi tucui causaccunahuanpish, Jerusalenpi tucui causaccunahuanpish, curacunahuanpish, Dios ima nishcata huillaccunahuanpish, tucui gentecunahuan Mandac Diospac huasiman uchillamanta callarishpaca yuyaccunacaman rirca. Chaipimi libropi ima nicushcata rezashpa uyachirca. Dios ari nishpa quillcashca libropi tucui ima nicushcatami uyarcacuna. Chai librotaca Mandac Diospac huasipimi tarishca carca.

3Chai quipami jatun mandacca pilar ladopi shayarishpa Mandac Diosta catishun nishpa, Mandac Diospac ñaupapi ari nircacuna. Pai mandashcacunatapish, pai yachachishcacunatapish pactachishun pai rimashca shimicunatapish, Dios-huan ari nishcatapish, chai libropi quillcashcatapish tucui shunguhuan, tucui almahuan pactachishun nishpami ari ninacurca. Chashnami Dios ari nishcataca tucui gentecuna pactachishun nircacuna.

Josías allichishcamanta(2 Cr 34.3-7)

4Chaimantami jatun mandac Josiasca curacunata mandac Hilciastapish, quipa mandac curacunatapish, pungupi cuidaccunatapish Mandac Diospac huasimanta Baal, Asera huarmi dioscunaman, jahua pacha lucerocunaman ruhuashca imallacunata llucchichun mandarca. Chaicunataca Jerusalenmanta llucchishpami, Cedrón pambapi rupachirca. Chai uchupataca Bet-el pueblopimi shitachun cacharca.

5Paica Judá llactata mandaccuna yanga dioscunata mañashpa inciensota rupachichun churashca curacunatapish anchuchircami. Paicunataca Judapi tiyac pueblocunapi, Jerusalén muyundicunapi tiyac altarcunapi rupachichunmi churashca carca. Shinallatac Baal diosta, intita, quillata, zodíaco nishcata ricuchiccunata, jahua pachapi tiyac tucui lucerocunata mañashpa inciensota rupachiccunatapish anchuchircami.

6Shinallatac Asera huarmi diosta yuyarina yuratapish Mandac Diospac huasimanta llucchishpa aparishpami Jerusalenmanta canzhaman Cedrón pambapi rupachirca. Chai pambapi rupachishca, uchupataca chai pueblomanta gentecuna enterrashca jahuapimi shitarca.

7Shinallatac Mandac Diospac huasipi tiyac yanga dioscunata mañashpa, huainayana ucutapish urmachircami. Chai ucupimi huarmicunaca Asera diosman carpa huasicunata ahuashpa causaccuna carca.

8Judá llacta pueblocunapi causac tucui curacunatapish cayashpa tandachishpami, lomacunapi tiyac altarcunataca Geba pueblomanta callarishpa, Beerseba pueblocaman tucuchishpa saquirca. Chai altarcunapimi curacunaca inciensota rupachic carca. Shinallatac pueblota mandac Josué ruhuachishca pueblo yaicuna pungu lluqui ladopi tiyac altarcunatapish urmachircami.

9Lomacunapi tiyac altarcunapi servic curacunaca Jerusalenpi tiyac Mandac Diospac altarpica mana servircacunachu. Ashtahuanpish paicunapac huauquicunahuanmi levadura illac tandata micurca.

10Shinallatac Moloc diosman pipish paicunapac churicunata, ushicunata ama rupachichunmi Hinompac churipac pambapi tiyac Tofet altartapish tucuchishpa, saquirca.

11Judá llactata jatun mandaccuna intiman cushpa, Mandac Diospac huasi yaicuna pungu ladopi churashca caballocunatapish urmachircami. Chaicunaca michina pambacunata cuidac eunuco Natan-melec runa tiyacuc huasi ladopimi carca. Intiman cushca carretacunatapish rupachircami.

12Jatun mandac Josiasca Judá llactata jatun mandaccuna Acazpac huasi jahuapi ruhuashca altartapish, Mandac Diospac huasi ishcai pungu pambacunapi Manasés ruhuachishca altarcunatapish ñutuchishpami, Cedrón yacupi shitarca.

13Shinallatac Jerusalenmanta inti llucshina ladoman cac, Olivos urcu ura ladoman cac israelcunata jatun mandac Salomón ruhuashca altarcunatapish tucuchircami. Chai altarcunataca jatun mandac Salomonmi Sidón pueblopi causaccunapac Astoret millanayai diosman, Moab llactapi causaccunapac Quemos millanayai diosman, amonitacunapac Milcom millanayai diosman ruhuashca carca.

14Ruhuashcalla dioscunatapish, Asera diosta yuyarina yuratapish ñutuchishpami shitarca. Chai pushtucunapica gentecunapac tullucunatami jundachirca.

15Bet-el pueblopi tiyac altarcunatapish, israelcunata juchata ruhuachic Nabatpac churi Jeroboam lomapi ruhuachishca altarcunatapish tucuchircami. Chai altarcunatapish, lomapi tiyac altarcunatapish rupachishpami uchupata ruhuarca. Asera diostapish rupachircami.

16Josías cuticushpaca, huañushcacunata enterrashca jutcutami lomapi ricurca. Chai tullucunataca Mandac Dios paipac runaman huillachishca shinallatac, chai altarcunapi rupachishpa, chai altarcunata tucuchingapac tullucunata apachun cacharca.

17Chai quipami Josiasca:

—¿Chai rumica imatatac ricuchicun?— nirca.

Shina nicpimi, chai pueblopi causaccunaca:

—Chaica Judá llactamanta shamushca Diospac runata enterrashca jutcumi. Paimi Bet-el pueblopi tiyac altarta can chashna ruhuanataca huillarca— nircacuna.

18Shina nicpimi Josiasca:

—Saquilla, chai tullucunataca pipish ama cuyuchichun— nirca.

Chashnami chai runapac tullucunatapish, Samaria llactamanta shamushca Dios ima nishcata huillac runapac tullucunatapish mana pi tuparishpa, chaillapitac saquirca.

19Josiasca Samaria pueblocunapi tiyac lomacunapi israelcunata jatun mandaccuna ruhuashca diospac huasicunatapish Bet-el pueblopi ruhuashca shinallatacmi ruhuarca. Chai altarcunata ruhuashpami, Diosta yallita piñachircacuna.

20Shinallatac lomacunapi tiyac altarcunapi, cac curacunatapish chai altar jahuallapitac huañuchishpami tullucunatapish chaillapitac rupachirca. Chai quipami Josiasca Jerusalenman cutimurca.

Josías Pascua micuita ruhuashcamanta(2 Cr 35.1-19)

21Chai quipa jatun mandac Josías tucui gentecunata mandashpaca: «Ari ninacushpa cai libropi quillcashca shinallatac, cancunata Mandac Diosman Pascua jatun micui punzhata ruhuaichic» nirca.

22Juezcuna israelcunata mandacui punzhamanta pachami Pascua jatun micui punzhataca mana ruhuashca carcacuna. Israel llactata, Judá llactata jatun mandaccuna mandacui tucui huatacunapipish caitaca mana ruhuarcacunachu.

23Chai Pascua punzhataca jatun mandac Josías ña chunga pusac huatata mandacucpimi, Mandac Diosman Jerusalenpi ruhuarca.

Josías tucui shunguhuan Diosta servishcamanta

24Josiasca Mandac Diospac huasipi Hilcías cura tarishca libropi quillcashcata pactachingapacmi huañushcata mañaccunata, adivinocunata huasipi cac dioscunata, Judá llactapi, Jerusalenpi imapish mapacuna tiyashcataca tucui anchuchirca.

25Moisés mandashcacunapi nishca shina tucui shunguhuan, tucui almahuan, tucui fuerzahuan Mandac Diosman cutirishpa pai causashca shinaca ñaupa jatun mandaccunapish, paipac quipaman tiyac jatun mandaccunapish mana tiyarcachu.

26Josías chashna ruhuacpipish, Mandac Diosca Judá llactata jatun mandac Manasés yallita millaita ruhuashcamantaca Judá llactapi causaccunahuan nina japiric shina piñarishpami catirca.

27Chaimantami Mandac Diosca: «Israel llactapi causaccunata ñuca ñaupamanta anchuchishca shinallatacmi Judá llactapi causaccunatapish anchuchigrini. Shinallatac ñuca acllashca Jerusalén pueblotapish, ñuca: “Chaipimi ñuca shutita churasha” nishca huasitapish chingachigrinimi» nirca.

Josías huañushcamanta(2 Cr 35.20-27)

28Josiaspac shuctac ruhuashcacunapish, imacunallata ruhuashcacunapish Judá llactata jatun mandaccuna tucui imata ruhuashcacunata quillcashcapimi tiyacun.

29Jatun mandac Josías mandacui punzhacunami Egipto llactata jatun mandac Necaoca Asiria llactata jatun mandac-huan Eufrates jatun yacu ladoman rirca. Shina ricpimi, jatun mandac Josiasca paihuan tupangapac rirca. Ashtahuanpish Necaoca paita ricushcahuanmi Meguido pambapi huañuchirca.

30Chashna huañuchicpimi, paita serviccunaca Meguido pambamanta shuc carretapi Jerusalenman apashpa paita enterrana jutcullapitac enterrarca. Chai quipami Judá llactapi causaccunaca Josiaspac churi Joacazta paipac randi jatun mandac cachun aceitehuan cahuirca.

Joacaz Judá llactata mandashcamanta(2 Cr 36.1-4)

31Joacazca ishcai chunga quimsa huatata charishpami, mandai callarirca. Paica quimsa quillallatami Jerusalenpi mandarca. Paipac mamaca Libna pueblomanta Jeremiaspac ushi Hamutalmi carca.

32Joacazca paipac ñaupa taitacuna shinallatacmi Mandac Diospac ñaupapica mana allita ruhuashpa causarca.

33Paitaca Jerusalenpi ama ashtahuan mandashpa catichunmi Egipto llactata jatun mandac Necaoca Hamat llacta Ribla pueblopi prezu churarca. Chai quipami Judá llactapi causaccunataca patsac talento cullquita, shuc talento curita huatanta impuestota cuchun mandarca.

34Chashna ruhuashpami, Egipto llactata jatun mandac Necaoca Eliaquimta paipac taita Josiaspac randi jatun mandac cachun churarca. Eliaquimtaca Joacimtami shutichirca. Joacaztaca Egiptomanmi prezu aparca. Chaipimi paica huañurca.

35Joacimca cullquitapish, curitapish Faraonman curcami. Chaita cungapacca jatun mandac Egipto llactata jatun mandac Necao mandashca shinallatacmi Judá llactapi causaccunata tucui mashna allpata charishcamanta impuestota cuchun mandarca.

Joacim Judá llactata mandashcamanta(2 Cr 36.5-8)

36Joacimca ishcai chunga pichca huatata charishpami mandai callarirca. Paica chunga shuc huatatami Jerusalenpi mandarca. Paipac mamaca Ruma pueblomanta Pedaiaspac ushi Zebudami carca.

37Paica, paipac ñaupa taitacuna shinallatacmi Mandac Diospac ñaupapi mana allita ruhuarca.