1Mandac Diosca usyai punzhacunapi pucushca taza frutatami muscuipi shina ricuchirca.
2Shina ricuchishpaca:
—Amós, ¿imatatac ricungui?— nirca.
Shina nicpimi ñucaca:
—Usyai punzhacunapi pucushca taza frutatami ricuni— nircani.
Shina nicpimi, Mandac Diosca:
—¡Ñuca acllashca israelcunata mana llaquishpa, tucuchina punzhami chayamun!
3Chai llaqui punzhapica ñuca huasipi cantaccunapish huacangami. Achca huañushcacunami siricunga. Chai huañushcacunataca tucui ladocunapimi shitanga. Chaitaca Mandac Dios ñucami nini— nirca.
Israelcuna llaquita apana punzha chayamunamanta4Cai llactapica imata mana chariccunata, huacchacunata llaquichiccuna caita uyaichic.
5Cancunaca: «Trigota catungapac, ¿ima horastac quillaca tucuringayari? Shinallatac grano huacaichina ucumanta granota llucchishpa catungapac, ¿ima horastac samana punzha tucuringayari? Catuna punzhacuna chayamucpica, balanzatapish, medinacunatapish huacllichishpa catushpami achca cullquita japishun.
6Huacchacuna mana pagai pudishpaca ñucanchicta serviccunami tucunga. Imata mana chariccunaca ushutamantami ñucanchicta servic tucunga. Lanchashca trigotapish catushunmi» ninguichicmi.
7Jacobo alli nina Mandac Dios paipac shutipi ari nishpaca: «¡Chai tucui mana allita ruhuashcataca jaicapi mana cungarishachu!» ninmi.
8Llaquichina punzhapica,
¿manachu allpaca chucchunga?
Cai llactapi tucui causaccunaca,
¿manachu duelo churanata
churarishpa llaquiringa?
Cai pachaca, jatun yacu
shinami miranga.
Shina mirashpapish
Egipto jatun yacu shinami
ashalla tucunga.
9Mandac Diosca:
«Ñuca llaquichicui punzhapica,
intica chaupi punzhami tigranga.
Punzha pachami tutayanga.
10Cancunapac cushicuna
fiesta punzhacunataca,
llaqui punzhacunatami ruhuasha.
Tucui cancunapac cantocunataca
huañuipi cantanatami ruhuasha.
Sharpa churanatami churachisha.
Chashnami llaquirishpa,
acchata pitinga.
Chaipica, shuclla churi
huañushcamanta shinami huacanga.
Tucurina punzhaca
yalli llaqui punzhacunami canga.
11Yalli llaqui
punzhacunami chayamun.
Chai punzhacunapica yarcaitami
cai pachaman cachasha.
Mana micuna illashcamantachu
yarcachinga.
Mana yacu illashcamantachu
yacunayachinga.
Ashtahuanpish Mandac Dios
ñuca huillashca shimita
uyanata munashpami yarcaihuan,
yacunayaihuan shina puringacuna.
12Ñuca rimashcata
uyanata munashpami,
shuc mama cuchamantaca
caishuc mama cuchaman,
ura ladomantaca inti tigrana
ladoman puringa.
Shina purishpapish
mana taringachu.
13Chai punzhacunapica
carihuan manarac chayarishca
sumac solteracunapish,
mosocunapish yacunayaihuanmi
huañunalla tucunga.
14Samariapi tiyac dioscunapac
shutipi ari nishpa:
“¡Dan aillulla, cancunapac
diospac shutipi ari ninchic!”
niccunapish, shinallatac:
“¡Beersebaman rina ñanpac
shutipimi ari ninchic!”
niccunapish, mana jaicapi
jataringapacmi urmangacuna» nirca.
Who We AreWhat We EelieveWhat We Do
2025 by iamachristian.org,Inc All rights reserved.
