1Samuel huambraca Elí curapac ñaupapimi Mandac Diospacta ruhuashpa causarca. Chai punzhacunapica Mandac Diospac rimashca shimica maijan cutinllami uyarirca. Shinallatac maijan cutinllami muscuipi shina ricuric carca.
2Shuc punzhami Elí curaca paipac ñahui mana alli ricui pudicpi pai sueñuna ucupi sueñucurca.
3Samuelca Mandac Diospac huasipimi sueñucurca. Diospac Arcapish chai huasipimi carca. Chai huasi ucupi rupacuc Diospac lamparapish manarac huañucpimi,
4Mandac Diosca Samuelta cayarca. Shina cayacpimi Samuelca:
—Caipimi cani— nirca.
5Shina nishpa, Elipacman callpashpa rishpaca:
—Caipimi cani. ¿Imapactac cayangui?— nirca.
Shina nicpimi Elica:
—Ñucaca mana cayarcanichu. Sueñungapac rilla— nirca.
Shina nicpimi, Samuelca cutin sueñugrirca.
6Mandac Diosca cutinllatac Samuelta cayashpaca:
—¡Samuel!— nirca.
Shina cayacpi Samuel jatarishpa Elipacman rishpaca:
—Caipimi cani. ¿Imapactac cayangui?— nirca.
Shina nicpimi Elica:
—Ñuca huahualla, ñucaca mana cayarcanichu. Sueñungapac rilla— nirca.
7Samuelca Mandac Diostaca manarac ricsircachu. Shinallatac Mandac Diospac shimitapish manarac uyarcachu.
8Mandac Diosca caihuanca ñami quimsa cutin cayarca. Samuelca Elipacman shamushpami:
—Caipimi cani. ¿Imapactac cayarcangui?— nirca.
Chaipimi, Elica Samuelta Mandac Dios cayacucta entendirca.
9Chaimantami Elica Samueltaca:
—Cutin sueñungapac rilla. Cutin cayacpica: “Mandac Dioslla, canta servic ñucaca uyacunimi, rimailla” ningui— nirca.
Shina nicpi, Samuelca maipi sueñucushcallamantac rishpa sueñugrirca.
10Mandac Dios shamushpami puntaman shinallatac:
—¡Samuel, Samuel!— nishpa cayarca.
Shina cayacpimi Samuelca:
—Canta servic ñucaca uyacunimi, rimailla— nirca.
11Shina nicpimi, Mandac Dios Samueltaca:
—Riqui, cai israelpurapica jatun mancharinatami ruhuagrini. Chashna ruhuashcata maijan uyashpaca ishcai ringritami nanachinga.
12Chai punzhapimi Elí curata llaquichishpa, paipac huasi ucupurata llaquichisha nishcataca callarimanta tucuricaman pactachisha.
13Paipac churicuna mana allita ruhuacpi, pai mana rimashcamantami paipac huasi ucupurataca huiñaita llaquichisha. Chaitaca paica yachanmi.
14Chaimantami Elipac huasi ucupuracuna mana allita ruhuashcataca animalta ñucaman cushpa rupachicpipish, ofrendata cucpipish, manatac perdonashachu nishpa ari nircani— nirca.
15Samuelca cayandi tutamantacamanmi sueñucurca. Ña jatarishpaca, Mandac Diospac huasi pungucunatami pascarca. Shina cashpapish muscuipi ricushcata Eliman parlanataca mancharcami.
16Chashna cacpimi, Elí Samuelta cayashpaca:
—Ñuca huahua Samuel-lla— nirca.
Shina nicpimi Samuelca:
—Caipimi cani— nirca.
17Shina nicpimi Elica:
—¿Diosca imatatac canman huillarca? Pai ima nishcataca mana pacashpa huillai. Canman tucui ima parlashcata pacashpa mana huillacpica, Diosllatac cantaca yallita llaquichichun— nirca.
18Shina nicpimi, Samuel imatapish mana pacashpa tucui huillarca. Chaita uyashpami Elica:
—¡Paica Mandac Diosmi! Paiman ima alli cacpica, chashnallatac ruhuachunlla— nirca.
19Samuelca huiñarcami, Mandac Diospish paihuanmi carca. Chaimantami Dios rimashca shimicunata tucui pactachirca.
20Tucui israelcunami Dan pueblopi causaccunamanta callarishpa Beerseba pueblopi causaccunacaman Samueltaca Mandac Dios ima nishcata huillashpa alli pactachic cacta yacharca.
21Mandac Diosca cutinllatacmi, Silo pueblopi ricurirca. Mandac Diosca Silo pueblopimi Samuelman paipac rimashca shimitaca huillac carca.
Who We AreWhat We EelieveWhat We Do
2025 by iamachristian.org,Inc All rights reserved.
