ESTER 6 - Biblia Quichua Cañar 2010

Mardoqueota alli nishcamanta

1Chai tutami jatun mandacca sueño pitiricpi mana sueñui pudirca. Chaimantami jatun mandac imata ruhuashcacunata yuyaringapac quillcashcata apamushpa, paipac ñaupapi rezachun mandarca.

2Chaipimi pungupi cuidac jatun mandacta servic Bigtán, Teres eunuco runacuna jatun mandac Asuerota huañuchinata yuyaricushcata Mardoqueo huillashcata tarishpa rezarca.

3Chaita uyashpami jatun mandacca:

—Chaita huillashcamanta Mardoqueomanca, ¿ima allitatac curcanguichic? Mana cashpaca, ¿paitaca allitami ruhuashca nircanguichicchu?— nishpa tapurca.

Shina nicpimi, paita serviccunaca:

—Imatapish paimanca mana ruhuashcachu— nircacuna.

4Amán pai shayachishca sipina caspipi Mardoqueota sipichun ningapacmi jatun mandac mandana huasi punguman yaicushca carca. Chaipimi jatun mandacca:

—¿Pitac huasi pungupi?— nishpa tapurca.

5Shina tapucpi paita serviccunaca:

—Amanmi pungu pambapi shayacun— nircacuna.

Shina nicpi, jatun mandacca:

—Yaicuchunlla— nirca.

6Amán yaicucpimi jatun mandacca:

—Jatun mandac alli nina runataca ¿Imatatac ruhuana can?— nirca.

Shina nicpimi, Amanca paipac shungupica: «Jatun mandacca ñucatami alli nisha nicunga. Pitatac ashtahuanca alli ningayari» nishpa yuyarca.

7Chaimantami Amanca jatun mandactaca:

—Jatun mandac alli nigricushca runamanca,

8jatun mandac churarinata apamushpa churachichun. Jatun mandac montana caballota apamushpa montachichun. Umapica jatun mandacpac coronata churachichun.

9Churanatapish, caballotapish jatun mandac churashca mandaccunapuramanta ashtahuan alli nishca mandac apamushpa, cuchun. Jatun mandac alli nigricushca runamanca paicunami churachinga. Shinallatac caballopi montachishpami plazaman apashpa, paipac ñaupapi: “¡Jatun mandac alli nigricushca runataca chashnami alli nina!” nichunmi mandana— nirca.

10Shina nicpimi, jatun mandacca Amantaca:

—¡Utca rishpa churanatapish, caballotapish apamugri! ¡Ña apamushpaca, ñuca mandana huasi pungupi tiyacuc Judá llactamanta Mardoqueota can nishca shinallatac ruhuagri. Tucui can nishcata pactachingui!— nirca.

11Chashna nicpimi, Amanca churarinatapish, caballotapish apamushpa. Mardoqueoman churachishpa, caballopi montachishpa plazaman apashpaca: “Jatun mandac alli nigricushca runataca chashnami alli nina” nirca.

12Chai quipaca jatun mandac mandacuc huasi pungullamantacmi Mardoqueoca cutirca. Cutin Amanca yallita llaquirishpami, paipac umata tapashpa, paipac huasiman utca cutirca.

13Amán chayashpa paipac huarmi Zeresmanpish, paipac ricsishcacunamanpish tucui ima tucushcata huillacpica alli yachac paihuan apanacuccunapish, paipac huarmi Zerespish Amantaca:

—Judá llactamanta Mardoqueopac ñaupapi llaqui tucushpaca mana ati pudinguichu. Ashtahuanpish paipac ñaupapica urmashpami tucuringui— nircacuna.

14Amanhuan paicuna parlacucllapitacmi jatun mandacta servic eunuco runacunaca Ester ruhuacushca jatun micuiman Amanta utca pusharingapac chayarca.