JEREMÍAS 31 - Biblia Quichua Cañar 2010

1Mandac Diosca: «Chai huatacunapica ñucaca tucui Israel aillucunapac Diosmi casha. Paicunaca ñuca acllashcacunami canga» ninmi.

2Mandac Diosca:

«Jatun macanacuipi mana huañushca

israelcuna samanata mashcashpa,

shitashca pambata ricucpimi,

ñuca cuyaita ricuchircani.

3Ñuca utca huatacunapi

ricurishpaca:

“Cantaca jaicapi mana tucuri

cuyaihuanmi cuyani.

Chaimantami ashtahuan llaquini.

4Carihuan manarac chayarishca

soltera shina Israel llactalla,

cambac llactata cutin shayachishami.

Cutin allichirishpami panderohuan

cushicushpa, danzashpa llucshingui.

5Cutinllatacmi Samaria urcupica

uvasta tarpungui.

Uvasta tarpushpaca,

pucuchishpa cushicunguimi.

6Cuidaccuna Efraín urcupi:

‘¡Mandac Diospacman jacuchic!

¡Sión urcuman huichai rishunchic!’

nishpa, caparina punzhacuna

chayamungami” nircani» ninmi.

7Mandac Diosca: «Jacobomanta

cushicushpa caparichicyari.

Llactacunapac uma shina

llactata alli nichicyari.

Sinchita caparishpa:

“¡Mandac Dioslla,

can acllashcapuramanta

saquirishca israelcunata

quishpichiyari!” nichicyari.

8Ñucaca jahua lado llactamanta,

shinallatac tucui cai pacha

tucuri llactamantami tandachisha.

Chashna tandachicpimi,

ñahui mana ricuccunapish,

suchucunapish, huicsayuc huarmicunapish,

llullu huahuayuc huarmicunapish

caiman cutin tandanacumunga.

9Paicunaca huacashpami cutimunga.

Ñucaca sumac yacu pugru pambata,

maita mana mitcaripac sumac ñantami

cushichishpa pushamusha.

Ñucami israelcunapac taita cani.

Efrainca ñuca punta churimi.

10¡Llactapi causaccunalla,

Mandac Dios ñuca rimashcata uyashpa,

mama cucha patapi tiyac

caru llactacunapi huillaichic!

Chashna huillashpaca:

“Israelcunata llucchishpa,

caita chaita cachac Diosca

cutinmi tandachishpa,

ovejacunata michic shina

cuidanga” nichicyari.

11Mandac Dios ñucami Jacobopac

huahuacunataca quishpichircani.

Sinchi runapac maquimantami

cacharichircani.

12Paicunaca Sión urcuman rishpami,

yallita cushicushpa cantanga.

Ñuca bendiciashca micunata,

vinota, aceiteta, ovejacunata

japingapacmi callpamunga.

Paicunaca parcurishca huerta shinami

cushilla causanga.

Jaicapi ima llaqui mana tucungachu.

13Carihuan mana chayarishca

solteraca mosocunahuan,

yuyaccunahuanmi danzashpa

cushicungami.

Huacanapac randica cushicungami.

Nanaihuan canapac randica samaringami.

14Curacunatapish,

ñuca acllashcacunatapish

alli micunata cushpami

cushichisha» ninmi.

15Mandac Diosca: «Ramá llactapi

llaquihuan caparishpa

huacashcami uyarirca.

Chaipica Raquelmi paipac huahuacuna

huañushcamanta yallita huacacurca.

Pipish mana cushichi pudircachu»

ninmi.

16Mandac Diosca:

«Ama ashtahuan huacaichu,

cambac ñahuimanta huiquita pichaiyari.

Can llaquita apashcamantaca

allitami cusha,

piñaccunapac llactamantaca

cutimungacunami.

17Cambac huahuacunamanca

alli causai tiyangami.

Quiquin llactamanmi cutimunga.

18Efraín llactataca:

“Canmi ñucata macashpa

llaquichircangui.

Piña huagrata shinami

llaquichichun cacharcangui.

Cambacman ñucaca cutisha ninimi.

Canmi ñuca Mandac Dios cangui.

19Canmanta caruyashca quipaca

yallitami llaquirini.

Ñucaca mana allita ruhuashcata

yuyarishpami shungupi huactarircani.

Huambrarac cashpa juchata

ruhuashcamantami

yallita pingaihuan cani.

Chaitaca manatac cungarishachu”

nishpa, huacactami uyarcani.

20¿Manachu Efrainca ñuca

cuyashca huahua?

¿Manachu ñuca cushicuna huahua?

Punzhantami paita yuyaricunilla.

Ñuca paita yuyarishpaca

shungumantami llaquirini.

Paitaca llaquishatacmi» nini.

Chaitaca Mandac Dios ñucami nini.

21Mandac Diosca: «Can rishca ñanta

unanchishpa saquingui.

Rishca ñanta yuyaringui.

Carihuan manarac chayarishca

soltera shina Israel-lla,

can maita rishca ñanllatatac

cai llactaman cutimui.

22Mana cazuc soltera shina

Israel-lla, ¿ima horascamantac

caita chaita puricunguilla?

Mandac Dios ñucami

cai llactapica mushucta ruhuasha.

Huarmica cusapac ladomanmi

shamunga» ninmi.

23Israelcunapac tucuita Mandac Diosca: «Gentecunata prezumanta ñuca llucchimucpica, Judá llactapish, chai llactapi tiyac llactacunapish: “¡Cashcata ruhuashpa, causana llactalla, Diospac urculla, Mandac Dios bendiciachun!” ningami.

24Chaipimi Judá llactapish, tucui llactacunapish, tarpuccunapish, michiccunapish causanga.

25Shaicushcapac shungutaca sinchiyachishami. Llaquilla causaccunapac almatapish cushichishami» ninmi.

26Riccharishpaca ñuca muscushca sumac cashcatami ricurcani.

Israelcunahuan mushuc ari ninacuitaruhuashcamanta

27Mandac Diosca: «Israel llactapipish, Judá llactapipish, gentecunata, animalcunata achcata mirachina punzhacunami shamugrin.

28Ima shinami paicunata sapimanta pilac shina anchuchinata, urmachinata, llaquichinata, tucui chingachinata munarcani. Chashnallatacmi allichishpa shayachinata, tarpuc shina cutin callarichinata munani.

29Chai punzhacunapica: “Taitacuna jayac uvasta micushcamantami, huahuacunaca quiruta nanachin” ña mana ashtahuan ningachu.

30Ashtahuanpish maijan jayac uvasta micushpaca, paillatacmi quiruta nanachinga. Shinaca maijanpish quiquin juchamantami huañunga» ninmi.

31Mandac Diosca: «Israel llactapi, Judá llactapi causaccunahuan ari nina punzhacunami shamugrin.

32Cai ari nishcaca mana paicunapac taitacunata Egiptomanta maquimanta aisashpa, llucchicui punzhapi shinachu canga. Chai ari nishcataca ñuca paicunapac cusa cacpipish, yangapi churashpami mana cazurca.

33Shamuc punzhacunapica israelcunahuan ari nishcaca cashnami canga: Ñuca mandashcataca paicunapac shungupi churashpami, paicunapac yuyaipi quillcasha. Ñucaca paicunapac Diosmi casha, paicunaca ñuca acllashcacunami canga.

34Paicunapurapish, huauquicunapurapish: “Mandac Diosta ricsichic” nishpaca, ña mana yachachingachu. Ñucataca uchillamanta callarishpa, yuyaccunacamanmi ricsinga. Paicunapac mana allita ruhuashcataca perdonashami. Paicunapac juchataca mana ashtahuan yuyarishachu» ninmi.

35Punzhanta achicyachic intita

tutanta achicyachic quillata,

lucerocunata churac,

mama cuchata cuyuchic

tucuita Mandac Diosca:

36«Ñuca mandashcacuna ñuca

ñaupapi chingaricpica,

israelcunapac huahua huahuacunapish

cai llactapi huiñaita chingaringami.

37Maijanpish jahua pachata,

cai pachata maicaman cashcata

medicpica, ñucapish israelcunataca

tucui paicuna mana allita

ruhuashcamanta mana chasquimanchu.

Chaitaca Mandac Dios ñucami nini.

38Jerusalentaca ñucapaclla cachun, Hananeel torremanta, esquinapi tiyac pungucaman allichina punzhacunami shamugrin.

39Chai pungumantaca Gareb lomacaman, chaimantaca muyushpami Goa pambacaman cordelhuan medinga.

40Huañushcacunata shitana pambapish, uchupata shitana pambapish, Cedrón yacu pata pambacaman, inti llucshina ladopi tiyac esquinapi cac caballocuna yaicuna pungucamanmi, Mandac Dios ñucapaclla chicanyachishca canga. Paicunataca jaicapi mana llucchishpa cachangachu. Mana tucuchingachu» ninmi.