NEHEMÍAS 9 - Biblia Quichua Cañar 2010

Israelcuna Mandac Diosman juchata huillashcamanta

1Chai quilla ishcai chunga chuscu punzhapimi israelcunaca llaquilla tucushpa, sharpa churanata churarishpa, allpata umapi tallishpa ayunangapac tandanacurca.

2Israelpac huahua huahuacunaca shuctac llactamanta cac gentecunamanta chicanyarishpami, paicunapac juchacunatapish, paicunapac ñaupa taitacuna mana allita ruhuashcatapish huillarcacuna.

3Chaipi shayarishpami, quimsa horascaman paicunata Mandac Dios mandashpa quillcachishcata rezashpa, cutin shuc quimsa horastaca paicunapac juchata huillashpa paicunata Mandac Diosta alli nircacuna.

4Chai quipami levitapuramanta Jesúa, Bani, Cadmiel, Sebanías, Buni, Serebías, Bani, Quenanica jatun miza jahuapi shayarishpa, paicunata Mandac Diosta caparishpa mañarcacuna.

5Levitapuramanta Jesúa, Cadmiel, Bani, Hasabnías, Serebías, Hodías, Sebanías, Petanías rimashpaca:

“¡Cancunata Mandac Diostaca,

huiñaimanta huiñaicaman,

tucui alli nishcacunamanta

ashtahuan jahuapi cac,

paipac sumaimana jatun shutita,

allimari, sumacmari cangui

ningapac shayarichic!” nirca.

6Chaipi tucui gente mañashpaca:

«Canllami Mandac Dios cangui.

Canmi jahua pachatapish,

ashtahuan jahua pachatapish,

chaipi ima tiyaccunatapish,

allpatapish, mama cuchatapish,

chaipi ima tiyaccunatapish,

ruhuashcangui.

Tucuiman causaita cushcamantami,

jahua pachapi causac angelcunaca,

cantaca allimari cangui nincuna.

7Mandac Dioslla, canmi taita

Abrahamta acllac Diosca cangui.

Caldeocunapac Ur pueblomanta

llucchishpami,

Abrahamta shutichircangui.

8Abrahampac shungutaca

canhuan alli cashcatami

ricurcangui.

Cananeocunapac, heteocunapac,

amorreocunapac, ferezeocunapac,

jebuseocunapac, gergeseocunapac

llactata, paipac huahua

huahuacunaman cungapacmi

paihuan ari nircangui.

Canca cashcatac ruhuac cashpami

chaitaca pactachircangui.

9Ñucanchic ñaupa taitacunataca

Egiptopi llaquita

causacuctami ricurcangui.

Puca Cucha patapi caparishpa

mañashcatami uyarcangui.

10Faraontapish, paita

serviccunatapish,

chai llactapi tucui

causaccunatapish,

ima ricuchinacunata,

mancharinacunata ruhuashpami

llaquichircangui.

Canca israelcunata yallita

llaquichicucta ricushpami

chashna llaquichircangui.

Chaita ruhuashpami,

tucui ricsishca tucushcangui.

11Israelcunapac ñaupapimi

mama cuchata chaupircangui.

Chai yacu chaupitaca

chaquishca allpatami pasarcacuna.

Llaquichingapac caticcunataca,

rumita yacu ucupi,

shitac shinami ucuyachircangui.

12Chashnami israelcunataca

punzhaca suni puyuhuan,

tutaca suni ninahuan

achicyachishpa,

maita rinata pusharcangui.

13Sinaí urcuman shamushpami,

jahua pachamanta rimarcangui.

Chaipimi cashcata nic yachachishcacunatapish,

mana llullac mandashcacunatapish,

allita pactachinacunatapish,

mandashcacunatapish curcangui.

14Cambaclla chicanyachishca

samana punzhatami churarcangui.

Mandashca shimicunatapish,

pactachinacunatapish,

yachachishcacunatapish canta

servic Moisestami quillcachircangui.

15Yarcachicpipish, jahua

pachamantami tandata curcangui.

Yacunayachicpipish,

rumi quingraimantami yacuta

llucchishpa ubiachircangui.

Can cushami nishpa ari nishca,

llactaman yaicushpami,

allpata japinguichic nircangui.

16Ashtahuanpish paicunapish,

ñucanchic ñaupa taitacunapish

jatun tucushpami,

can mandashcacunataca,

mana cazurcacuna.

17Mana uyashun nircacunachu,

paicunaman can sumaimanacunata

ruhuashcatapish mana yuyarircachu.

Mana cazushpa sinchi tucushpami,

cutin huatashca shina causangapac

Egiptoman cutingapac

shuc mandacta acllarcacuna.

Ashtahuanpish canca yallita cuyac,

llaquic, mana utca piñaric,

perdonac Dios cashpami,

paicunataca mana saquircangui.

18Cullquita yacuyachishpa,

shuc becita ruhuashpaca:

“Paimi Egiptomanta llucchimuc

ñucanchic Mandac Diosca” nishpami,

millanayai juchata ruhuarcacuna.

19Canca yalli cuyac cashpami,

shitashca pambapi mana saquircangui.

Punzhapi paicunata

pushac suni puyupish,

tutapi paicunata pushac,

suni ninapish mana anchurircachu.

20Cambac sumac Espirituhuanmi

paicunata yachachircangui.

Maná nishca micunapish

mana illarcachu.

Yacunayaihuan cacpipish,

yacuta curcanguimi.

21Canca shitashca pambapi,

chuscu chunga huatata

cacpipish cuidarcanguimi.

Imapish mana illarcachu,

paicunapac churanacunapish,

mana maucayarcachu.

Chaquicunapish mana

punguillircachu.

22Jatun llactacunatapish

quichushpami,

chaipi causaccunandi curcangui.

Chaimantami paicunaca jatun mandac

Sehón mandana Hesbón pueblotapish,

jatun mandac Og mandana,

Basán llactatapish japirca.

23Paicunapac huahuacunatapish

jahua pachapi tiyac lucerocuna

shinatami mirachishcangui.

Chashna ruhuashpami,

paicunapac ñaupa taitacunaman

cushami nishca llactaman,

yaicuchun pusharcangui.

24Paicunapac huahua huahuacunami

chai llactataca japirca.

Chai llactapi causac

cananeocunata atishpami,

paicuna munashcata ruhuashpa llaquichichun,

jatun mandaccunandi,

chai llactapi causaccunandi,

paicunapac maquipi churarcangui.

25Muyundita pircashca

pueblocunatapish,

alli allpacunatapish,

tucui allicunata huacaichishca,

huasicunatapish japircacunami.

Yacuta jundachina jutcucunatapish,

uvas chagracunatapish,

olivos yuracunatapish,

pucuc yuracunatapish japircacunami.

Can cuyashcamantami,

sacsacta micushpa, huirayashpa

can cuyashcamanta cushicushpa

causarcacuna.

26Ashtahuanpish paicunaca,

cantaca mana cazurcacunachu,

can mandashcatapish,

yangata ruhuashpami,

yallita piñachircacuna.

Canman cuti richun nishpa,

can ima nishcata

huillaccunatapish huañuchircacunami,

yallitami llaquichircacuna.

27Chaimantami paicunataca,

piñaccunapac maquipi churarcangui,

chaipica llaquichircacunami.

Shina llaquita apacushpami,

cantaca caparishpa mañarcacuna.

Canca jahua pachamantami uyarcangui,

yallita llaquic cashcamantami,

piñaccunapac maquimanta

quishpichingapac,

cacharichiccunata cacharcangui.

28Ashtahuanpish ña alli causacushpaca,

cutinmi cambac ñaupapi

mana allita ruhuarcacuna.

Chaimantami piñaccunapac

maquipi churarcangui.

Chashna churacpimi, paicunaca

llaquichishpa, mandashpa charirca.

Paicunaca cutinmi

canta mañarcacuna.

Jahua pachamantami uyarcangui,

can llaquic cashcamantaca,

cutinmi cacharichircangui.

29Can mandashcata pactachichun

nishpa rimacpipish,

jatun tucushpami,

mana cazurcacuna.

Can yachachishcacunatapish,

mana cazushpami, juchata ruhuarca.

Maijanpish cazuccunamanca,

chai mandashcacunami causaita cun.

Paicunaca sinchi tucushpami,

chai mandashcacunata

yangata ruhuashpa mana uyarcacuna.

30Tauca huatatami paicunataca,

mana llaquichircangui.

Cambac Espirituhuanmi,

can ima nishcata huillaccunata

huillachishpa yuyaita curcangui.

Chashna huillacpipish mana uyacpimi,

shuc llacta gentecunapac

maquipi churarcangui.

31Ashtahuanpish canca,

yallita llaquic, mana piñaric,

Dios cashpami mana tucuchircangui,

mana saquircangui.

32Cunanca ñucanchic Dioslla,

canca poderta charic,

tucuipac manchana Diosmi cangui.

Canca imatapish pactachic,

yallita llaquic Diosmi cangui.

Asiria llactata jatun mandac,

mandacushca punzhamanta,

cunan punzhacaman,

jatun mandaccunapish,

ñucanchic curacunapish,

can ima nishcata huillaccunapish,

ñucanchic ñaupa taitacunapish,

tucui can acllashcacuna llaquita,

apacushcataca ama cungaringuichu.

33Canca imatapish

cashcata ruhuashpami,

ñucanchictaca llaquichircangui.

Canca imatapish

allitami ruhuarcangui.

Ñucanchicca mana allitami

ruhuarcanchic.

34Ñucanchicta jatun

mandaccunapish, ñucanchic

curacunapish, ñucanchic

ñaupa taitacunapish,

can cushca mandashcacunataca,

mana pactachircacunachu.

Can mandashca shimicunata,

ima shina causachun

yachachishcacunata

huillacpipish, mana uyarcacunachu.

35Paicuna mandacuc llactapi

paicunaman achca allicunata,

alli allpacunata cucpipish,

cantaca mana servircacunachu.

Mana allita ruhuanatapish

mana saquircacunachu.

36Chaimantami cunanca,

serviccuna tucushcanchic.

Allpapi pucushcacunatapish,

imalla tiyashcacunatapish,

micushpa causachun,

ñucanchic ñaupa taitacunaman,

cushca llactallapitacmi,

serviccuna tucushpa causacunchic.

37Ñucanchic llactacunapi,

yallita pucushca granocunapish,

ñucanchic juchamantami,

jatun mandaccunapac tucushca.

Jatun mandaccuna cashcamantaca,

ñucanchictapish,

ñucanchic animalcunatapish,

paicuna munashcata

ruhuashpami charicun.

Chaimantami ñucanchicca yalli

llaquihuan causacunchic»

nircacuna.

Israelcuna mandashcacunatapactachingapac ari nishcamanta

38Tucui cai llaquicunamantami, ñucanchicca pactachingapac ari nishpa quillcanchic. Chai quillcapica ñucanchic mandaccuna, levitacuna, curacunami firmancuna.