EZEQUIEL 37 - Biblia Quichua Cañar 2010

Chaquishca tullucunamanta

1Mandac Dios ñucata sinchiyachicpimi, paipac Espirituca tullucuna siricuc pambaman pusharca.

2Chaiman pushashpaca, tullucuna siricuc muyunditami caiman chaiman purichirca. Chaipica chaquishca achca tullucunami carca.

3Chaipi Mandac Dios ñucata tapushpaca:

—Huañunalla runa, ¿cai tullucunaca causaringachu?— nirca.

Shina nicpimi ñucaca:

—Mandac Dioslla, canllami yachangui— nircani.

4Chaimantami Mandac Diosca:

—Cai tullucunaman huillashpa: “¡Chaquishca tullucuna, Mandac Dios rimashcata uyaichic!

5Mandac Diosca: Ñucami cancunapica causaita cuc samaita churani. Chaimantami causaringuichic.

6Cancunapica angucunatapish, aichatapish churashpami jahuataca carahuan tapasha. Causaita cuc samaita churashpami, causaiyucta ruhuasha. Chaita ricushpami, ñucataca Mandac Dios cashcata yachanguichic” ninmi ningui— nirca.

7Ñucaca pai mandashca shinami chai tullucunamanca huillarcani. Chashna huillacucpimi, tulun nishpa, allpa chucchushca uyarirca. Chaipimi chai tullucunaca paicunapura tandanacurca.

8Chai tullucunataca angucunahuan, aichahuan, chai jahuataca carahuan tapashcatami ricurcani. Ashtahuanpish causaita cuc samaica manarac tiyarcachu.

9Chaimantami Mandac Diosca: «Huañunalla runa, causaita cuc samaiman huillashpa, Mandac Diosca: “¡Causaita cuc samai, cai pacha chuscu ladomanta shamushpa, cai huañushcacunapac jahuapi pucui! ¡Shina ruhuacpica, causaringallami!” ninmi ningui» nirca.

10Mandac Dios mandashca shinami huillarcani. Chaimantami causaita cuc samai paicunapi yaicucpi, causarishpa shayarirca. ¡Paicunaca soldadocuna shina yalli achcami carca!

11Mandac Dios cutinllatac rimashpaca: «Huañunalla runa, cai tullucunaca israelcunami. Paicunaca: “Ñucanchic tullucunaca chaquishcami. Ñucanchicca ima shuyanatapish mana charinchicchu. Tucuimi tucurishcanchic” nincunami.

12Chaimanta paicunaman huillashpaca, Mandac Diosca: Ñuca acllashcacunalla, cancunataca enterrashca jutcucunata pascashpa, llucchishpami Israel llactaman pushamusha.

13Ñuca acllashcacunalla, enterrashca jutcucunata pascashpa, cancunata llucchicpimi, ñucataca Mandac Dios cashcata yachanguichic. Chaitaca Mandac Dios ñucami nini.

14Ñuca cancunapi causaita cuc samaita churashpa, causachishpami, cancunapac llactallapitac samachisha. Shina ruhuacpimi, Mandac Dios ñuca nishcata pactachic cashcata yachanguichic» nirca.

Judá llactahuan,Israel llactahuan tandanacushcamanta

15Mandac Dios ñucata rimashpaca:

16«Huañunalla runa, cunanca shuc caspita japishpa, chaipica: “Judapacpish, paihuan apanacuc israelcunapacpishmi” nishpa quillcai. Quipaca shuc caspita japishpa chaipica: “Efrainpac, Josepac huahuacunapacpish, paicunahuan apanacuc israelcunapacpishmi” nishpa quillcai.

17Chai quipaca shuclla tucuchun, ishcai caspita tandachi. Cambac maquipica shucllami tucunga.

18Cambac llactapi causaccuna chaita ricushpaca: “Chashna ruhuashpaca, ¿imatatac nisha ningui? Chaitaca huillaiyari” nicpica canca:

19“Mandac Diosca: Ñucami Efrainpac maquipi cac Josepac huahuacunapac caspitapish, paicunahuan apanacuc israelcunapac caspitapish japishpa, Judapac huahuacunapac caspihuan tandachishpa shucllata ruhuasha. Shina ruhuacpimi, ñuca maquipica shuclla caspi tucunga” ninmi ningui.

20Can quillcashca caspicunata paicunapac ñaupapi cambac maquihuan japishpa:

21“Mandac Diosca: Shuctac llactaman rishca tucui israelcunatami tandachishpa, paicunapac llactallaman cutichimusha.

22Paicunata Israel llacta urcucunapi churashpa, shuclla llactata ruhuashpami, shuclla jatun mandacta churasha. Ashtahuanpish ña mana ishcai llactachu canga. Mana ishcai mandacchu tiyanga.

23Paicunaca ruhuashcalla dioscunata adorashpapish, millana juchacunata ruhuashpapish, tucuilaya juchacunata ruhuashpapish ña mana ashtahuan mapayangachu. Ashtahuanpish ñucata mana cazushpa, juchallishcataca pichashami. Tucuita pichashpami ñuca acllashcacunata ruhuasha. Ñucaca paicunapac Diosmi casha.

24Ñucata servic Davidmi paicunapac jatun mandac canga. Shuclla michicmi tiyanga. Paicunaca ñuca yachachishcacunatapish, mandashcacunatapish, rimashcacunatapish pactachishpami causanga.

25Ñucata servic Jacoboman cushca, ñaupa taitacuna causana llactapimi causanga. Chaipimi paicunapish, huahuacunapish, nietocunapish huiñaita causanga. Ñucata servic Davidmi huiñaita paicunapac jatun mandac canga.

26Huiñaita cushilla causangapacmi paicunahuanca ari ninacusha. Paicunata chaipi causachun churashpaca, achcatami mirachisha. Ñucapaclla huasitapish huiñaipacmi, paicunapac chaupipi shayachisha.

27Ñucapaclla carpa huasipish paicunapac chaupipimi canga. Ñucaca paicunapac Diosmi casha. Paicunaca ñuca acllashcacunami canga.

28Ñucapaclla huasitapish paicunapac chaupipimi huiñaipac shayachisha. Shina ruhuacpimi, shuctac llactacunaca israelcunata ñucapaclla cachun chicanyachishcata yachangacuna” ninmi ningui» nirca.