DEUTERONOMIO 10 - Biblia Quichua Cañar 2010

Cutin Dios-huan ari ninacuita ruhuashcamanta(Ex 34.1-10)

1Chai punzhapica Mandac Diosca: “Puntapi ruhuashca shinallatac ishcai tabla rumita ruhuashpa, ñucapacman urcuman shamui. Shinallatac caspimanta Arcatapish ruhuangui.

2Puntapi can paquishca rumipi quillcashca shinallatacmi chai rumipi quillcasha. Chai rumitaca caspimanta ruhuashca Arcapi huacaichingui” nirca.

3Chaimantami ñucaca acacia caspimanta Arcata ruhuashpa, puntapi ruhuashca shinallatac ishcai tabla rumitapish ruhuashpa, urcuman rircani.

4Puntapi quillcashca shinallatacmi chai ishcai tabla rumipi cancuna tandanacushca cacpi, nina rupacuc urcu chaupimanta rimashca chunga mandashcacunata quillcarca. Mandac Diosca chaitaca ñucamanmi curca.

5Urcumanta uraiman cutishpami, chai rumicunataca ñuca ruhuashca Arcapi churarcani. Chaipimi Mandac Dios mandashca shinallatac cunancaman tiyacun.

6(Chai quipami israelcunaca Beerot-bene-jaacán pambamantaca Moseraman rirca. Chaipi Aarón huañucpimi, enterrarca. Paipac randica paipac churi Eleazarmi cura tucurca.

7Chaimantaca Gudgodaman, cutin chaimantaca yacucuna tucyacuc Jotbata llactamanmi rirca.

8Chai huatacunapimi Mandac Dios ari nishca quillcata huacaichina Arcata apachun, Levipac aillucunata chicanyachirca. Mandac Diosca paipac ñaupapi servichun, paipac shutita cunan punzhacaman alli nichunmi chicanyachirca.

9Chaimantami levitacunaca paicunapac huauquicunapurapica imata mana japinga. Mandac Dios nishca shinami, paicuna japinaca Mandac Dios can.)

10Punta punzhacunapi shinallatacmi ñucaca chuscu chunga punzhata, chuscu chunga tutata urcupi carcani. Mandac Dios cutinllatac ñuca mañashcata uyashpami, cancunataca mana tucuchirca.

11Mandac Diosca: “Cunanca jatari, ñuca ñaupa taitacunaman cungapac ari nishca llactata japingapac ñaupashpa ri” nirca.

Mandac Diosllata cazunamanta

12Israelcunalla, ¿imatatac Mandac Diosca ruhuachun nin? Mandac Diosca paita manchashpa, pai munashca shina causachun, tucui shunguhuan, tucui almahuan, paillata cuyachun,

13cunan ñuca huillashca mandashcacunatapish, pactachinacunatapish, yachachishcatapish cazuchunmi munan.

14Riquichic, jahua pachapish, ashtahuan jahuaman cac pachapish, cai pachapish, chaipi tucui tiyaccunapish Mandac Diospacmi can.

15Shina cacpipish, Mandac Diosca cancunapac taitacunata cuyarcami. Chaimantami paicunapac huahua huahuacunata tucui llactacunamanta acllarca. Chai acllashcacunaca cancunami canguichic.

16Chaimantami circuncisionta ruhuashpa, cancunapac shungumanta asha carata pitic shina, tucui millai yuyaita anchuchina canguichic. Ama sinchi shungu caichicchu.

17Mandac Diosca tucui dioscunapac Diosmi, mandaccunapacpish Mandacmi. Mandac Diosca manchana poderyucmi. Mana pitapish ñahuita ricushpa llaquichic Dioschu. Pimantapish mana imata japicchu.

18Paica taita mama illaccunamanpish, viudacunamanpish cashcata ruhuacmi. Shuctac llactamanta shamushpa causaccunamanpish caracmi, churachicmi.

19Cancunaca Egiptopica pozashcallami carcanguichic. Chaimantami shuctac llactamanta caccunataca cuyana canguichic.

20Mandac Diosta manchanguichic, paita servinguichic, paillata catinguichic, paillata servinguichic. Paipac shutipi ima ari nina cacpica, ari ninguichic.

21Cancuna alli nina Diosmi. Paica cancunamantami jatun mancharinacunata ruhuarca. Chaitaca cancunapac ñahuihuanmi ricurcanguichic. Paica cancunapac Diosmi.

22Cancunapac taitacunaca canchis chunga gentehuanmi Egiptoman rirca. Cunanca, Mandac Diosca jahua pachapi tiyac lucerocunata shinami achcata mirachishca.