PROVERBIOS 19 - Biblia Quichua Cañar 2010

1Mana entendic shuccunata rimashpa

llaquichinapac randica,

huaccha cashpapish ima millaita

mana ruhuashpa causanami alli.

2Manapish yachashpa

imata ruhuanaca mana allichu.

Maijanpish callpac shina imatapish

utca ruhuacca pandarinmi.

3Yuyai illac runaca

paipac causaipimi pandarin.

Chai quipaca paipac shungupimi

Mandac Diosta piñan.

4Chayuc runa cacpica,

apanacuccunapish achcami tiyan.

Ashtahuanpish huaccha cacpica

paihuan apanacucpish cungarinmi.

5Llullashpa huillac runaca

llaqui tucungatacmi.

Llullashpa puric runaca

miticushpa mana ati pudingachu.

6Alli shungu runa ayudachunca

achcacunami mashcan.

Imatapish carac runahuanca

tucuimi apanacun.

7Huaccha runataca tucui paipac

huauquicunami mana ricunayachin.

Paihuan apanacuccunacarin

paimantaca caruyancunallami.

Pai maijanhuan parlasha nishpapish

pita mana taringachu.

8Maijanpish yuyaita japicca

quiquin causaitami cuyan.

Alli yuyaihuan causashpaca

allitami japinga.

9Llullashpa huillac runaca

llaqui tucungami.

Llullashpa puric runaca

chingaringami.

10Yuyai illac runa

sumacta causanaca mana valinchu.

Shinallatac servic runa

mandaccunata mandac tucunacarin

manatac allichu.

11Alli yuyaiyuc runaca

piñarishpapish jarcarinmi.

Piñaccuna rimacpipish

upalla tucushpa,

alli nishca canallatami munan.

12Jatun mandac piñarishpaca

león huacac shinami manchachin.

Pai alli ruhuashcaca

garua quihuapi urmashca shinami.

13Yuyai illac churica

taitata llaquichishpallami causan.

Caparishpa rimaricuc huarmica

catipi shutucuc tamya shinami can.

14Taitamantaca huasita,

shinallatac

pai ima charishcacunatami chasquingui.

Ashtahuanpish Mandac Diosmantaca

alli yuyaiyuc huarmitami chasquingui.

15Quillanayaimi runataca

yallita sueñuchin.

Quilla runaca

yarcaihuanmi causanga.

16Mandashcata pactachic runaca

paipac causaitami cuyan.

Dios munashca shina causanata

mana munacca huañungami.

17Huacchacunaman imata cushpaca

Mandac Diosmanmi mañachingui.

Allita ruhuashcamantaca

Diosmi allita cunga.

18Cambac churi uchilla

cacpirac yachachi.

Shina cashpapish cambac shungupica

ama huañuchina yuyaihuan canguichu.

19Yallita piñaric runaca

llaquimi tucunga.

Paita ayudacpica, ashtahuan millaita

ruhuashpami catinga.

20Cunashcatapish,

alli causachun rimashcatapish

chasquingui.

Chaicunata uyashpami yachac tucungui.

21Runapac shungupica caita chaita

ruhuana yuyaicunami tiyan.

Ashtahuanpish Mandac Dios

munashcami pactanga.

22Shuccunata llaquic runamanca

mai cushicuimi can.

Llullac runa canapac randica,

huaccha canami ashtahuan alli.

23Mandac Diosta manchac runaca

causangami.

Paita manchashpaca imatapish

mana manchashpa cushillami causanga.

Ima llaquipish mana japingachu.

24Quilla runaca micunata maquipi

charicushpapish paipac shimipica

mana churangachu.

25Burlashpa asic runata macacpica,

mana yachac runapish

cazunata yachacungami.

Yuyaisapa runata alli tucuchun rimacpica,

ashtahuanmi yuyaita japin.

26Taitapacta imata shuhuac,

mamata huasimanta llucchishpa cachacca

mana llaquic

pingaita mana charic churimi can.

27Ñuca churilla, alli yuyaicunata

cushcata mana uyashpaca,

alli yachaimantami caruyacungui.

28Llullashpa huillac runaca

llaquichicucpica burlashpami asin.

Diosta mana manchac runaca

mana allicunatami rimarin.

29Burlashpa asiccunata

llaquichingapacca allichishcami tiyacun.

Yuyai illac runacunata lomopi

azotinapish allichishcami tiyacun.