2 CRÓNICAS 22 - Biblia Quichua Cañar 2010

Ocozías Judá llactata mandashcamanta(2 R 8.25-29)

1Shuhuaccuna arabecunahuan carpa huasicunaman shamushpa, Jorampac punta churicunata tucui huañuchishcamantami Jerusalenpi causaccunaca Jorampac randica, paipac quipa churi Ocoziasta jatun mandac cachun churarca. Chaimantami Jorampac churi Ocozías, Judá llactata mandai callarirca.

2Ocoziasca chuscu chunga ishcai huatata charishpami, mandai callarirca. Paica shuc huatallatami Jerusalenpi mandarca. Paipac mamaca Omripac ushi Ataliami carca.

3Ocoziasca mana allita ruhuana yuyaita paipac mama yachachishcamantami Acabpac huahua huahuacuna shinallatac Diosta mana manchashpa, mana allita ruhuashpa causarca.

4Paipac taita huañushca quipaca, mana alli yuyaitami paimanca curca. Chaimantami Acabpac huahua huahuacuna shinallatac Mandac Diospac ñaupapica mana allita ruhuashpa causarca. Chashnami paipac mana allipacllata mana alli yuyaita curca.

5Ocoziasca chashna yuyaita cucpimi, Israel llactata jatun mandac Acabpac churi Joramhuan tandanacushpa, Siria llactata jatun mandac Hazaelhuan macanacungapac Galaad llacta Ramot puebloman rirca. Chaipica Siria llactamanta soldadocunami Joramta chugrirca.

6Siria llactata jatun mandac Hazaelhuan Ramot pueblopi macanacucushpa, chugririshpami, Joramca Jezreel pueblopi jambiringapac rirca. Acabpac churi Joram Jezreel pueblopi huañunalla cacpimi, Judá llactata jatun mandac Jorampac churi Ocoziasca ricungapac rirca.

Ocoziasta Jehú huañuchishcamanta(2 R 9.27-29)

7Ocozías Joramta ricungapac rishpa, huañuna cashcataca Mandac Diosllatacmi munarca. Mandac Diosmi Nimsipac churi Jehutaca Acabpac huasi ucupurata huañuchichun, aceitehuan cahuishpa acllashca carca. Ocoziasca Jorampacman chayashpami, Jehuhuan tupangapac Joramllahuantac llucshirca.

8Jehuca Acabpac huasi ucupuracunata huañuchishca quipaca, Judá llactapi causaccunata mandaccunahuanpish, Ocoziaspac huauquicunapac churicunahuanpish tuparcami. Paicunaca Ocoziasta serviccunami carca. Paicunatapish huañuchircami.

9Ocoziastaca Samaria pueblopi miticushpa tiyacucpimi, chaimanta Jehupacman apashpa huañuchirca. Paita enterrashpaca: «Tucui shunguhuan Mandac Diosta servic Josafatpac churimi carca» nircacuna. Ocoziaspac huasi ucupuramanta mandangapacca pi mana tiyarcachu.

Ocoziaspac mama Atalía Judá llactata mandashcamanta(2 R 11.1-21)

10Ocoziaspac mama Ataliaca paipac huahua huañushcata yachashpami, Judá aillupuramanta jatun mandacpac huahua huahuacunata tucui huañuchirca.

11Ashtahuanpish jatun mandac Jorampac ushi Josabetmi jatun mandac Ocoziaspac churi Joastaca, jatun mandacpac caishuc churicunata huañuchicucpi, anchuchishpa paitapish, paipac huiñachic mamatapish shuc ucupi pacarca. Jatun mandac Jorampac ushi Joiada curapac huarmica Ocoziaspac pani cashpami, chashna pacarca. Ataliapac ñaupamanta pacacpimi, chai huahuataca mana huañuchirca.

12Judá llactata Atalía mandacucpica, Joasca Mandac Diospac huasipimi sucta huatacaman paicunahuan miticushpa causarca.