NÚMEROS 28 - Biblia Quichua Cañar 2010

Punzhanta Diosman tucuita rupachinamanta(Ex 29.38-46)

1Mandac Diosca Moisestaca:

2«Israelcunataca: “Ñucaman cuna ofrendataca chai cuna punzhapi, ñucaman mishquilla ashnachun rupachinguichic” ningui.

3Shinallatac: “Ñucaman cushpa punzhanta tucui rupachingapacca shuc huatayuc ima mana tucushca ishcai cari ovejata cunguichic.

4Chai ovejacunataca shuctaca tutamanta, shuctaca chishi ñucaman cunguichic.

5Grano ofrendataca ishcai kilo harinata olivosta tacashca shuc litro alli aceitehuan chapushpa cuichic” ninguichic.

6Chaitami Mandac Dios ñucaman mishquilla ashnachun punzhanta tucui rupachichun shitashca pambapi tiyac Sinaí urcupi mandashca carca.

7Shuc huatayuc cada cari ovejahuanca shuc litro vinota cunguichic. Chaitaca ñucapaclla cac ucupi Mandac Dios ñucapac ñaupapi tallinguichic.

8Cutin caishuc cari ovejataca chishita, tutamanta cushca shinallatac harinatapish, tallina vinotapish cunguichic. Chai cushcacunaca Mandac Dios ñucaman mishquilla ashnachun tucui rupachishcami canga.

Samana punzhapi ofrendata cunamanta

9Samana punzhapica shuc huatayuc ima mana tucushca ishcai cari ovejatapish, ishcai kilo alli harinahuan aceitehuan chapushcatapish, tallina vinotapish cunguichic.

10Punzhanta Diosman cushpa tucuita rupachishca jahua, tallina vinota cushca jahuami cada samana punzhapi tucui rupachina canguichic.

11Cada quilla callaripi ima mana tucushca ishcai becita, shuc cari ovejata, shuc huatayuc canchis cari ovejata tucui rupachinguichic.

12Cada becihuan sucta kilo chaupi harinata aceitehuan chapushpa cunguichic. Cada cari ovejahuan ishcai kilo alli harinata aceitehuan chapushpa cunguichic.

13Shuc huatayuc cada cari ovejahuan ishcai kilo alli harinata aceitehuan chapushpa cunguichic. Caicunami ñucaman mishquilla ashnachun tucui rupachishcaca.

14Cada becihuan ishcai litro vinota cunguichic. Shuc huatayuc cada ovejahuan shuc litro vinota cunguichic. Caicunami cada quillapi huatanta ñucaman cushpa, tucui rupachinaca.

15Shinallatac juchata pichachun Mandac Dios ñucaman shuc cari chivota cunguichic. Caitaca punzhanta ñucaman cushpa tucuita rupachishca jahua, tallina vinota cushca jahuami cuna canguichic.

Pascua punzhapi ofrendata cunamanta(Lv 23.1-44)

16Huata callari punta quilla chunga chuscu punzhaca Mandac Dios ñucapac Pascua punzhami canga.

17Cutin chunga pichca punzhaca jatun fiestami. Chai punzhacunapica canchis punzhatami levadura illac tandata micuna canguichic.

18Chai callari punzhaca ñucapaclla tandanacuita ruhuashpami, ima trabajotapish mana ruhuana canguichic.

19Mandac Dios ñucaman ishcai becita, shuc cari ovejata shinallatac shuc huatayuc ima mana tucushca canchis cari ovejata cunguichic.

20Shinallatac cada becihuan sucta kilo alli harinata aceitehuan chapushpa cunguichic. Cada cari ovejahuan chuscu kilo yalli alli harinata aceitehuan chapushpa cunguichic.

21Cada chai canchis cari ovejahuan ishcai kilo harinata aceitehuan chapushpa cunguichic.

22Shinallatac cancunapac juchata pichachun shuc cari chivota ñucaman cunguichic.

23Caicunataca punzhanta tutamanta lado ñucaman cushpa tucui rupachishca jahuami cuna canguichic.

24Chashna tucui canchis punzhacuna micunata tucui rupachicpimi, ñucamanca mishquilla ashnanga. Caicunataca punzhanta ñucaman cushpa tucui rupachishca jahua, tallina vinota cushca jahuami cuna canguichic.

25Canchisniqui punzhapica ñucapaclla tandanacuita ruhuanguichic. Chai punzhapica ama imata ruhuanguichicchu.

Pentecostés fiestamanta

26Pentecostés punzhapi, punta pucushca granota ñucaman cuna punzhapica, Diospaclla tandanacuita ruhuanguichic. Chai punzhapica ama imata ruhuanguichicchu.

27Mandac Dios ñucaman mishquilla ashnachunca, ishcai becita, shuc cari ovejata, shuc huatayuc canchis cari ovejata cunguichic.

28Cada becihuan cungapacca sucta kilo alli harinata aceitehuan chapushpa cunguichic. Cutin cada cari ovejahuan chuscu kilo alli harinata aceitehuan chapushpa cunguichic.

29Shuc huatayuc canchis cari ovejahuan ishcai kilo alli harinata aceitehuan chapushpa cunguichic.

30Cancunapac juchata pichachunca shuc cari chivota cunguichic.

31Caicunataca punzhanta ñucaman cushpa, tucui rupachishca jahua, harinahuan aceitehuan chapushpa cushca jahua, tallina vinota cushca jahuami cuna canguichic. Tucui chaicunaca ima mana tucushcami cuna canguichic.