1Siria llactata jatun mandacpac soldadocunata mandac Naamanca paipac amopac ñaupapica mai alli nishcami carca. Mandac Diosca Siria llactataca Naamanmantami macanacuita mishachishca carca. Chaimantami paica mai alli nishca carca. Paica alli sinchi runa cashpapish lepra ungüitami charirca.
2Siriocunami macanacungapac llucshishpa, Israel llactamanta shuc solterata prezu apashca carca. Chai solteraca Naamanpac huarmita servicmi carca.
3Chai solterami paita mandac huarmitaca:
—¡Dios ima nishcata huillac runaca Samaria llactapimi! ¡Paipacman ñuca amo ricpica, lepra ungüimanta alliyanmanmi!— nirca.
4Shina nicpi, Naamán paipac amopacman rishpaca: «Israel llactamanta shuc solteraca cashna chashnami» nishca nirca.
5Shina nicpimi, Siria llactata jatun mandacca:
—Shina cashpaca rilla. Ñucami Israel llactata jatun mandacman shuc quillcata cachagrini— nirca.
Shina nicpimi, Naamanca chunga talento cullquita, sucta huaranga siclos curita, chunga mushuc churanata apashpa rirca.
6Shinallatac Israel llactata jatun mandacman cungapac quillcatapish apashpami rirca. Chai quillcapica:
«Cai quillca cambacman chayacpica,
ñucata servic Naamanta
lepra ungüimanta alliyachichun
ñuca cachashcatami
yachangui» nicurcami.
7Israel llactata jatun mandac chai quillcata rezashpa, paipac churanata lliquirishpaca: «Cai runaca ñuca lepra ungüimanta allichichunmi cachashca. ¿Ñucaca causaita cungapac, causaita quichungapacca Dioschu cani imatacyari? ¡Riqui, caicunata ruhuachun nishpa cachashpaca, ñucahuan piñanacuitami mashcacun!» nirca.
8Diospac runa Eliseo, Israel llactata jatun mandac piñarishpa, paipac churanata lliquirishcata yachashpami, jatun mandactaca: «¿Ima nishpatac cambac churanata lliquircangui? ¡Israel llactapi Dios ima nishcata huillac runa tiyashcata yachachunca, chai runata ñucapacman cachai!» nichunmi cacharca.
9Shina nicpimi, Naamanca paipac caballocunahuan, carretacunahuan shamushpa, Eliseopac huasi pungupi shayarirca.
10Chaipimi Eliseoca shuc runata cachashpaca: «Jordán yacupi canchis cutincaman armaringapac ri. Chashna armaricpica, aicha alli tucushpa, ungüi illac chuyanllami saquiringui» nirca.
11Shina nicpimi, Naamán piñarishpaca: «Pai tupangapac llucshishpa, ñuca ladopi shayarishpa, paipac maquita ungushca pushtupi churashpa, paipac Diospac shutipi mañacpi lepra ungüi anchurina cashcatami yuyarcani.
12¿Manachu Damasco pueblopi tiyac Abana, shinallatac Farfar jatun yacucunaca tucui Israel llacta yacucunata atishpa ashtahuan alli? ¿Manachu chai yacupi armarishpa chuyanlla saquiri pudini?» nirca.
Shina nishpami, piñarishpa tigrarishpa rirca.
13Shina ricpipish, paita serviccuna cuchuyashpaca:
—Ñuca taitalla, Dios ima nishcata huillac ima mana ruhuaipacta ruhuachun mandacpica, ¿manachu chaita ruhuanguiman carca? Ashtahuanpish paica: “Cambac ungüi anchurichun armari” nishcallataca, ¿ima nishpatac mana ruhuangui?— nirca.
14Shina nicpimi, Naamanca Diospac runa mandashca shinallatac canchis cutincaman Jordán yacupi armarirca. Chashna armarishpaca, huahuapac cuerpo shina ima ungüi illacmi saquirirca.
15Chai quipami Naamanca paipac ricsishcacunahuan Diospac runapacman cutishpa, paipac ñaupapi shayarishpaca:
—¡Riqui, tucui cai allpapica Diosca mana tiyanchu! ¡Ashtahuanpish Israel llactapimi tiyan! ¡Chaitami cunan yachac chayani! ¡Chashna cashcamanta canta servic ñuca ima carashcatapish chasquiyari!— nirca.
16Ashtahuanpish Eliseoca:
—¡Ñuca servina, Mandac Diospac shutipimi nini: Canmantaca mana imata japishachu!— nirca.
Naamán cutin cutin chasquichun nicucpipish, Eliseoca mana uyarcachu.
17Chaimantami Naamanca:
—Shina cashpaca, cai llactamanta canta servic ñuca allpata ishcai mulapi apachun saqui. Chaica canta servic ñucaca cunanmanta ñaupamanca mana shuctac dioscunaman animalta tucui rupachishachu. Ashtahuanpish Mandac Diosllamanmi tucui rupachisha.
18Ñucata mandac, Rimón diospac huasiman alli ningapac yaicushpaca, ñuca rigrapimi taunallishpa shayaringa Shina ruhuacpica, ñucapish chai diospac huasipica cungurinami tucun. Chashna ruhuacpica, Mandac Diosca canta servic ñuca mana allita ruhuashcata perdonachun— nirca.
19Shina nicpimi Eliseoca:
—Ama manchaichu, rilla— nishpa cacharca.
Naamán paipac ñaupamanta caruyashpa ricpimi,
20Diospac runa Eliseota servic Giezica: «Riqui, ñucata mandacca Siria llactamanta Naamán carangapac apamushcata mana japishpami, alli shungu tucushca. ¡Mandac Diospac shutipimi nini: Cunanllatami Naamán cushcata chasquingapac paita catishpa callpasha!» nishpa yuyarca.
21Shina yuyacushpami, Giezica Naamanta catishpa rirca. Shina paita caticta ricushpami, Naamanca tupangapac paipac carretamanta uricushpaca:
—¿Ima llaquitac tucungui?— nishpa tapurca.
22Shina tapucpimi Giezica:
—Allillami cani. Shina cacpipish, ñucata mandacmi: “Efraín urcumantami Dios ima nishcata huillaccunapac ishcai churi ñucapacman cunanlla chayamun. Paicunaman carangapacmi shuc talento cullquita, ishcai mushuc churanata cui” nichun cachan— nirca.
23Chaimantami Naamanca:
—Ishcai talento cullquita japilla— nishpa mañarca.
Caicunataca apaiyari nishpami, ishcai paita serviccuna apashpa Giezipac ñaupata richun, ishcai mushuc churanata, ishcai talento cullquita ishcai tulupi churashpa huatarca.
24Giezi shuc pacallaman chayashpaca, chai runacunapac maquimanta japishpami, huasipi huacaichishpa, chai runacunataca caya minchacaman nishpa cacharca.
25Chashna paicuna ña ricpimi, paica paipac amopac ñaupapi ricurirca. Chaipimi Eliseoca:
—Giezica, ¿maimantatac shamungui?— nirca.
Shina tapucpi paica:
—Canta servic ñucaca maimanpish mana rircanichu— nirca.
26Shina nicpi, Eliseoca:
—Carretamanta uricushpa, chai runa tupangapac shamucpica, ñuca shunguca ¿Manachu canhuan carca? ¿Cullquita, churanacunata, olivos chagracunata, uvas chagracunata, ovejacunata, huagracunata, servic caricunata, servic huarmicunata japina punzhami yuyanguichu?
27Can chashna ruhuashcamantaca Naamanpac lepra ungüica canpi llutaric shinami cantapish, cambac huahuacunatapish huiñaita llaquichinga— nirca.
Shina nicpi, lepra ungüi japicpi, chai runapac aichaca rasu shina yuranlla tucushpa, Eliseopac ñaupamanta llucshirca.
Who We AreWhat We EelieveWhat We Do
2025 by iamachristian.org,Inc All rights reserved.
