1 CRÓNICAS 25 - Biblia Quichua Cañar 2010

Diospac huasipi tocashpa cantaccunamanta

1Shinallatac Davidpish, soldadocunata mandaccunapish, Asafpac, Hemanpac, Jedutunpac huahua huahuacunataca Diosta servichunmi chicanyachirca. Paicunataca arpapi, salteriopi, platillopi tocashpa, Dios ima nishcata huillachunmi churarca. Diosta servingapac quillcarishca allita entendic runacunaca:

2Asafpac churicunamantaca: Zacur, José, Netanías, Asarelami carca. Paicunataca Asafmi mandacurca. Paimi jatun mandac mandacpi, Dios ima nishcata huillac carca.

3Jedutunpac sucta churicunaca: Gedalías, Zeri, Jesaías, Simei, Hasabías, shinallatac Matatiasmi carca. Paicunataca, paicunapac taita Jedutunmi arpapi tocashpa, Mandac Diosta allimari cangui nishpa, Dios ima nishcata huillashpa pushacurca.

4Hemanpac churicunaca: Buquías, Matanías, Uziel, Sebuel, Jeremot, Ananías, Hanani, Eliata, Gidalti, Romamti-ezer, Josbecasa, Maloti, Hotir, shinallatac Mahaziotmi carca.

5Tucui paicunami Dios ricuchishcata jatun mandacman huillac, shinallatac Diosta jatunyachishpa cantac Hemanpac churicuna carca. Diosca Hemanmanca chunga chuscu churita, quimsa ushitami curca.

6Paicuna Mandac Diospac huasipi platillopi, salteriopi, arpapi tocashpa servicucpica, paicunapac taita Hemanmi yachachishpa pusharca. Asafta, Jedutunta, Hemantaca jatun mandacmi mandacurca.

7Paicunapish, paicunapac huauquicunapish Diosta servingapac alli yachacushca, ishcai patsac pusac chunga pusacmi carca.

8Chullayanacushpa Diosta servichunca yuyaccunatapish, cunan huiñaicunatapish, yachachiccunatapish, yachacuccunatapish suerteta ruhuashpami acllarca.

9Puntaniqui suerteta ruhuacpica, Asafpac churi Josemanmi urmarca. Quipa suerteca Gedaliasmanmi urmarca.

10Quimsaniqui suerteca Zacurman,

11chuscuniquica Izriman,

12pichcaniquica Netaniasman,

13suctaniquica Buquiasman,

14canchisniquica Jesarelaman,

15pusacniquica Jesahiasman,

16iscunniquica Mataniasman,

17chunganiquica Simeiman,

18chunga shucniquica Azareelman,

19chunga ishcainiquica Hasabiasman,

20chunga quimsaniquica Subaelman,

21chunga chuscuniquica Matatiasman,

22chunga pichcaniquica Jeremotman,

23chunga suctaniquica Ananiasman,

24chunga canchisniquica Josbecasaman,

25chunga pusacniquica Hananiman,

26chunga iscunniquica Malotiman,

27ishcai chunganiquica Eliataman,

28ishcai chunga shucniquica Hotirman,

29ishcai chunga ishcainiquica Gidaltiman,

30ishcai chunga quimsaniquica Mahaziotman,

31ishcai chunga chuscuniquica Romanti-ezermanmi urmarca. Tucui paicunami churicunahuan, familiacunahuan chunga ishcai carca.