ROMANOS 7 - Biblia Quichua Cañar 2010

Cazaranahuan chimbapurashpa yachachishcamanta

1Cuyashca criccuna, Moisés mandashcacunaca shuc runa causacucllapimi, mandan. Chaitaca allimi yachanguichic.

2Cazarashca huarmica cusa causacucllapimi mandashcapi nishca shina, cusapac can. Ña cusa huañucpica, mandashcapi nishca shinami, mana cusapac saquirin.

3Chaimanta shuc huarmi cusa causacucpirac shuctac carihuan chayarinacushpaca huainayanmi. Ashtahuanpish cusa huañucpica, mandashcapi nishca shinami mana cusapac can. Shuctac carihuan cazarashpapish mana huainayanchu.

4Cuyashca criccuna, chai shinallatacmi mana mandashcacuna mandashca causangapac Cristohuan pacta huañushca canguichic. Cunanca Diospacta ruhuangapacmi, huañushcacunapuramanta causaric Jesucristopac canguichic.

5Ñucanchic shungupi juchata ruhuana munai yaicucpica, mandashcacunami millaita ruhuachishpa, huañuiman aparca.

6Cunanca huatashpa charicuc mandashcacunamanta cacharirishpami, chai mandashcacunapacca huañushca shina canchic. Shinami Diospac Espíritu mushuc yuyaita cucpi, Diosta servishpa causacunchic. Ñaupa quillcashca mandashcacuna causanamanta cacharichishcami canchic.

Quiquinpi tiyac juchamanta

7Shina cacpica, ¿imatatac nishun? ¿Mandashcacunaca juchami nishunchu? ¡Mana chashnachu! Shina cacpipish, mandashcacuna mana tiyashca cacpica, ñucaca imami jucha cashcata, mana yachaimanchu carcani. Mandashcacunapi «Ama shucpac charishcata munanguichu» mana nicushca cacpica, shucpac charishcata munana jucha cashcataca mana yachaimanchu carcani.

8Juchaca mandashcacuna tiyashcamantami ñuca yuyaipi yaicushpa, mana allicunata ruhuachi callarirca. Mandashcacuna mana tiyacpica, juchaca huañushca shinami canman.

9Ñaupaca ima mandashcacunata mana yachashpami causarcani. Mandashcacunata ñuca yachacpimi, juchaca ñucapi ricurirca. Shinami huañurcani.

10Chai mandashcacunaca causaita cunapac randica, ñucataca huañuimanmi aparca.

11Juchaca mandashcacuna tiyashcamantami ñucata pandachirca. Chai mandashcacunamantami huañurcani.

12Shinaca, mandashcacunaca Dios cushcami. Mandashcacunaca allimi, cashcata nicmi, Dios cachashcami.

13¿Chai shina, alli cashca jahuachu huañuiman aparca? ¡Mana chashnachu! Chai mandashcacunaca alli cashpami, juchata ruhuana mana alli cashcata ricuchirca. Chai mandashcacunami ñucataca huañuchirca. Chai mandashcacunami juchaca yalli mana alli cashcata ricuchin.

14Mandashcacunaca Diosmanta cashcatami yachanchic. Shina cashpapish, ñucaca aichayuc runallami cani. Chaimantami juchapi huatashca shina cani.

15Ñucaca, ñuca munashcataca mana ruhuanichu, ashtahuanpish mana munashcataracmi ruhuani. Chaimantami ñuca ruhuashcacunataca mana entendini.

16Mana ruhuasha nicushcata ruhuashpami, mandashcacuna alli cashcata yachac chayani.

17Shinaca, mana ñucachu juchata ruhuacuni, ashtahuanpish ñucapi tiyac juchami ruhuachicun.

18Ñucaca juchayuc runa cashcamantaca, ñucapi ima alli ruhuana yuyai mana tiyashcatami yachani. Ima allita ruhuasha nishpapish, mana ruhuai pudinichu.

19Allita ruhuasha nicushcataca mana ruhuanichu, ashtahuanpish mana ruhuasha nicushcataracmi ruhuani.

20Ñuca mana ruhuasha nicushcata ruhuashpaca, mana ñucachu ruhuani, ashtahuanpish ñucapi tiyac juchami ruhuachicun.

21Ñuca allita ruhuasha nicushpapish, ñucapi tiyac juchaca mana allicunatarac ruhuachic cashcatami yachac chayani.

22Ñuca shungupica Diospac mandashcacunahuanmi yallita cushicuni.

23Ñuca cuerpopi tiyac munai, ñuca yuyai allita ruhuasha nicucpi, jarcac cashcatami yachac chayani. Chai munaimi juchapi huatashca shina charicun.

24¡Aij, ñucalla! Ñuca cuerpopi tiyac munai huañuiman apacucmantaca, ¿pitac cacharichinga?

25Diosllami Apunchic Jesucristomanta chai huañuimanta cacharichinga. Chaimantami paitaca pagui nini. Ñuca yuyaihuanca Dios mandashcacunatami pactachinata munani. Cutin ñuca cuerpopi tiyac munaihuanca, jucha mandashcatami ruhuacuni.