MARCOS 12 - Biblia Quichua Cañar 2010

Jesús millaita ruhuaccunamantachimbapurashpa parlashcamanta(Mt 21.33-46; Lc 20.9-19)

1Jesús chimbapurashca parlocunahuan yachachishpaca: «Shuc runami uvas chagrata tarpushpa, muyundita pircarca. Chai chagrallapitacmi uvasta cutanatapish, chagrata cuidana torretapish ruhuarca. Chai quipaca shuc trabajac runamanmi partir cushpa caru llactaman rirca.

2Uvas pallana punzha chayamucpica, chai allpayuc runaca shuc servictami pai japina cashcata chaupimuchun cacharca.

3Ashtahuanpish chagrahuan saquiric runacunaca chai servicta japishpa, macashpami, imatapish mana cushpa cacharca.

4Cutinllatacmi chai allpayuc runaca shuc servicta cacharca. Paitapish rumicunahuan umata paquishpa, camishpami cacharca.

5Cutinllatacmi chai allpayuc runaca shuc servicta cacharca. Paitaca huañuchircami. Chashna huañuchicpica, allpayucca cutin tauca runacunatami cacharca. Paicunatapish maijantaca macarcami, maijantaca huañuchircami.

6Quipaca paipac cuyashca shuclla churillami saquirirca. Chaimantami “Ñuca churitaca manchashpa, manapishchari imata ningacuna” nishpami cacharca.

7Chai runacuna churi shamucta ricushpacarin: “Paimi taita charishcacunataca tucui japinga. Chaimanta pai japinata ñucanchic japingapac huañuchishunchic” ninacurca.

8Chaimantami chai churita japishpa huañuchirca. Chaimantaca uvas chagramanta llucchishpami shitarca.

9Chaimantaca chai allpayuc runaca, ¿imatashi ruhuanga? Pai shamushpaca, chai runacunata huañuchishpami, chai chagrata shuccunaman cunga.

10Dios quillcachishcapi cashna nishcataca, ¿manachu ricushcanguichic? Chaipica:

“Huasita ruhuaccuna

mana nishca rumillatacmi,

callari esquinapi

churana rumi tucushca.

11Mandac Diosmi

chashna ruhuashca.

Chaita ricushpami

yallita cushicunchic” ninmi» nirca.

12Fariseocunaca chimbapurashca parlocunahuan Jesús parlashpaca, paicunata rimacushcata yachashpami, prezu japinata munarca. Shina yuyacushpapish gentecunata manchashcamantami, mana imata ruhuashpa rircalla.

Impuestomanta tapushcamanta(Mt 22.15-22; Lc 20.20-26)

13Chai quipami maijan fariseocunatapish, Herodespac maijan runacunatapish Jesusta tapushpa pandachichun cacharca.

14Chai runacuna Jesuspacman chayashpaca:

—Yachachic, canca imatapish cashcallatami yachachingui. Dios munashca shina, alli causachunmi alli yachachingui. Canca pitapish mana manchashpa, mana piman tucushpami yachachingui. Mandashcapi nishca shinaca, ¿jatun mandac Cesarman impuestota paganachu canga? Mana cashpaca, ¿manachu pagana canga? ¿Pagashunchu, manachu pagashun?— nircacuna.

15Jesusca, paicuna nic tucushpalla tapushcata yachashpami:

—¿Ima nishpatac ñucata pandachisha ninguichic? Shuc cullquita ricuchingapac apamuichic— nirca.

16Cullquita apamucpimi Jesusca:

—Cai cullquipica, ¿pipac shutitac, pipac ñahuitac tiyacun?— nicpimi paicunaca:

—Jatun mandac Cesarpacmi— nirca.

17Shina nicpimi Jesusca:

—Shinashpaca jatun mandac Cesarpac cashcataca, jatun mandac Cesarllamantac cuichic. Diospac cashcataca Diosllamantac cuichic— nirca.

Chaimantami paicunaca yallita mancharirca.

Causarinamanta tapushcamanta(Mt 22.23-33; Lc 20.27-40)

18Chai quipami, huañushcacuna causarinata mana cric saduceocuna shamushpa Jesustaca:

19—Yachachic, Moisés mandashpaca: “Shuc runa manarac huahuata charishpa huañucpica, paipac huauquillatacmi chai viudahuan cazarashpa, huauquipac randi huahuata charichun” ninmi.

20Chaica canchis huauquicunami causarca. Chai canchis huauquicunamantaca punta huauquimi cazarashpa, manarac huahuata charishpa huañurca.

21Chaimantaca quipa huauquimi chai viudahuan cazarashpa, manarac huahuata charishpa huañurca. Cutin quipa huauquipish shinallatacmi tucurca.

22Chashnami chai canchis huauquicuna chai viudahuan cazarashpa, manarac huahuata charishpa huañurca. Chai quipaca, chai viudapish huañurcami.

23Chai huarmi chai canchis huauquicunahuan cazarashca cashcamantaca, huañushcacuna causarina punzhapi, pai causarishpaca, ¿maijanpac huarmitac canga?— nirca.

24Chaimantami Jesusca:

—Cancunaca Dios quillcachishca imata nishcatapish, Diospac podertapish mana yachashpami, yallita pandaricunguichic.

25Huañushcacuna causarina punzhapica mana cazarangacunachu. Mana cazarachingachu. Paicunaca jahua pachapi causac angelcuna shinami canga.

26Zarza yura rupacuc chaupimanta Dios rimashcata Moisés quillcashcataca, ¿manachu ricushcanguichic? Dios huañushcacuna causarinamanta chai yura chaupimanta rimashpaca: “Ñucaca Abrahampac, Isaacpac, Jacobopac Diosmi cani” nishcami.

27¡Diosca mana huañushcacunapac Dioschu, ashtahuanpish causaccunapac Diosmi! Shinashpaca, cancunaca yallitami pandaricunguichic— nirca.

Mandashcacunamanta tapushcamanta(Mt 22.34-40)

28Mandashcacunata yachachiccunapuramanta shuc runaca, Jesús imata tapucpipish allita cutichic cashcatami yacharca. Chaimantami Jesuspacman cuchuyashpaca:

—Mandashcacunamantaca, ¿maijantac ashtahuan yalli alli?— nirca.

29Chashna tapucpimi Jesusca:

—Tucui mandashcacunamanta ashtahuan yallica caimi: “Uyaichic israelcuna, ñucanchic Diosca Mandac Diosmi. Paica shucllami.

30Chaimanta Mandac Diosta tucui shunguhuan, tucui almahuan, tucui yuyaihuan, tucui munaihuan cuyangui” ninmi.

31Shuctac mandashcapish chai shinallatacmi. Chaica: “Can ima shinami cuyaringui, chai shinallatac shuccunatapish cuyangui” ninmi. Cai mandashcacunamanta ashtahuan yalli allica mana tiyanchu— nirca.

32Chashna nicpica, chai mandashcacunata yachachicca:

—Yachachic, canca mana llullashpa allitami nishcangui. Shuclla Diosmi tiyan, shucca mana tiyanchu.

33Diosta tucui shunguhuan, tucui yuyaihuan, tucui almahuan, tucui munaihuan cuyanaca allimi. Chashnallatac quiquin cuyaric shinallatac shuccunatapish cuyanaca allimi. Cai ishcai mandashcacunata pactachinami, rupachina ofrendatapish ashtahuan yalli allica— nirca.

34Jesús mandashcacunata yachachic alli yuyaihuan cutichishcata uyashpaca:

—Canca Dios mandacucmantaca mana carupichu cangui— nirca.

Quipaca pingaihuan pipish imata mana ashtahuan tapurcachu.

Cristoca mandac Davidtapish Mandac cashcamanta(Mt 22.41-46; Lc 20.41-44)

35Diosta mañana huasipi Jesús yachachicushpaca: «Mandashcacunata yachachiccunaca, ¿ima nishpatac Cristotaca: “Mandac Davidpac aillupurami canga” nincuna?

36Davidllatacmi Diospac Espíritu yuyaita cucpica:

“Mandac Diosca

ñucata Mandactaca:

‘Canta piñaccunata

cambac chaqui sarunapi

ñuca churangacaman,

canca ñuca alli maquiman

tiyacuilla’ nin” nishcami.

37Davidllatac paitaca: “Ñucata Mandac” nicpica, ¿ima shinatac Cristoca Davidpac aillupuralla cangayari?» nirca.

Chai yachachishcataca achca gentecunami cushilla sumacta uyarca.

Jesús mandashcacunata yachachiccunata rimashcamanta(Mt 23.1-36; Lc 11.37-54; 20.45-47)

38Gentecunata Jesús yachachicushpaca: «Mandashcacunata yachachiccunamanta cuidaringuichic. Paicunaca pambacaman suni churanata churarinatami munan. Shinallatac plazacunapi alabaduchunmi munan.

39Paicunaca tandanacuna huasicunapipish, jatun micuicunapipish punta tiyarinata mashcashpami, tiyarinata munan.

40Viudacunapac huasicunatapish quichuccunami. Chashna ruhuashpaca, alli ricurishun yuyashpami, Diosta unaita mañac tucuncuna. Chashna ruhuashcamantaca, paicunallatacmi ashtahuan llaquita apangacuna» nirca.

Viuda huarmi ofrendata cushcamanta(Lc 21.1-4)

41Jesusca Diosta mañana huasi ucupi cashpaca, ofrendata churana chimbapurapimi tiyacurca. Gentecuna ima shina cullquita churactami ricucurca. Chaipica chayuccunami achca cullquita churarca.

42Cutin shuc huaccha viuda shamushpaca, ishcai ashalla valic cullquitami churarca.

43Chaimantami Jesusca paipac yachacuccunata cayashpaca:

—Cai huaccha viudami, caishuccunamanta yalli ofrendata cushca. Chaica chashnatacmi.

44Tucuimi puchushcallata cushca, ashtahuanpish cai huarmica paipac causaipac tucui charishcatami cushca— nirca.