1Davidca tucui paita piñaccunapac maquimanta, Saulpac maquimanta quishpichishca punzhami Mandac Diosta alli nishpa,
2cantashpaca:
«Mandac Diosca
ñucapac rumi shinami,
ñucaman fuerzata cucpish,
quishpichicpish canmi.
3Ñuca jarcarina rumi shinami.
Ñuca jarcarina escudomi.
Jatun poderhuan quishpichicmi.
Tucuimanta yalli jahuaman cac,
ñuca miticunami.
Llaquichiccunamantami
quishpichircangui.
4Mandac Diostami mañasha.
Paitaca alli ninatacmi cani.
Ñucata piñaccunapac maquimantaca
quishpichishcami casha.
5Huañuica yacu jatarishpa
muyuc shinami shamurca.
Millaicunapish yacu jundashpa,
shamuc shinami manchachirca.
6Seolca huatashca shinami
charicurca.
Ñuca jahuapica huañuchic
tucllatami shitarca.
7Llaquilla cashpami,
Mandac Diosta mañarcani.
Ñuca Diostami caparircani.
Ñuca caparishcataca
paipac huasimanta uyarca.
Ñuca caparishcaca
paipac ringrimantacmi uyarirca.
8Allpaca cuyurishpami chucchurca.
Jahua pachata charicuc
callari rumicunapish cuyurircami.
Dios piñaricpimi, chashna cuyurirca.
9Paipac singamantaca,
cushnimi llucshirca.
Paipac shimimantaca,
tucuchic ninami llucshirca.
Paimantaca jagan nicuc
carboncunami saltacurca.
10Jahua pachaca,
cumurishpami urai shamurca.
Paipac chaqui ucupica,
amsami carca.
11Shuc querubín nishcapi
montashpami,
jahua huairata ricurca.
Huairapac alascunapimi ricurca.
12Paita llanduchunca pura puyutami
muyundita churarca.
Tamyanalla tisaricuc
amsa puyutami churarca.
13Pai achicyachishpa ricuricpimi,
jagan nicuc carboncunapish
japirirca.
14Mandac Diosca, jahua pachamantami
pai rimashcataca,
tulun nishpa uyachin.
15Paipac flechacunata
shitashpami shic-huashpa cacharca.
Relampa jaguin nishpami
tucuita callpachirca.
16Mandac Dios sinchita rimaricpi,
singamanta sinchita pucucpimi,
mama cucha ucu allpapish,
cai pachata charicuc callari
rumicunapish ricurirca.
17Jahua pachamanta,
paipac maquita chutashpami,
mama cucha ucumanta
ñucata llucchirca.
18Yalli sinchi piñaccunamanta,
mana ricunayachiccunamanta,
ñucata yalli sinchi
gentecunamantami quishpichirca.
19Ñuca llaquihuan cac punzhacunami
macac shamurcacuna.
Shina cacpipish, Mandac Diosmi
ñucata sinchiyachirca.
20Ñucata cuyashpami,
ancho pambaman llucchishpa
quishpichirca.
21Mandac Diosca,
ñuca cashcata ruhuashca
shinallatacmi allita curca.
Ñuca maquihuan ima millaita
mana ruhuashcamantami,
allita cutichirca.
22Mandac Dios mandashca shinami,
cazushpa causarcani.
Ñuca Diosmanta caruyashpa
mana millaita ruhuangapac
rishcanichu.
23Tucui pai yachachishcacunaca
ñuca ñaupapimi carca.
Paipac quillcashpa mandashcamantaca
mana anchurircanichu.
24Paipac ñaupapica allitami
ruhuarcani.
Millaita mana ruhuangapacmi
cuidarircani.
25Mandac Diosca ñuca cashcata
ruhuashca shinallatacmi curca.
Paipac ñaupapi allita ruhuashca
shinallatacmi allita ruhuarca.
26Llaquic runataca llaquinguimi,
Imatapish mana pandaric runahuanca
allimi cangui.
27Ima mapa illaccunahuanca
canpish mapa illactami ricuchingui.
Millaita ruhuac-huanca
piñami cangui.
28Yangalla gentecunataca
quishpichinguimi.
Ashtahuanpish jatun
tucushcacunataca cumurichingapacmi
cambac ñahuica ricucun.
29Mandac Dioslla,
ñucata achicyachic luzmi cangui.
Ñuca Diosmi ñuca pura tutatapish
achicyachin.
30Achca soldadocunatapish,
canhuanmi mishasha.
Ñuca Dios-huanmi, pueblo jatun
pircatapish yallisha.
31Mandac Diospac ñanca
jucha illacmi.
Mandac Dios rimashcaca,
pipish mana juchanchipacmi.
Paipi shunguta churaccunapacca
jarcarina escudomi.
32Shinashpaca ¿Mandac Diospac randi
shuctac Dios tiyanchu?
¿Ñucanchic Diospac randi
rumi shina shuctac Dios tiyanchu?
33Diosmi alli chumbillishca
shinata ruhuashpa sinchiyachin.
Paimi ñuca purina ñanmantapish
ima jucha illacta ruhuan.
34Paimi ñuca chaquicunatapish,
venado shina callpacta ruhuan.
Paimi ñucataca urcu jahuapi
sinchita shayachin.
35Paillatacmi macanacuipipish
ñuca maquita yachachin.
Bronce arcotapish shitachunmi
ñuca rigracunata yachachin.
36Quishpirina escudotami
ñucaman curcangui.
Cambac cuyaihuanmi ñucata
jatunyachishcangui.
37Ñuca changacuna ama
chucchuchunmi,
ñuca purina ñantapish
anchoyachishcangui.
38Ñucata piñaccunataca
atishpami tucuchircani.
Paicunata tucuchingacamanmi,
mana cutircani.
39Paicunataca chingachircanimi
mana jataricta ruhuashpami
tucui tucuchircani.
Ñuca chaqui ucupimi urmarcacuna.
40Macanacuiman ricpica,
alli chumbillic shinami,
sinchita ruhuarcangui.
Ñucata piñaccunataca ñuca chaqui
ucupimi cumurichircangui.
41Canmi ñucata piñaccunataca
ñucapac ñaupamanta
callpachircangui.
Chaipimi ñucata mana
ricunayachiccunata tucuchircani.
42Paicuna caparicpipish
pi mana quishpichircachu.
Mandac Diosta caparicpipish,
mana ayudarcachu.
43Paicunataca ñuto
allpata shina ruhuarcani.
Ñanpi siricuc turu shinatami
sarushpa saquircani.
44Ñuca llacta gentecuna
llaquichisha nicpipish,
quishpichircanguimi.
Llactacunata mandac cachunmi
huacaichircangui.
Ñuca mana ricsishca
gentecunami servirca.
45Shuctac llactamanta shamushca
gentecunami alli ningapac shamun.
Ñuca imata mandashcataca
uyashcahuanmi cazuncuna.
46Shuctac llactamanta
shamushca gentecunami
irquiyashpa paicuna miticushcamanta
chucchushpa llucshin.
47¡Mandac Diosca causacuchunlla!
¡Sinchi rumi shina ñuca Diosca
alli nishca cachun!
Ñucata quishpichic Diosca
jatunyachishca cachun.
48Ñucata llaquichishca
shinallatac llaquichicmi.
Gentecunataca ñucata cazuchunmi,
ñuca chaqui ucupi churan.
49Canmi ñucata piñaccunamanta
anchuchircangui.
Canmi ñucata piñaccunapac chaupipi
jatunyachircangui.
Millai runapac maquimantami
quishpichircangui.
50Chaimantami Mandac Dioslla,
tucui llactacunapi
canmanta huillasha.
Cambac shutitaca
salmocunahuanmi cantasha.
51Paimi, pai acllashca
jatun mandacta
macanacuita mishachishpa cushichin.
Aceitehuan cahuishpa paipaclla
ruhuashca runata llaquinmi.
Chashnami ñucatapish,
ñuca huahuacunatapish
huiñaita llaquin» nirca.
Who We AreWhat We EelieveWhat We Do
2025 by iamachristian.org,Inc All rights reserved.
