DEUTERONOMIO 30 - Biblia Quichua Cañar 2010

Diosman cutirinamanta

1Ñuca huillashca shina, tucui llaquicuna pactashca quipa, maldiciashca quipa, bendiciashca quipaca Mandac Dios llucchishpa cachashcacunaca maipi cashpapish caita yuyarishpa llaquiringuichic.

2Cancunapish, cancunapac churicunapish ñuca mandashca shina, tucui shunguhuan, tucui almahuan Mandac Diospacman cutiricpica,

3Mandac Diospish prezumanta cutichimungami. Chashnami Mandac Diosca llaquishpa, mai llactacunaman pai llucchishpa cachashca cashpapish cutinllatac tandachimunga.

4Cai pachapi tiyac ashtahuan caru llactamantapish Mandac Diosca mashcashpa tandachimungami.

5Chashnami cancunapac ñaupa taitacuna japishca llactaman cutichimunga. Chai llactaca cancunapacmi canga. Chaipica, cancunaman allita ruhuashpami huahuacunatapish ñaupa taitacunamanta ashtahuan yallita mirachinga.

6Mandac Diosllatacmi paita tucui almahuan, tucui shunguhuan cuyachun, cancunapac shungutapish, cancunapac huahuacunapac shungutapish pitic shina ruhuanga. Chai shina paita cuyashpa, chai llactapi causachunmi chashnaca ruhuanga.

7Mandac Diosca cancunata piñashpa, mana ricunayachishpa llaquichiccunatami llaquichinga.

8Ashtahuanpish cancunaca, Mandac Diosman cutirishpami pai rimashcata uyashpa, cai ñuca nishca mandashcacunata pactachishpa causanguichic.

9Shina causacpimi, Mandac Diosca tucui cancunapac maqui ruhuashcatapish, huahuacunatapish, cancunapac animal mirashcatapish, tucui allpa pucushcatapish achcata mirachinga. Mandac Diosca ñaupa taitacunahuan cushicushca shinallatacmi cancunahuanpish allita ruhuashpa cushicunga.

10Mandac Dios nishcata uyashpa, mandashcacunata quillcashca libropi tiyacuc mandashcacunatapish, pactachinacunatapish cazushpami chashna cushicunga.

11Cunan ñuca huillashca mandashcacunaca mana sinchichu, shinallatac mana carupichu.

12Mana jahua pachapichu. Chaipi cacpica: “Chai mandashcacunata uyashpa cazungapacca, ¿pitac jahua pachamanta apamushpa, ñucanchicman uyachingayari?” ninguichicmanmi.

13Chashnallatac mana mama cucha chimba ladopichu. Chaipi cacpica: “Chai mandashcacunata uyashpa cazungapacca, ¿pitac mama cuchata pasashpa apamushpa, ñucanchicman uyachingayari?” ninguichicmanmi.

14Ashtahuanpish cai mandashcacunaca cancunapac ladollapitacmi. Cancunapac shimillapitac, cancunapac shungullapitacmi. Cancuna pactachi pudinguichicmi.

15Cunanmi cancunapac ñaupapi causaitapish, allitapish, huañuitapish, llaquitapish churani.

16Mandac Diosta cuyachunmi chashnaca churani. Cunan ñuca huillashca mandashcacunatapish, pactachinacunatapish, yachachishcacunatapish cazunguichic. Chashna ruhuashpaca, huahuacunatapish achcata charishpami causanguichic. Mandac Diosca cancuna japishca llactapica tucui imapipish bendiciangami.

17Shina cacpipish, cancunapac shungupi Diosmanta caruyashpa, mandashcacunatapish mana cazushpa, shuctac dioscunata cungurishpa adorashpaca,

18huañunguichictacmi. Jordán yacuta pasashpa cancuna japishca llactapica mana unaita causanguichicchu.

19Cunanmi cancuna llaquita apanata ricuchichun jahua pachatapish, cai pachatapish cayani. Cancunapac ñaupapimi causaitapish, huañuitapish, bendiciontapish, maldiciontapish acllachun ricuchini. Cancunapish, cancunapac huahuacunapish acllaichic.

20Mandac Dios nishcata uyashpa, pai munashca shina causaichic. Ñaupa taita Abrahamman, Isaacman, Jacoboman cungapac ari nishca llactapi unaita causangapacmi chashna cazuna canguichic. Chashna cazushpami causaita charinguichic» nirca.