HEBREOS 9 - Biblia Quichua Cañar 2010

Jahua pachapipish, cai pachapipishDiospac huasi tiyashcamanta

1Punta ari nishcaca, cai pachapi Diosta mañana carpa huasipi imata ruhuanallatacmi huillacurca.

2Dios-huan tupana huasica cai shinami carca: Yaicushcallapica Diospaclla ucumi carca. Chaipica candeleropish, Diosman cushca tandata churana mizapishmi carca.

3Quipa jarcachishca ucuca Diospaclla chicanyachishca ucumi carca.

4Chaica, inciensota rupachina curi altarmi tiyarca. Dios-huan ari nishcata huacaichina, muyundita curimanta ruhuashca cajonpish tiyarcami. Chai cajonpica maná shuti tandapish, curimanta ruhuashca mangapish, Aaronpac huiñacuc verdinlla taunapish, Dios mandashcacunata quillcashca ishcai tabla rumipish tiyarcami.

5Chai cajón jahuapica Dios chaipi cashcata ricuchic alasyuc querubincunami tapata alas-huan pacashpa shayacurca. Cunanca caicunamanta tucuita mana yachachinachu cani.

6Chashna Diospaclla ucu allichishca cacpica, curacunami punzhanta ima ruhuana cashcata ruhuangapac yaicuc carca.

7Ashtahuanpish chai quipa ucumanca jatun mandac curallami huatapi shuc cutin yaicuc carca. Paicunaca quiquin juchamantapish, gentecuna mana yachashcamanta juchata ruhuashcamantapish animalta huañuchishca yahuarta Diosman cungapacmi yaicuc carca.

8Chaica Diospac Espiritumi, Diospaclla ucupi tiyacpica, Diospaclla chicanyachishca ucuman manarac yaicuna tiyashcata entendichirca.

9Caicunaca cunan punzhacunapi yuyaita japingapacmi. Chaica juchacunamantaca animalta Diosman cushpapish, ofrendata cushcapish quiquin yuyaipi juchayuc cashcatami yuyachin.

10Chaica micunapish, ubianapish, tucuilaya maillarinapish cuerpopac alli cashcatami ricuchin. Chai mandashcaca Dios shucta ruhuangacamanmi alli carca.

11Chashna cacpipish Apunchic Jesusca ñamari shamurca. Paica allicunata ricuc jatun mandac curami. Paica ñaupa ucuta yalli alli Diospaclla sumac ucupimi. Chaica mana cai pacha gentecuna ruhuashcachu.

12Jesucristoca mana chivocunapac, becicunapac yahuarta Diosman cungapacchu Diospaclla chicanyachishca ucuman yaicurca, ashtahuanpish paipac quiquin yahuarta ñucanchicta huiñaita juchapi huatashcamanta cacharichingapacmi shuc cutinlla yaicurca.

13Huagracunapac, chivocunapac yahuar shinallatac, altarpi becita rupachishca uchupata millaita ruhuacpac jahuapi shic-huacpi jahuallata chuyayachicpica,

14¡Apunchic Jesuspac yahuarcarin, tucuimanta yalli valishcami! Paica huiñaita causacuc Diospac Espirituhuan cashpami, ima millaita mana ruhuac cashpapish, pai quiquin Diosman curishpa huañurca. Paipac yahuarmi millai yuyaicunahuan mana allita ruhuashpa, causacucpi, causacuc Diosta servicta ruhuan.

15Jesucristoca gentecunahuan punta ari nishcahuan juchapi shina causacucpimi mushuc ari ninacuita ruhuarca. Chai shina cacharichishpami Dios cayashcacuna pai cusha nishcata huiñaita chasquichun ruhuarca.

16Testamento quillcashca tiyacpica, chai testamentota cuc huañucpimi valin.

17Testamentota cuc manarac huañucpica, chai testamentoca mana valinchu, ashtahuanpish huañushca quipami, chaica valin.

18Chaimantami ñaupa ari nishcapish animal yahuarta jichashpa callarirca.

19Moisesmi israelcunaman Dios mandashcataca huillarca. Chaimantami puca millmatapish, hisopo ramatapish, becicunapac, chivocunapac yahuarhuan, yacuhuan chapushpa, jucuchishpa Dios mandashca quillcapi, tucui israelcunapac jahuapi chiraparca.

20Chashna chirapashpaca: “Cai yahuarmi Dios mandashca ari nishca yahuarca” nirca.

21Dios-huan tupana huasipipish, Diosta yuyarina imallacunapipish chiraparcami.

22Mandashcapi nishca shinaca, animalpac yahuarmi juchacunata pichana carca. Animalpac yahuarta jichashpallami, juchata perdonana carca.

Cristo huañushpa, juchacunata anchuchishcamanta

23Tucui chaipi tiyaccunaca jahua pachapi ima tiyacucman ricchami. Chaimantami chuyayachin can. Ashtahuanpish jahua pachapi tiyaccunamantacarin, animalta yahuartapish yallimi cuna can.

24Chaica Apunchic Jesusca mana gentecunalla ruhuashca carpa huasimanchu yaicurca. Ashtahuanpish jahua pacha Diospac ñaupamanmi yaicurca.

25Jatun mandac curaca huatantami animal yahuarta Diosman cungapac Diospaclla chicanyachishca ucuman yaicun. Ashtahuanpish Jesusca mana cutin cutin yahuarta cungapacchu jahua pachamanca yaicurca.

26Chashna ruhuana cacpica, Apunchic Jesusca cai pachata ruhuashca punzhamanta pacha, tauca cutinmi huañuna canman carca. Ashtahuanpish Apunchic Jesusca cunan punzhacunapica, shuc cutinllami tucui gentecunapac juchacunata anchuchingapac, pai quiquinllatac Diosman curishpa huañurca.

27Shinallatac tucuimi shuc cutinlla huañuna canchic. Chai quipami, Dios taripana punzhaca shamunga.

28Apunchic Jesusca achca gentecunapac juchacunata pichangapacmi, shuc cutinlla pai quiquinllatac huañurca. Quipataca ña mana juchacunata anchuchingapacchu shamunga, ashtahuanpish paita shuyacuccunata quishpichingapacmi shamunga.