2 CRÓNICAS 15 - Biblia Quichua Cañar 2010

Jatun mandac Asa imacunata mushucyachishcamanta(1 R 15.13-15)

1Obedpac churi Azariaspacmanmi Mandac Diospac Espirituca shamurca.

2Shina shamucpi, Asahuan tupangapac llucshishpaca: «Canpish, Judá llacta, Benjamín llacta tucui soldadocunapish uyaichic. Cancuna Mandac Dios-huan cacpica, paipish cancunahuanmi canga. Cancuna paita mashcashpaca taringuichicmi. Ashtahuanpish cancuna paita saquicpica, paipish cancunata saquingami.

3Israelcunaca unaitami causac Dios illac, yachachic curacuna illac, Dios mandashcacunapish illac causarcacuna.

4Ashtahuanpish paicunaca jatun llaquipi cashpami, israelcunata Mandac Diospacman cutirishpa, paita mashcarcacuna. Shina mashcashpami paitaca tarircacuna.

5Chai huatacunapica pipish mana sumacta causai pudircachu. Ashtahuanpish tucui llactapi causaccunami huasipi cashpapish, ñanpi cashpapish llaquita charircacuna.

6Shuctac llacta gentecunaca chaishuc llacta gentecunatami huañuchirca. Shuc pueblopi causaccunaca chaishuc pueblopi causaccunatami huañuchirca. Tucuilaya llaquicunata Mandac Diosllatac cachacpimi, chashna tucurca.

7Ashtahuanpish cancunaca alli sinchi caichic. Cancuna Diosta servishpa, imata ruhuashcamantaca japina tiyanmi» nirca.

8Obedpac churi Azarías Dios ima nishcata huillashcata Asa uyashpaca, ashtahuan sinchi tucushpami, millana yanga dioscunata tucui Judá llactamanta, Benjamín llactamanta anchuchirca. Shinallatac Efraín urcucunapi tiyac pai quichushca pueblocunamantapish chingachircami. Shina ruhuashpami Mandac Diospac pungu ñaupapi tiyac Diospac altartapish allichirca.

9Chai quipaca Judá llactapi, Benjamín llactapi tucui causaccunatapish, Efraín, Manasés, Simeón llactacunamanta shamushpa Judá llactapi paicunahuan causaccunatapish tandachircami. Paita Mandac Dios paihuan cacta ricushpami, achca israelcuna Asahuan tandanacungapac pasamurcacuna.

10Asa chunga pichca huata, quimsa quillata Judá llactata mandacucpimi Jerusalenpi tandanacurcacuna.

11Chai punzhami macanacuimanta quichumushca canchis patsac huagracunata, canchis huaranga ovejacunata Mandac Diosman cushpa huañuchirca.

12Shina ruhuashpami, shuc yuyailla tucushpa paicunapac ñaupa taitacunata Mandac Diosta tucui almahuan, tucui shunguhuan mashcangapac ari nircacuna.

13Israelcunata Mandac Diosta mashcanata mana munaccunataca yuyac cachun, huahua cachun, cari cachun, huarmi cachun huañunami can nircacuna.

14Sinchita shuc shinalla caparishpami trompetacunapi, bocinacunapi tocashpa Mandac Dios-huan ari nircacuna.

15Chashna tucui shunguhuan, tucui munaihuan ari nishpa Diosta mashcashcamantami Judá llactapi causaccunaca cushicurca. Tucui paicuna mashcashcamantaca Mandac Diosca chasquircami. Paicunapac tucui llactacunapica sumac causaimi tiyarca.

16Jatun mandac Asaca paipac mama Maacatapish Asera huarmi diosta ruhuashcamantami jatun mandac canamantaca anchuchirca. Chai diostaca paquishpa ñutuchishpami, Cedrón yacu patapi rupachirca.

17Tucuita chashna ruhuashpapish, paipac tucui causaipi Diosta tucui shunguhuan cazushpa causashpapish, Israel llacta lomacunapi cac altartaca mana anchuchircachu.

18Paica cullquitapish, curitapish, ima charishcacunatapish paipish, paipac taitapish Diospaclla cachun chicanyachishcataca Mandac Diospac huasimanmi aparca.

19Asa quimsa chunga pichca huatata mandangacamanca jatun macanacuica mana tiyarcachu.