2 REYES 15 - Biblia Quichua Cañar 2010

Azarías Judá llactata mandashcamanta(2 Cr 26.3-5,16-23)

1Israel llactata jatun mandac Jeroboam ishcai chunga canchis huatata mandacucpimi, Amasiaspac churi Azariasca Judá llactata mandai callarirca.

2Azariasca chunga sucta huatata charishpami mandai callarirca. Paica pichca chunga ishcai huatatami Jerusalenpi mandarca. Paipac mamaca Jerusalenmanta Jecoliasmi carca.

3Azariasca Mandac Diospac ñaupapica, paipac taita Amasías shinallatacmi allita ruhuashpa causarca.

4Chashna cashpapish lomacunapi tiyac altarcunataca mana anchuchircachu. Chai altarcunapimi gentecunaca animalcunata huañuchishpa, inciensota rupachishpa catircacuna.

5Mandac Dios jatun mandacta llaquichicpimi, paica huañuna punzhacaman lepra ungüihuan huasipi chicanyachishca causarca. Mandana huasipica jatun mandacpac churi Jotammi gentecunata mandacurca.

6Azariaspac shuctac ruhuashcacunapish, imacunallata ruhuashcacunapish, Judá llactata jatun mandaccuna imata ruhuashcacunata quillcashcapimi tiyacun.

7Azarías huañushpa, paipac ñaupa taitacunahuan tandanacugricpica, paipac ñaupa taitacunata enterrashcallapitacmi Davidpac pueblopi enterrarca. Paipac churi Jotammi paipac randi mandarca.

Zacarías Israel llactata mandashcamanta

8Judá llactata jatun mandac Azarías quimsa chunga pusac huatata mandacucpimi, Jeroboampac churi Zacariasca mandai callarirca. Paica sucta quillatami Samaria pueblopi mandarca.

9Paica ñaupa taitacuna shinallatacmi Mandac Diospac ñaupapi mana allita ruhuarca. Paica Nabatpac churi Jeroboam israelcunata juchacunata ruhuachishca shinallatacmi ruhuashpa, Mandac Diospac ñaupapica catirca.

10Zacariastaca Jabespac churi Salummi pacalla parlanacushpa, tucui gentecunapac ñaupapi chugrichishpa huañuchirca. Chashna huañuchishpami, paipac randi mandarca.

11Zacarías shuctac ruhuashcacunapish Israel llactata mandaccuna imata ruhuashcacunata quillcashcapimi tiyacun.

12Mandac Dios Jehuta rimashpaca: «Cambac huahuacunami chuscu miranacuicaman Israel llactata mandanapi tiyaringa» nirca. Chaica chashnami tucurca.

Salum Israel llactata mandashcamanta

13Judá llactata jatun mandac Azarías quimsa chunga iscun huatata mandacucpimi, Jabespac churi Salumca Israel llactata mandai callarirca. Paica shuc quillatami Samaria pueblopi mandarca.

14Gadipac churi Menahemca Tirsa pueblomanta Samaria puebloman huichai rishpami, Jabespac churi Salumtaca Samaria pueblopi chugrichishpa huañuchirca. Chashna huañuchishpami, paipac randi mandarca.

15Salumpac shuctac ruhuashcacunapish, Zacariasta huañuchingapac shuccunahuan pacalla parlanacushcapish, Israel llactata mandaccuna imata ruhuashcacunata quillcashcapimi tiyacun.

16Manahemca Tifsa pueblopi causac tucui gentecunata huañuchishpami, chaipi ima tiyashcacunatapish aparca. Chai pueblo punguta mana pascashcamantami, Tirsa pueblomanta callarishpaca, Tifsa pueblo muyundipi tiyac pueblocunatapish quichushpa chaipi causac tucui huicsayuc huarmicunatapish huicsata pascashpa huañuchirca.

Manahem Israel llactata mandashcamanta

17Judá llactata jatun mandac Azarías quimsa chunga iscun huatata mandacucpimi, Gadipac churi Manahemca Israel llactata mandai callarirca. Paica chunga huatatami Samaria pueblopi mandarca.

18Mandac Diospac ñaupapica mana allita ruhuashpami causarca. Nabatpac churi Jeroboam israelcunata juchata ruhuachishca shinallatacmi punzhanta juchallishpa catirca.

19Chai punzhacunami Asiria llactata jatun mandac Pulca Israel llactahuan macanacungapac shamurca. Chaimantami Manahemca pai mandanata sinchiyachingapac jatun mandac Pulman shuc huaranga talento cullquita curca.

20Pulman cungapacca Manahemca Israel llacta yallita charic gentecunatami cada shuc pichca chunga talento cullquita cuchun mandarca. Chai cullquita cucpimi, Siria llactata jatun mandacca Israel llactamanta utca rirca.

21Manahempac shuctac ruhuashcacunapish, imacunallata ruhuashcacunapish, Israel llactata mandaccuna imata ruhuashcacunata quillcashcapimi tiyacun.

22Manahem huañushpa, paipac ñaupa taitacunahuan tandanacugricpica, paipac churi Pekaiami paipac randi mandarca.

Pekaía Israel llactata mandashcamanta

23Judá llactata jatun mandac Azarías pichca chunga huatata mandacucpimi, Manahempac churi Pekaiaca Israel llactata mandai callarirca. Paica ishcai huatatami Samaria pueblopi mandarca.

24Mandac Diospac ñaupapica mana allita ruhuashpami causarca. Nabatpac churi Jeroboam israelcunata juchata ruhuachishca shinallatacmi ruhuashpa catirca.

25Pekaiataca paipac soldadocunata mandac Pekami pacalla parlanacushpa, Samaria pueblo mandana huasillapitac Argob, Arie runacunatapish, Galaad llactamanta pichca chunga runacunahuan tandanacushpa huañuchirca. Pekaca Remaliaspac churimi carca. Chashna huañuchishpaca, paimi Pekaiapac randi mandarca.

26Pekaiapac shuctac ruhuashcacunapish, imacunallata ruhuashcacunapish Israel llactata mandaccuna imata ruhuashcacunata quillcashcapimi tiyacun.

Peka Israel llactata mandashcamanta

27Judá llactata jatun mandac Azarías pichca chunga ishcai huatata mandacucpimi, Remaliaspac churi Pekaca Israel llactata mandai callarirca. Paica ishcai chunga huatatami Samaria pueblopi mandarca.

28Mandac Diospac ñaupapica mana allita ruhuashpami causarca. Nabatpac churi Jeroboam israelcunata juchata ruhuachishca shinallatacmi ruhuashpa catirca.

29Israel llactata jatun mandac Peka mandacui punzhacunami asiriocunata jatun mandac Tiglat-pileser shamushpa, Ijón, Abel-bet-maaca, Janoa, Cedes, Hazor, Galaad, Galilea pueblocunata shinallatac Neftalí tucui llactacunata quichushpa, chaipi causaccunatapish prezu aparca.

30Elapac churi Oseasmi pacalla parlanacushpa, Remaliaspac churi Pekataca chugrichishpa huañuchirca. Chashna huañuchishpami, Pekapac randi mandai callarirca. Azariaspac churi Jotam ishcai chunga huatata mandacucpimi, chashnaca tucurca.

31Pekapac shuctac ruhuashcacunapish, imacunallata ruhuashcacunapish Israel llactata jatun mandaccuna imata ruhuashcacunata quillcashcapimi tiyacun.

Jotam Judá llactata mandashcamanta(2 Cr 27.1-9)

32Remaliaspac churi Peka ishcai huatata Israel llactata mandacucpimi, Uziaspac churi Jotamca Judá llactata mandai callarirca.

33Paica ishcai chunga pichca huatata charishpami, mandai callarirca. Chunga sucta huatatami Jerusalenpi mandarca. Paipac mamaca Sadocpac ushi Jerusami carca.

34Jotamca Mandac Diospac ñaupapica paipac taita Uzías allita ruhuashpa, causashca shinallatacmi allita ruhuarca.

35Chashna ruhuashpapish lomacunapi tiyac altarcunataca mana anchuchircachu. Chai altarcunapimi gentecunaca animalcunata huañuchishpa, inciensotapish rupachishpa catirca.

Paimi Mandac Diospac huasi jahua pungutaca allichirca.

36Jotampac shuctac ruhuashcacunapish, imacunallata ruhuashcacunapish Judá llactata jatun mandaccuna imata ruhuashcacunata quillcashcapimi tiyacun.

37Chai punzhacunapimi Mandac Diosca Judá llactapi causaccunahuan piñarishpa, Siria llactata jatun mandac Rezinta, shinallatac Remaliaspac churi Pekata llaquichichun cacharca.

38Jotam huañushpa, paipac ñaupa taitacunahuan tandanacugricpica, paipac ñaupa taitacunata enterrashcallapitacmi Davidpac pueblopi enterrarca. Paipac churi Acazmi paipac randi mandarca.