PROVERBIOS 7 - Biblia Quichua Cañar 2010

Cullquimanta huainayac huarmimanta

1Ñuca huahualla, ñuca yuyaita

cushpa rimashcacunata cazushpa causangui.

Ñuca mandashcacunataca valishcata shina

yuyaipi charingui.

2Ñuca mandashcacunata

cazushpa causashpaca causanguimi.

Ñuca yachachishcataca cambac ñahui

santa luzta shina cuidangui.

3Chai yachachishcataca

maqui dedopi huatashca shina,

tablapi quillcashca shina

shungupi charingui.

4Alli yachaitaca:

“Canca ñuca panimi cangui” niyari.

Alli yuyaitaca:

“Ñuca familiami cangui” niyari.

5Chai alli yachachishcacunaca

shucpac huarmimanta,

mana ricsishca huarmi mishquillata rimashpa

inquitanamantapish cuidangami.

6Ñuca huasi ventanamantami

yuyai illac tauca mosocunata ricurcani.

7Chai yuyai illac mosocunapurapimi

shuctac yallita yuyai illac

mosota ricurcani.

8Chai mosoca plaza esquina

cuchuta rishpami chai huarmipac

huasiman chayarca.

9Paica ña chishi amsayagricucpimi,

tuta rirca.

10Chai huarmica cullquimanta huainayac

huarmi shina churanata churarishcami,

inquitana yuyaihuan tupangapac llucshirca.

11Chai huarmica piñanacuipi churac,

mana pingac huarmimi.

Huasipica mana tiyarinchu.

12Inquitangapacmi, maijan cutinca

ñancunapi, plaza esquinacunapi shuyacun.

13Chai huarmica chai mosota

japishpami mucharca.

Shinallatac imata mana pingashpami:

14“Dios-huan alli tucungapacmi animalta

huañuchishpa cusha nishcataca

cunan pactachircani.

15Chaimantami canta

tupangapac llucshimurcani.

Cambac ñahuita ricunayachishpami,

utca mashcac shamushpa,

cunanca tupani.

16Ñuca camataca Egiptomanta apamushca

lino catahuanmi sumacta allichimurcani.

17Mishquilla ashnacuc mirrahuan,

aloehuan shinallatac

canelahuanmi mishquillata ruhuarcani

18Shamuilla, pacaringacaman

cuyanacushun.

Yallita cuyanacushpa

cushicungapac shamui.

19Ñuca cusaca mana huasipichu,

caru llactamanmi rirca.

20Mochila cullquita apashpami rirca.

Quilla tucucpimi,

huasimanca shamunga” nirca.

21Mishquilla rimaicunahuanmi

ari nichirca.

Sumac shimicunahuanmi inquitarca.

22Paica ari nishcahuanmi catishpa rirca.

Huagra huañungapac ric shina,

yuyai illac runa prezu japi tucushpa,

llaqui tucungapac ric shinami rircalla.

23Shinallatac paipac huicsata

flecha pasangacaman shina,

urpi linchipi japi tucungacaman

ric shinami rirca.

24Cunanca huahuacuna uyaichic.

Ñuca yuyaita cushpa rimashcacunataca

alli entendichi.

25Chai huarmi purina ñantaca,

ama purinata yuyanguichu.

Chai ñanta rishpa

ama pandaringuichu.

26Paica taucacunatami pandachishpa

huañuchishca.

Chai huarmica mana yupaipactami

huañuchishca.

27Chai huarmipac huasica

Seolman apac ñanmi.

Chai ñanca huañushcacunapacman

chayachicmi.