2 REYES 16 - Biblia Quichua Cañar 2010

Acaz Judá llactata mandashcamanta(2 Cr 28.1-27)

1Remaliaspac churi Peka chunga canchis huatata Israel llactata mandacucpimi, Jotampac churi Acazca Judá llactata mandai callarirca.

2Acazca ishcai chunga huatata charishpami, mandai callarirca. Chunga sucta huatatami Jerusalenpi mandarca.

Paita Mandac Diospac ñaupapica ñaupa taita David shina allica mana causarcachu.

3Ashtahuanpish Israel llactata jatun mandaccuna shinallatacmi, jatun millana juchata ruhuashpa causarca. Israelcunapac ñaupamanta Mandac Dios llucchishpa cachashca gentecuna shinallatacmi Acazca paipac churita rupachirca.

4Lomacunapi tiyac altarcunapi, uchilla lomacunapi, yura ucucunapi animalcunata huañuchishpa, inciensotapish rupachicmi carca.

5Siria llactata jatun mandac Rezinpish, Remaliaspac churi israelcunata jatun mandac Pekapish macanacungapacmi Jerusalenman rirca. Chashna rishpa, Acazta muyunacushpapish mana ati pudircacunachu.

6Chai punzhacunallapitacmi Edom llactata jatun mandacca Judá gentecunata llucshishpa cachashpa, Elat pueblota Edom llactallapactac cachun cutin japirca. Shina llucchishpa cachashpami, Edom llacta runacunaca Elat pueblopi causac shamurcacuna. Cunan punzhacamanmi chaillapitac causancuna.

7Chaimantami Acazca Asiria llactata jatun mandac Tiglat-pileserpacman huillaccunata cachashpaca: «Ñucaca canta servic cambac churillatacmi cani. Shina cashcamanta Siria llactata jatun mandacpac maquimantapish, Israel llactata jatun mandacpac maquimantapish misangapac huichai shamui. Paicunami ñucata macangapac jatarishcacuna» nichun cacharca.

8Mandac Diospac huasimantapish, jatun mandacpac huasimantapish allichishca cullqui, curita japishpami, Acazca Asiria llactata jatun mandacman cuchun cacharca.

9Asiria llactata jatun mandacca chaita japishpami, Damasco pueblopi causaccunahuan macanacungapac huichai rishpa, chai pueblota japirca. Chai pueblopi causaccunatapish Kir pueblomanmi prezu aparca. Shinallatac Rezintapish huañuchircami.

10Chai quipami jatun mandac Acazca Asiria llactata jatun mandac Tiglat-pileserta Damasco pueblopi tupangapac rirca. Chaiman chayashpami, jatun mandac Acazca Damascopi tiyac altarta ricushpa, chai altar mashna medishcata ima shina cacta dibujashpa, Urías curaman cuchun cacharca.

11Jatun mandac Acaz tucuita ruhuashpa, Damasco pueblomanta cachashca shinallatacmi Urías curaca altarta ruhuarca. Chaitaca jatun mandac Acaz Damasco pueblomanta cutingacamanmi ruhuarca.

12Jatun mandac Damasco pueblomanta cutimushpami, chai altarta ricushpa, chai altar jahuapi animalcunata Diosman cushpa tucui rupachirca.

13Shinallatac tucui rupachinacunatapish, ofrendatapish, vinotapish chai jahuapi tallirca. Dios-huan alli tucungapac huañuchishca animalpac yahuartapish altar ladopimi chiraparca.

14Chai quipami Mandac Diospac ñaupapi cac bronce altartaca, Diospac huasi ñaupamanta anchuchishpa mushuc altar jahua ladomanmi churarca.

15Jatun mandac Acaz Urías curata mandashpaca: «Cai jatun altarpica tutamanta Diosman animalcunata cushpa tucui rupachinguichic. Chishica Diosman cushca granota, jatun mandac cushca animalta, chai pueblopi causaccuna cushca animalta rupachinguichic. Shinallatac ofrendatapish, tallina vinotapish rupachinguichic. Chai jahuallapitac huañuchishca animalpac yahuartapish, tucuita Diosman cushpa rupachina animalpac yahuartapish chirapanguichic. Cai bronce altartaca Diosman ñuca tapungapacllami charisha» nirca.

16Urías curaca jatun mandac Acaz ima shina mandashca shinallatacmi tucuita ruhuarca.

17Jatun mandac Acazca yacu tanqueta charicuc tablacunata pitishpami, chai yacu tanquetapish anchuchirca. Broncemanta ruhuashca huagracunapac jahuapi churashca jatun pailatapish anchuchishpami, rumimanta ruhuashca jahuapi churarca.

18Asiria llactata jatun mandacpac ñaupapi alli ricuringapacmi samana punzhapi tandanacungapac Diospac huasipi ruhuashca corredortapish, jatun mandac yaicuna ñantapish anchuchirca.

19Acazpac shuctac ruhuashcacunapish, imacunallata ruhuashcacunapish, Judá llactata jatun mandaccuna imata ruhuashcacunata quillcashcapimi tiyacun.

20Jatun mandac Acaz huañushpa paipac ñaupa taitacunahuan tandanacugricpica, paipac ñaupa taitacunata enterrashcallapitacmi Davidpac pueblopi enterrarca. Paipac churi Ezequiasmi paipac randi mandarca.