ISAÍAS 26 - Biblia Quichua Cañar 2010

Mandac Diospi shunguta churanamanta

1Chai punzhapi Judá llactapi

cantashpaca:

«Muyundita pircashca

llactatami charinchic.

Diosmi ñucanchicta quishpichingapac

ishcai pircata shina muyundita

ruhuarca.

2Cashcata ruhuac, Diosta cazuc

runacuna yaicuchun

llacta pungucunata pascaichic.

3Mandac Dioslla, canta mana

cungarishpa can yuyailla

causaccunata cuidangui.

Cushi causaita cunguiyari.

Paicunata canpi shunguta

churashpami causan.

4Mandac Diosca huiñaipac

jarcarina jatun rumi shinami.

Chaimanta paipi huiñaita

shunguta churaichicyari.

5Paimi jahuapi tiyaccunataca

urmachirca.

Jatun tucushca llactacunatapish

cumurichishpami yangallata ruhuarca.

Paicunataca pingaichishpami,

ñuto allpapi shitarca.

6Chaipimi llaquilla

causaccunapish, huacchacunapish

paicunapac chaquihuan

sarushca siricunga.

7Cashcata ruhuacpac causaica

jucha illacmi.

Canca cashcata ruhuac

Dios cashpami,

cashcata ruhuaccunapac

causaita ricucungui.

8Mandac Dioslla, cantaca cashcata

ruhuachunmi shuyarcanchic.

Cambac shutita mana cungarishpa,

causanatami ñucanchicca

tucui shunguhuan munanchic.

9Tucui shunguhuanmi tutapish

canta yuyaricuni.

Ñuca causai tiyashcacamanca

tutamanta jatarishpami

cantaca mañasha.

Can llaquicpimi,

cai pachapi causaccunaca

cashcata ruhuashpa

causanata yachacun.

10Mana allita ruhuac runaca

paita llaquicpipish,

cashcata ruhuanataca

mana yachacungachu.

Allita ruhuaccunapac llactapi

causashpapish mana allitami

ruhuan.

Can Mandac Dios jatun cashcataca

mana yuyarinchu.

11Mandac Dioslla,

llaquichingapac cambac

maqui alzashca cacpipish,

paicunaca mana ricunchu.

Can acllashcacunata ricushpa,

paicuna shina canata

munashpa pingachun.

Canta piñaccunata

nina tucuchichun.

12Mandac Dioslla, cushi causaitaca

canmi ñucanchicmanca cungui.

Tucui imatapish can ayudacpimi

ruhuanchic.

13Mandac Dioslla,

shuctac mandaccunami

ñucanchicta llaquichishpa

mandacun.

Shina cacpipish,

cambac shutillatami alli ninchic.

14Paicunaca huañushcami,

ña mana causaringachu.

Mana jataringachu.

Paicunataca yallita

llaquichishpami tucuchircangui.

Paicunataca pi mana yuyaringachu.

15Mandac Dioslla,

can acllashcacunataca

ashtahuanmi mirachircangui.

Chashna mirachishpami,

canca yallita alli nishca cangui.

Cai pacha tucuricamanmi

jundachircangui.

16Mandac Dioslla,

yallita llaquihuan cashpami,

cantaca mashcarca.

Can llaquichicpica,

yallitami mañarca.

17Mandac Dioslla, huarmi sajuarina

nanaihuan yallita caparic shinami,

cambac ñaupapica cashcanchic.

18Ñucanchicca sajuarina

nanaihuanca huairata shinami

sajuarircanchic.

Cai llacta quishpirichunca,

imatapish mana ruhuashcanchicchu.

Shuccunapish manarac

huacharishcachu.

19Cambac huañushcacunaca

causaringami.

Huañushca cuerpoca jataringami.

¡Allpapi samaricuccunalla,

riccharishpa cantaichicyari!

Garua tamyahuan muyu

huiñac shinami,

allpamanta llucshimunga.

Cai pachaca huañushcacunata

cutichingami.

20Ñuca llactapi causaccunalla,

ucucunaman yaicushpa

pungucunata huichcarichic.

Dios piñarishca pasaringacaman

ashata miticuichic.

21Riquichic, Mandac Diosca

cai pachapi causaccuna

paita piñashpa,

mana allita ruhuashcamantami

llaquichingapac jatarigrin.

Allpapish paipac jahuapi

huañuchishpa,

yahuarta jichashcata ricuchingami.

Paipac jahuapi huañuchishcataca

mana ashtahuan pacangachu» nirca.