1Imatac ruhuanataca gentecunami
yuyarin.
Shina cacpipish, Mandac Diosmi
chai yuyarishcata ricun.
2Runapac yuyaipica pai tucui
ruhuashcacunami alli ricurin.
Ashtahuanpish Mandac Diosmi
chai yuyaitaca pezac shina ricucun.
3Can imata ruhuanacunataca
Mandac Diospac maquipi churai.
Chaipimi can imata
ruhuagricushcacunaca alli llucshinga.
4Mandac Diosca shuc yuyaihuanmi
tucuita ruhuashca.
Diosta mana manchac runatapish
llaquichina punzhapi llaquichingapacmi
ruhuashca.
5Mandac Diosca shungupi tucui
jatun tucushcacunata millanayachinmi.
Paicunaca manatac perdonashcachu canga.
6Juchayuctaca llaquishpa,
mana llullashpami perdonanga.
Runaca Mandac Diosta manchashpami,
mana allimantaca anchurin.
7Mandac Dios maijan runapac causaita
allimi nicpica,
paita piñaccunapish
paihuan alli tucusha ningacunami.
8Mana allita ruhuashpa
achcata charinapac randica,
cashcata ruhuashpa ashallata charinami
ashtahuan alli.
9Imata ruhuanataca
gentecunami shungupi yuyarin.
Shina cacpipish Mandac Diosmi
paicuna ruhuana cashcataca pushan.
10Jatun mandacca
Dios yuyachishcatami riman.
Piñanacushcata allichicushpaca
mana pandata rimangachu.
11Pezanapish, balanzapish
cashcata pezacca Mandac Diospacmi.
Mochilapi churashca pezana rumicunatapish
can ruhuashcami can.
12Jatun mandaccuna yalli mana
allita ruhuanataca millanayachinmi.
Ashtahuanpish cashcata ruhuashpami
pai mandanataca allita sinchiyachinga.
13Jatun mandaccunataca maijanpish
allita sumacta rimashpami cushichin.
Paicunaca cashcata rimaccunatami cuyancuna.
14Jatun mandac piñarishcaca
huañuimanta huillac shinami.
Ashtahuanpish yachaisapa runaca
chai piñarishcata allichinmi.
15Jatun mandac cushilla ñahuihuan cacpica,
causaimi tiyan.
Pai cuyaihuan ruhuashcaca
quipa tamya puyu shinami.
16Alli yachaitaca
alli curitapish yallimi mashcana.
Alli yuyaiyuc canaca
cullquita yallimi alli.
17Allita ruhuashpa causaccunaca
mana allimanta anchurinmi.
Mana allita ruhuanamanta cuidariccunaca
causaitami cuidancuna.
18Manarac llaqui tucushpaca
jatun tucushcami can.
Manarac urmashpaca,
jatun tucushpami causancuna.
19Macanacushpa quichushcacunata
jatun tucushcacunahuan chaupinapac randica,
yangalla gentecunahuan tandanacushpa
paicuna shina tucunami alli.
20Yachachishpa rimashcata
cazuc runami allita japinga.
Mandac Diospi shunguta churashpa
causac runaca cushicungami.
21Shungupi yuyaisapa runaca
entendic runa nishcami canga.
Sumacta rimashcaca ashtahuanmi yachachin.
22Alli yuyaiyuc runapi
tiyashca alli yuyaica
causaita cuc yacu shinami.
Ashtahuanpish yuyai illac runapi
tiyashca yuyaica llaquichinmi.
23Yuyaisapa runapac shunguca
allita yuyarishpami riman.
Sumacta ashtahuan rimashcaca
ashtahuanmi yachachin.
24Sumacta rimashcaca bunga mishqui shinami.
Almatapish cushichic,
cuerpopacpish jambic shinami.
25Runamanca alli ñan shinami ricurin.
Shina cashpapish huañuiman pushac ñanmi.
26Huicsata yarcanamantami
trabajac runaca trabajan.
Yarcacpimi imallatapish ruhuan.
27Mana allita ruhuac runaca
mana allita ruhuanallatami yuyan.
Paipac shimimantaca
rupacuc nina shinami llucshicun.
28Millaita ruhuac runaca
piñanacuipimi churan.
Huashalla parlac runaca
paihuan apanacuccunatapish caruyachinmi.
29Millai runaca paipac ricsishcata
umashpami, mana alli ñanta pushan.
30Maijanpish ñahuita quimllashpaca
mana allita ruhuanatami yuyaricun.
Maijanpish shimita huichcashpaca
mana allitami ruhuashca.
31Runaca cashcata ruhuashpa causashpami,
coronata chasquic shina yuyacyan.
32Yallita sinchi runa canapac randica,
mana utca piñaric canami ashtahuan alli.
Quiquinllatac jarcaric runaca
shuc pueblota japic runatapish,
ashtahuan yalli allimi.
33Mizapimi suertetaca ruhuancuna.
Shina cacpipish Mandac Diosmi
imata ruhuanataca ricuchin.
Who We AreWhat We EelieveWhat We Do
2025 by iamachristian.org,Inc All rights reserved.
