LUCAS 3 - Biblia Quichua Cañar 2010

Bautizac Juan huillashcamanta(Mt 3.1-12; Mr 1.1-8; Jn 1.19-28)

1Jatun mandac Tiberioca chunga pichca huatatami Roma llactata mandacurca. Poncio Pilatoca Judea llactata, Herodesca Galilea llactata, paipac huauqui Felipeca Iturea llactatapish, Traconite llactatapishmi mandacurca. Cutin Lisaniasca Abilinia llactatami mandacurca.

2Anaspish, Caifaspish curacunata mandac curacunami carca. Chai punzhacunapimi Diosca Zacariaspac churi Juanman shitashca pambapi huillarca.

3Chaimantami Juanca tucui Jordán yacu cuchulla llactacunapi juchacunata Dios perdonac cashcamanta, juchayuc cashcamanta llaquirishpa, Diosman cutirishpa bautizarinamanta huillashpa purirca.

4Dios ima nishcata huillac Isaías huillashpaca:

«Shitashca pambapi

shuc caparishpaca:

“Mandac Dios shamuna ñanta allichichic.

Quingu ñancunatapish derechaichic.

5Huaicucunapish pamballami tucunga.

Urcucunatapish urmachishpa,

pamballami canga.

Huishtu ñancunapish derechashca,

ucu jahua ñancunapish

sumacta allichishcami canga.

6Tucui gentecunami

Dios quishpichicuctaca ricunga” ninmi» nirca.

7Achca gentecunami bautizarisha nishpa shamurca. Juanca paicunataca:

—¡Culebrapac huahuacuna! ¿Pitac Dios piñarishpa, cachashca llaquimanta quishpirinata huillarca?

8Grano allita pucucuc shina, Diosman cutirishca cashcataca ricuchichicyari. Ama cancunapac shungupi: “Abrahampac huahua huahuacuna cashcamantaca quishpirishunllami” nishpa yuyacuichicchu. Ñucaca ninmi: Dios cai rumicunatapish Abrahampac huahua huahuacunata ruhuanmanllami.

9Hachaca ñami yura chaquipi churashca. Chaimanta tucui mana pucuc yuracunataca pitishpami, ninapi shitanga— nirca.

10Chai gentecunaca Juantaca:

—Shinashpaca, ¿imatatac ruhuashun?— nishpa tapurca.

11Chashna nicpimi Juanca:

—Ishcai churanata charicca, shucta mana charicman cuchun. Micunata charicpish chai shinallatac mana charicman cuchun— nirca.

12Impuestota japiccuna bautizarisha nishpa shamushpaca:

—Yachachic, ¿imatatac ruhuashun?— nishpami tapurca.

13Chashna tapucpimi Juanca:

—Impuestotaca japina cashcallata cobraichic— nirca.

14Maijan soldadocuna tapushpaca:

—Ñucanchicca, ¿imatatac ruhuashun?— nirca.

Shina tapucpimi Juanca:

—Ama manchachishpa, cullquita cobraichicchu. Ama cullquita japingaraicu, pitapish manchachichicchu. Mashna cullquita japicushcallahuan cushilla caichic— nirca.

15Chai llactapi causaccunaca pi cashcata yachasha nishpami Juantaca: “¿Paichu Cristo canga?” nishpa yuyacurca.

16Chashna nicucpimi, Juanca chaipi caccunataca:

—Ñucaca yacullahuanmi bautizani, ashtahuanpish shucmi Diospac Espirituhuanpish, ninahuanpish bautizangapac shamunga. Paica ñucata atishpa, ashtahuan poderta charicmi. Ñucaca paipac ushuta huatashcallatapish mana pascaipacmi cani.

17Trillana pambapi granota chuyayachingapacmi huairachinata apashca shayacun. Granotaca huacaichinapimi huacaichinga. Tamotaca jaicapi mana huañuc ninapimi shitanga— nirca.

18Cai yuyachinacunahuan, shuctac rimaicunahuanmi alli huillaita huillarca.

19Chashnallatac Juanca mandac Herodestaca paipac huauqui Felipepac huarmi Herodias-huan causacushcamantapish, shuctac mana allicunata ruhuashcacunamantapishmi sinchita rimarca.

20Herodesca tucuilaya millaita ruhuashca jahuapish, Juantaca carcelpimi churarca.

Jesusta bautizashcamanta(Mt 3.13-17; Mr 1.9-11)

21Juanca manarac carcelpi churacpimi, tucui gentecunata bautizacurca. Chaimantami Jesustapish bautizarca. Jesús Diosta mañacucpimi, jahua pacha pascarirca.

22Chashnallatac Diospac Espiritumi paloma shina jahuamanta paipac jahuaman urai shamurca. Shinallatac jahua pachamanta rimashpaca: «Canmi ñuca cuyashca Churi cangui. Canllami ñucataca cushichingui» nirca.

Jesucristopac ñaupa taitacunapac shuticunami(Mt 1.1-17)

23Jesús huillanata callarishpaca, ña quimsa chunga huatayuc shinami carca. Gentecuna Jesustaca Josepac churi cashcatami yuyarca.

Joseca Elipac churimi carca.

24Elica Matatpac churi,

Matatca Levipac churi,

Levica Melquipac churi,

Melquica Janapac churi,

Janaca Josepac churimi carca.

25Joseca Matatiaspac churi,

Matatiasca Amospac churi,

Amosca Nahumpac churi,

Nahumca Eslipac churi,

Eslica Nagaipac churimi carca.

26Nagaica Maatpac churi,

Maatca Matatiaspac churi,

Matatiasca Semeipac churi,

Semeica Josepac churi,

Joseca Judapac churimi carca.

27Judaca Joananpac churi,

Joananca Resapac churi,

Resaca Zorobabelpac churi,

Zorobabelca Salatielpac churi,

Salatielca Neripac churimi carca.

28Nerica Melquipac churi,

Melquica Adipac churi,

Adica Cosampac churi,

Cosamca Elmodampac churi,

Elmodamca Erpac churimi carca.

29Erca Josuepac churi,

Josueca Eliezerpac churi,

Eliezerca Jorimpac churi,

Jorimca Matatpac churimi carca.

30Matatca Levipac churi,

Levica Simeonpac churi,

Simeonca Judapac churi,

Judaca Josepac churi,

Joseca Jonanpac churi,

Jonanca Eliaquimpac churimi carca.

31Eliaquimca Meleapac churi,

Meleaca Mainanpac churi,

Mainanca Matatapac churi,

Matataca Natanpac churimi carca.

32Natanca Davidpac churi,

Davidca Isaipac churi,

Isaica Obedpac churi,

Obedca Boozpac churi,

Boozca Salmonpac churi,

Salmonca Naasonpac churimi carca.

33Naasonca Aminadabpac churi,

Aminadabca Arampac churi,

Aramca Esrompac churi,

Esromca Farespac churi,

Faresca Judapac churimi carca.

34Judaca Jacobopac churi,

Jacoboca Isaacpac churi,

Isaacca Abrahampac churi,

Abrahamca Tarepac churi,

Tareca Nacorpac churimi carca.

35Nacorca Serugpac churi,

Serugca Ragaupac churi,

Ragauca Pelegpac churi,

Pelegca Heberpac churi,

Heberca Salapac churimi carca.

36Salaca Cainanpac churi,

Cainanca Arfaxadpac churi,

Arfaxadca Sempac churi,

Semca Noepac churi,

Noeca Lamecpac churimi carca.

37Lamecca Matusalenpac churi,

Matusalenca Enocpac churi,

Enocca Jaredpac churi,

Jaredca Mahalaleelpac churi,

Mahalaleelca Cainanpac churimi carca.

38Cainanca Enospac churi,

Enosca Setpac churi,

Setca Adanpac churi,

Adanca Diospac huahuami carca.