ISAÍAS 61 - Biblia Quichua Cañar 2010

Sión llactata quishpichinamanta

1Mandac Diosmi ñucataca

aceitehuan cahuirca.

Chaimantami paipac Espíritu

ñucapica causan.

Ñucataca llaquilla causaccunaman

alli huillaita huillachun,

shungu paquirishcacunata ayudachun,

prezumanta llucchinata huillachun,

carcelpi tiyacuccunaman

paicuna llucshina chayamucushcata

huillachunmi cacharca.

2Mandac Dios quishpichina huata

chayamucushcatapish,

ñucanchic Dios llaquichina

punzha chayamucushcata

huillachunpish,

shinallatac llaquilla causaccunata

cushichichunpishmi cacharca.

3Sión llactapi llaquilla causaccuna

uchupahuan cahuirishca

canapac randica,

corona churashca cachun,

llaquilla canapac randica,

cushicuihuan cachun,

shungupi llaquilla canapac randica,

jahualla churanata churaric shina,

cushilla cachunmi huillac cacharca.

Paicunaca Mandac Dios

sumaimana cashcata ricuchingapacmi,

pai tarpushca encina yura shina

cangacuna.

4Ñaupa huatacunapi

tigrachishca pircacunatami

cutinllatac allichinga.

Tauca huatacunata tigrashpa,

llaquinayaita siricuc

huasicunatami cutin allichinga.

5Shuc llactamanta runacunami

cancunapac ovejacunataca michinga.

Mana ricsishca runacunami

cancunapac pambacunapica

uvas chagrata ruhuanga.

6Cancunaca Mandac Diospac

curacuna, ñucanchic Diosta serviccuna

nishcami canguichic.

Jatun llactacunapi causaccuna

ima charishcacunatami micunguichic.

Paicuna ima sumac charishcacunahuanmi

alli nishca canguichic.

7Yallita pingaichishca,

mana alli nishca canapac randica,

ishcai cutin yalli herenciatami

japinguichic.

Pingaichishca canapac randica,

chai herenciamantami

yallita cushicunguichic.

Cancunapac llactapica

chai herenciatapish japishpami,

huiñaita cushilla canguichic.

8Mandac Diosca:

«Ñucaca cashcata ruhuachunmi

munani.

Shuhuashpa, ñucaman cushpa,

tucui rupachiccunataca

mana ricunayachinichu.

Allita ruhuaccunamanca

allitami cusha.

Paicunahuanca huiñaipacmi

ari ninacusha.

9Paicunapac huahua huahuacunapish,

retoñac shina llucshishca

huahuacunapish llactacunapac

ricsiscami canga.

Paicunata ricuccunaca

“Mandac Dios ñuca bendiciashca

huahua huahuacunami”

ningacunami» ninmi.

10Mandac Dios-huanmi

yallita cushicusha.

Ñuca Dios-huanmi

tucui almahuan cushicusha.

Paica churanata churachic shinami

quishpichirca.

Jahualla churanata churachic shinami,

cashcata ruhuarca.

Novioman shinami sumacta churachirca.

Noviaman shinami

sumac curita churachirca.

11Mandac Diosca allpapi huiñac

yura shina,

huertapi muyu urmashpa,

llucshic shinami

cashcata ruhuanatapish,

alli nishca canatapish tucui

llactacunapi ricuchinga.