1Dioslla, cashcata ruhuanata
jatun mandacman yachachiyari.
Paipac churimanpish
allita mandanata yachachiyari.
2Paimi can acllashcacunata
cashcata ricushpa mandanga.
Huacchacunamanpish allitami ruhuanga.
3Urcucunapish can acllashcacunamanca
sumacta cushilla causaitami cunga.
Lomacunaca cashcata ruhuanatami cunga.
4Gentecunapurapi llaquilla causaccunataca
allita ricushpami mandanga.
Huacchacunapac huahuacunata
quishpichishpami,
llaquichiccunataca sarunga.
5Intipish, quillapish tiyashcacamanmi
tucui huahua huahuacuna canta manchanga.
6Jatun mandacca pitishca quihuapi
sumacta tamyashca shinami canga.
Garua tamya allpata nuyuchic
shinami tucunga.
7Pai mandacuc punzhacunapi
cashcata ruhuanaca sisa shinami canga.
Quilla tucuringacamanmi
cushilla causaica tiyanga.
8Paica shuc lado mama cuchamantaca
caishuc ladocaman, jatun yacumantaca
cai pacha tucuricamanmi mandanga.
9Paipac ñaupapica shitashca pambacunapi
causaccunapish cunguringacunami.
Paita piñaccunaca allpatami lambingacuna.
10Tarsis llactata jatun mandaccunapish,
yacu patapi causac caishuc
jatun mandaccunapish,
paiman allicunata cungapacmi apamunga.
Sabá llacta, Seba llactata
jatun mandaccunapish
huatantami convidanacunata cungacuna.
11Tucui jatun mandaccunami
paipac ñaupapi cunguringa.
Tucui shuctac llactacunapi
causaccunami paita servinga.
12Paita mañac imata mana chariccunatapish
llaquimanta llucchingami.
Pi ayudacta mana charic
huacchacunatapish ayudangami.
13Imata mana chariccunatapish,
huacchacunatapish llaquishpami
paicunapac causaita quishpichinga.
14Paicunapac causaitaca llullamantapish,
llaquimantapish quishpichingami.
Paipac ñahuipica paicunapac yahuarca valicmi.
15Jatun mandacca causacungallami.
Sabá llactamanta curitami cungacuna.
Paimantaca Diosta mañacungallami.
Punzhantami paita bendicianga.
16Pambacunapipish,
jahua urcucunapipish grano tiyachun.
Chai muyupish Líbano urcu yuracuna shina
tucuchun.
Pueblopi causaccunapish
quihua sumacta sisac shina cachun.
17Jatun mandacpac shutica
huiñaitami causanga.
Inti tiyashcacaman paipac shutica
alli nishcami canga.
Paimantami tucui shuctac llactapi
causaccunaca bendiciashca canga.
Paicunaca yallita cushicushpami
alli ningacuna.
18¡Israelcunapac Mandac Dioslla,
alli nishca cachun!
Paillami sumaimanacunata ruhuacca.
19¡Paipac sumaimana shutica
huiñaita alli nishca cachun!
Paipac sumaimana achicca
tucui cai pachapi jundashca cachun.
Chashna cachun, chashna cachun.
20Isaipac churi David mañashcaca
caipimi tucurin.
Who We AreWhat We EelieveWhat We Do
2025 by iamachristian.org,Inc All rights reserved.
