DEUTERONOMIO 4 - Biblia Quichua Cañar 2010

Mandac Diosta cazuchun mandashcamanta

1Cunanca israelcuna, ñaupa taitacunata Mandac Dios cushca llactaman yaicushpa causangapacca cai mandashcacunatapish, yachachishcacunatapish, imata ruhuachun yachachishcatapish alli uyaichic.

2Cai ñuca mandashcacunataca ama yapachinguichicchu, ama anchuchinguichicchu. Ñuca yachachishca, Mandac Dios mandashcacunataca cazushpa causanguichic.

3Mandac Dios Baal-peor diosta mañaccunata imata ruhuashcataca quiquin ñahuihuanmi ricurcanguichic. Mandac Diosca Baal-peor diosta caticcunataca cancunapac chaupimi tucuchirca.

4Ashtahuanpish cancunaca, Mandac Diosta tucui shunguhuan catishcamantaca causacunguichicmi.

5Riquichic, ñucata Mandac Dios mandashca shinami mandashcacunatapish, yachachishcacunatapish cazuchun yachachini. Cancunaman cushca llactaman yaicushpa, pactachishpa causachunmi yachachircani.

6Cai mandashcacunata cazunguichic. Chashna cazushpa causashpami cancunaca alli yuyaiyuccuna, alli yachaccuna canguichic. Chashna cacpimi, cai pachapi causaccunaca: “¡Cai gentecunaca alli yachac, alli yuyaiyuccunami!” ninga.

7Ñucanchicta Mandac Diosca ñucanchic mañashcata uyangapac ñucanchic ladopimi. ¿Maijan shuctac llactatac ñucanchic Dios shina, mañashcata uyac diosta charingayari?

8¿Maijan jatun llactatac cashna cancunaman yachachishca pactachinacunata, cashcata yachachic mandashcacunataca charinga?

9Chaimanta alli cuidaringuichic. Cambac ñahuihuan ricushcacunata ama cungarishpa, yuyarashpa causanguichic. Tucui causaipi cambac shungupi huacaichishca shina causaichic. Huahuacunamanpish, nietocunamanpish yachachinguichic.

Israelcuna Horeb urcupi ima tucushcamanta

10Horeb urcupi Mandac Diospac ñaupapi cancuna cacpimi, paica: “Ñuca nishcacunata uyachun, tucui israelcunata ñuca ñaupaman tandachi. Caicunata yachacushpami, cai pachapi causashpaca ñucata manchashpa causangacuna, shinallatac huahuacunamanpish yachachinga” nirca.

11Chashna nicpimi, cancunaca urcu chaquiman cuchuyarcanguichic. Chai urcuca cielocaman rupashpami yana yana puyuhuan purayashca carca.

12Mandac Diosca chai nina chaupimantami cancunataca rimarca. Chai rimashcata uyashpapish, pai ima shina cashcataca cancunaca mana ricurcanguichicchu.

13Chaipimi Mandac Diosca pai ari nishcata huillashpa, chunga mandashcacunata ishcai tabla rumipi quillcashpa mandarca.

14Chai huatacunallapitacmi Mandac Diosca ñucataca cancuna japigricushca llactaman yaicushpa, mandashcacunata, pactachinacunata yuyarashpa cazuchun, yachachi nirca.

Yanga dioscunata mana ruhuana cashcamanta

15Cancunaca Horeb urcupi nina chaupimanta Mandac Dios rimacucpica, imata mana ricurcanguichicchu. Chaimanta cancunallatac allita cuidarichic.

16Pacta cariman riccha, huarmiman riccha dioscunata ruhuashpa, huaclliringuichicman.

17Shinallatac allpapi tiyac animalman riccha, jahua cielota volac animalman riccha,

18allpata aisarishpa puric animalman riccha, yacupi tiyac challuaman riccha dioscunata ruhuashpa, pacta huaclliringuichicman.

19Pacta jahua cielota ricushpa, intita, quillata, lucerocunata, tucui jahua cielopi tiyashcata ricushpa cungurishpa adoranguichicman. Chaicunataca Mandac Diosmi tucui cai pachata achicyachichun ruhuarca.

20Mandac Diosca cancunataca Egipto llactapi fierrota nuyuchina hornopi shina causacucpimi llucchimurca. Cunan punzha shina, paipaclla acllashca cachunmi llucchimurca.

21Shina cacpipish, Mandac Diosca cancuna millaita ruhuashcamantami ñucahuan piñarishpa: “Jordán yacuta pasashpa, sumac llactamanca mana yaicunguichu” nirca.

22Chaimantami ñucaca Jordán yacuta mana pasashpa, cai llactapi huañugrini. Shina cacpipish, cancunaca cai yacuta pasashpa, sumac llactata japinguichicmi.

23Chaiman chayashpaca, pacta Mandac Dios cancunahuan ari nishcata cungarishpa, imaman riccha shuctac dioscunata ruhuanguichicman. Chaicunataca Mandac Diosca ama ruhuachun nircami.

24Mandac Diosca paipaclla cachunmi munan. Paica rupachishpa tucuchic nina shinami.

25Cancuna chai llactapi causacushpaca huahuacunayuc, nietocunayuc tucushpami yuyaccuna tucunguichic. Chashna causacushpaca, ama labrashca dioscunata, imaman riccha dioscunata ruhuashpa adoranguichicchu. Chashna ruhuashpaca Mandac Diospac ñaupapi mana allita ruhuashpami paita piñachinguichic.

26Chaimantami cunanca tucurinata ricuchichunmi jahua pachatapish, cai pachatapish churani. Jordán yacuta pasashpa, chai llactapi causacushpa, utca tucurina cashcata ricuchichunmi churani. Mana unaitachu chai llactapica causanguichic.

27Mandac Diosmi tucui cancunataca shuctac llactacunaman shic-huashpa cachanga. Shina ruhuacpica, ashallami saquiringuichic.

28Chai llactacunapimi gentecuna caspimanta, rumimanta ruhuashca, mana ricuc, mana uyac, mana mutquic, mana micuc yanga dioscunata servinguichic.

29Shina cashpapish, chai llactacunapi cashpa, tucui shunguhuan, tucui yuyaihuan Mandac Diosta mañashpaca taringuichicmi.

30Quipa punzhacunapi llaquicuna japicpi, jatun llaquicunahuan cashpaca, Mandac Diosman cutirishpa, pai rimashcata uyanguichicmi.

31Mandac Diosca llaquic Diosmi. Paica mana saquingachu, mana tucuchingachu, shinallatac cancunapac ñaupa taitacunahuan ari nishcatapish mana cungaringachu.

32Cancuna manarac tiyashca punzhacunapi, Dios runata cai pachapi ruhuashcamanta pacha, cai shina ruhuashcata tapuichicyari. Cai pacha callarimanta, cai pacha tucuricaman cai shina tiyashcata, mana tiyashcata tapuichicyari. Mana cashpaca, cai shina pi ruhuashcata tapuichicyari.

33¿Shuc llactapi causaccunaca nina chaupimanta Dios rimashcata cancuna uyashca shina uyashpapish causashpa caticca tiyangachu?

34Mandac Diosmi Egipto llactapi cancuna causacucpi, llaquicunata cachashpa, milagrocunata ruhuashpa, jatun macanacuita ruhuashpa paipac poderhuan, paipac maquihuan llucchimurca. ¿Pai shina shuctac dioscunaca tiyangachu?

35Mandac Dios caicunata ruhuashpaca, pailla Dios cashcata, pi shuctac dios mana tiyashcata ricuchingapacmi ruhuarca.

36Yachachingapacca jahua pachamantami rimarca. Cutin cai pachapica paipac jatun ninatami ricuchirca. Nina pai chaupimanta rimashcataca uyarcanguichic.

37Paica cancunapac ñaupa taitacunata cuyashpami, paicunapac huahua huahuacunataca acllarca. Paimi Egiptomantaca paipac poderhuan llucchimurca.

38Cancunapac ñaupamanta jatun llactacunata, yalli jatun, sinchi gentecunata llucchishpa cachashpami, chai llactapi cancunaman cunga. Cunanpish chashnallatacmi ruhuacun.

39Mandac Diosca jahua pachapipish, cai pachapipish Diosmi. Chaitaca cancunapac shungupi yuyarichic.

40Cancunapish, cancunapac huahuacunapish, cancunapac quipa huiñaicunapish alli cangapac, shinallatac Mandac Dios cushca llactapi unaita causangapacca cai ñuca cunan yachachishpa mandashcacunata, pactachinacunata cazunguichic» nirca.

Miticuna llactacunata chicanyachishcamanta

41Chai quipami Moisesca Jordán yacumanta inti llucshina ladoman quimsa llactacunata chicanyachirca.

42Chai llactacunataca maijanpish mana huañuchina munaihuan cashpa, huañuchishpa, chai maijan llactacunapi miticugrichunmi chicanyachirca.

43Rubenpac aillumanca shitashca Beser pugru pambatami chicanyachirca. Galaadpac aillumanca Galaad llactapi tiyac Ramot llactatami chicanyachirca. Cutin Manasés aillumanca Basán llactapi tiyac Golán llactatami chicanyachirca.

Mandashcacunata Moisés huillashcamanta

44Cai mandashcacunatami Moisesca israelcunamanca huillarca.

45Egipto llactamanta israelcuna llucshishca quipa Moisés paicunaman huillashca mandashcacuna, pactachinacuna, ima shina causanata yachachishcacunaca caicunami.

46Caitaca Jordán yacumanta inti llucshina shuctac ladoman cac Bet-peor chimba lado pugru pambapimi yachachirca. Chai llactataca Hesbonpi causac amorreocunata mandac Sehonmi mandacurca. Chai mandactaca Moisesmi israelcunahuan Egiptomanta llucchimushca quipa huañuchirca.

47Chashnami paicunapac llactatapish, Basán llactata mandac Ogpac llactatapish japirca. Amorreocunata ishcai mandaccunaca Jordán yacumanta inti llucshina ladoman cac llactacunapimi causarca.

48Paicunaca Arnón yacu ladopi tiyac Aroer llactamantaca Sirión nishca, Hermón urcucamanmi japirca.

49Jordán yacumanta inti llucshina ladoman tiyac Arabá shuti tucui llactatapish Pisga urcu chaquiman cac Arabá yacu patacamanmi japirca.