JEREMÍAS 27 - Biblia Quichua Cañar 2010

Yugohuan chimbapurashcamanta

1Josiaspac churi jatun mandac Sedequías Judá llactata punta huatata mandacucpimi, Mandac Diosca Jeremiastaca:

2«Yugota coyundacunandi ruhuashpa, cambac cungapi huatari.

3Chai quipaca Edom, Moab, Amón, Tiro, Sidón llactacunata jatun mandaccunapacman Judá llactata jatun mandac Sedequiasta Jerusalenpi ricungapac shamuccunapuramanta shucta huillachun cachai.

4Israelcunapac tucuita Mandac Diosca chai jatun mandaccunataca:

5“Ñuca poderhuanmi cai pachatapish, runacunatapish, animalcunatapish, allpapi ima tiyaccunatapish ruhuarcani. Chaitaca maijan ñuca munashcamanmi cuni.

6Cunanca, tucui cai llactacunatami Babilonia llactata jatun mandac ñucata servic Nabucodonosorpac maquipi churarcani. Sacha animalcunacamanmi paita servichun paipac maquipi churani.

7Tucui llactacunami paita, paipac churita, paipac nietota servishpa causanga. Babilonia llactaman yalli llaqui huatacuna chayamungacamanmi chashna causanga. Quipaca Babiloniapi causaccunapish shuctac llactacunata jatun mandaccunatami servishpa causanga.

8Maijan llacta, mana cashpaca maijan jatun mandac Babilonia llactata jatun mandac Nabucodonosorta yugota cungapi churashca shina, mana servisha nictaca jatun macanacuipi yarcaihuan, yalli ungüihuanmi llaquichisha. Chashnami Nabucodonosorpac maquipi yaicungacaman llaquichisha.

9Chaimanta huillaccunatapish, yachaccunatapish, muscuccunatapish, brujocunatapish, huañushcata cayaccunatapish ama cazunguichicchu. Paicunaca: Babilonia llactata jatun mandactaca mana servinachu canguichic ninmi.

10Paicunaca cancunapac llactamanta ñuca cancunata llucchishpa cachashpa, huañuchichunmi chashna llullashpa huillan.

11Ashtahuanpish Babilonia llactata jatun mandacpac yugota cungapi churashca shina, paita serviccunataca chai llactallapitacmi tarpushpa causachun saquisha. Chaitaca Mandac Dios ñucami nini” ninmi ningui» nirca.

12Judá llactata jatun mandac Sedequiasmanpish huillashpaca: «Babilonia llactata jatun mandacpac yugota cungapi churashca shina paitapish, paipac gentecunatapish servishpa causaichic. Chashna servishpaca causanguichicmi.

13¿Ima nishpatac jatun macanacuipi yarcaihuan, jatun ungüihuan canpish, cambac gentecunapish huañunata munanguichic? Mandac Dios nishca shina Babilonia llactata jatun mandacta mana servishcamantaca chashnami huañunga.

14Huillaccuna: “Babilonia llactata jatun mandactaca mana servinachu canguichic” nishpa, huillashcataca ama uyanguichicchu. Paicunaca llullashpami huillan.

15Paicunaca manapish ñuca cachacpimi, llullashpa ñuca shutipi huillan. Cancunatapish, cancunaman huillaccunatapish caimanta ñuca llucchishpa cachashpa huañuchichunmi chashnaca huillan» ninmi.

16Curacunamanpish, tucui gentecunamanpish huillashpaca: «Mandac Diosca: Chai huillaccunataca ama uyanguichicchu. Paicunaca: “Diospac huasipi ima charishcacunataca ñami Babilonia llactamanta cutichimunga” nishpami, llullashpa huillan.

17Paicunataca ama uyanguichicchu. Chaipac randica, Babilonia llactata jatun mandacta servishpa causanguichic. Chashna servishpaca causanguichicmi. ¿Ima nishpatac cai llactaca llaquinayaita shitashca saquiringa?

18Paicuna ñuca ima nishcata huillaccuna cashpaca, ñuca rimachicpica, ñucapac huasipi, Judá llactata jatun mandacpac huasipi, Jerusalenpi saquirishca ima charishcacunata Babilonia llactaman ama apachun, tucuita Mandac Dios ñucata mañachun.

19Cai llactapi saquirishca jatun pilarcunamantapish, yacuta tandana pailacunamantapish, caishuc uchilla yacu huacaichinacunamantapish, shuctac charishcacunamantapish chashnami nin.

20Babilonia llactata jatun mandac Nabucodonosorca Joacimpac churi Judá llactata jatun mandac Joaquintapish, Judá llactapi, Jerusalenpi causac mandaccunatapish Babiloniaman prezu apacushpaca, caicunataca mana aparcachu.

21Mandac Diospac huasipi, Judá llactata jatun mandacpac huasipi, Jerusalenpi ima charishcacuna puchushcamantaca israelcunapac tucuita Mandac Diosca:

22Babilonia llactamanmi apashca canga. Ñucallatac ricungapac rishpa, cutichimuna punzhacamanmi chaipi canga. Chai quipaca ñucallatacmi cai pushtullapitac churasha. Chaitaca Mandac Dios ñucami nini» ninmi.