FILIPENSES 3 - Biblia Quichua Cañar 2010

Cristo Jesus-huan cushi canamanta

1Cuyashca criccuna, ¡Apunchic Jesus-huan cashcamanta cushicuichic! Cancunaman mai alli cacpimi, ñucamanca chaillatatac, chaillatatac nishpa quillcanaca mana shaicuchin.

2Circuncisionta ruhuanami canguichic niccunamanta, allcu shina gentecunamanta, mana allita yachachiccunamanta huacaichiringuichic.

3Ashtahuanpish ñucanchicmi, Diospac Espíritu yuyaita cucpi Diosta shungumanta alli niccuna cashpa, Jesucristomanta cushicushpa, circuncisión ruhuashcatatac ricuchicunchic. Shina cashpami ñucanchicca aichapi imalla ruhuashcacunallapica mana shunguta churanchic.

4Aichapi imata ruhuashcallahuan alli cana cacpica, ñucacarin tucuita atishpami chashna ruhuanapi shunguta churaiman.

5Ñucaca hebreopuramanta huacharishca, Benjaminpac huahua huahua israelmi cani. Chaimantami ñucataca huacharishcamanta pusac punzhapi, ña circuncisionta ruhuachishcacuna. Shinallatac fariseo cashpami, Moisés mandashcacunataca alli pactachicurcani.

6Chaicunata cazuchisha nishpami, tandanacushca criccunataca piñashpa llaquichic carcani. Mandashcacunata alli pactachic cacpimi, pipish ñucataca imamanta mana juchanchic carcacuna.

7Ñaupamanca tucui chai ruhuashcacunaca mai allimi carca. Chashna cashpapish Cristo cuyashcamantami, tucui chaicunaca yangalla tucushca.

8Ñucata Mandac Jesucristomanta sumac yachana tucuita yalli alli cacpimi, ñucapac tucui imalla allicunatapish yangata ruhuashpa saquircani. Cristota cuyashpa paihuan cangapacmi, chai tucui yangallacunataca ima mapatalaya shitarcani.

9Cristohuan causana yuyailla cashpami, mandashcacunata pactachishpalla alli ricurinataca mana munani. Ashtahuanpish Cristota crishcallamantami, Diosca paihuan alli tucuchun ñucataca chasquirca.

10Cunanca tucuimanta yallica Cristota ricsishpami, pai causarishca quipa imatapish ruhuaclla cashcata ricusha nini. Shinallatac pai llaquita apashpa huañushca shinallatacmi, ñucapish llaquita apana cacpipish pai shina huañusha nini.

11Chashna ñuca huañushpapish, huañushcacunapuramantaca causarina yuyaillami cani.

Chayana cashcaman chayanamanta

12Ñucaca: «Cai tucui nishcata ña pactachishpa, allimi cani» ninatapish, shinallatac: «Ima pandatapish ña mana ruhuanichu» ninatapish, mana ni pudinichu. Ashtahuanpish Jesucristo acllashcamantaca, japina cashcata japingacaman ricunillami.

13Cuyashca criccuna, chayana cashcaman ña chayashcataca mana yuyanichu. Ashtahuanpish caillatami ruhuacuni: Utcaman ima shina cashcatapish cungarishpa, japina cashcata japingapacmi chutaricuc shina ricuni.

14Jesucristomanta Dios cusha nishca tucuimanta yalli alli cacpimi, chaita japingapac chayana yuyailla ricuni.

15Alli sinchi criccunaca chai shinallatacmi yuyana canchi. Ima shuctaclayata yuyacucpipish, Diosllatacmi cancuna alli yachachunca yuyaita cunga.

16Shina cashcamanta ña uyashcata alli yuyarishpa, ñucanchic caticushca shinallatac alli causashunchic.

17Cuyashca criccuna, ñuca causashca shinallatac cancunapish causaichic. Chashnallatac ñucanchic cancunaman yachachishcata catishpa causaccunata ricushpa, paicuna shina causaichic.

18Ña utcaman tauca cutin nishca shinallatacmi, cunanpish huacashpa nini: Cristo chacatashca huañushcataca, achcacunami yangata shina ruhuashpa causacuncuna.

19Chashna causaccunaca llaquipimi chingaringacuna. Diosta cuyanapac randica huicsatami yallita cuyancuna. Paicunapac sumac cashcaca pingaimi can. Shinallatac cai pacha causaipacllami ashtahuan munancuna.

20Ashtahuanpish ñucanchic causana llactaca jahua pachami. Chai jahua pachamanta Quishpichic Apunchic Jesucristo cutimunallatacmi shuyacunchic.

21Apunchic Jesucristo imatapish ruhuaclla cashcamantami, pai nicpica imapish ruhuarinlla. Chashna cashcamantami ñucanchic ismuclla aichatapish, paipac cuerpo shina sumacta ruhuanga.