GÁLATAS 3 - Biblia Quichua Cañar 2010

¿Mandashcacunata pactachinachu, mana cashpacaJesusta crinachu alli canga? nishcamanta

1Galacia llactapi causac criccuna, ¡cancunaca yuyai illaccunami canguichic! ¿Pitac cancunataca umashpa crichircayari? Cancunaman ñuca huillashpaca, Jesucristo ña chacatashca cashcatami allitac huillarcani.

2Caillatami huillachun munani: ¿Cancunaca Moisés mandashcacunata pactachishpachu, mana cashpaca ñucanchic huillashcata uyashpa crishpachu Diospac Espiritutaca chasquircanguichic?

3Cancunaca yuyai illaccuna cashpami, Diospac Espirituhuan causanata callarishca jahua, quiquin munashcata ruhuashpa pactachinata munanguichic.

4¿Cancuna llaquicunata apashcaca yangallachu canga? ¡Chaicunaca manatac yangachu can!

5Cancunaca mana Moisés mandashcacunata pactachishcamantachu, ashtahuanpish ñucanchic huillashcata uyashpa crishcamantami Dios paipac Espirituta cushpa, cancunapurapica pi mana ruhuaipaccunata ruhuachicun. ¿Chaitaca manachu yachanguichic?

Abrahamhuan Dios ari nishcamanta

6Ñaupa taita Abrahamca Diostami crirca. Chaimantami Diosca paihuan alli tucuchun chasquirca.

7Chaimantami maijanpish criccunalla Abrahampac huahua huahuacunataca can. Chaitaca yachanami canguichic.

8Diosca mana israelcuna cacpipish cricpica, paihuan alli tucuchun chasquishami nishcamantami, Dios quillcachishcapi Abrahamman cai alli huillaita huillashpaca: «Canmantami tucui cai pachapi causaccunaman allicunata cusha» nishca.

9Abraham crishcamanta allicunata chasquishca shinallatacmi maijanpish cricmanca Abrahamman cushca shinallatac allicunata cunga.

10Mandashcacunata pactachishpalla Dios alli tucusha niccunaca jatun llaquitami apangacuna. Dios quillcachishcapica: «Mandashcacunata mana tucui allita pactachictaca, llaquichingapac chicanyachishcami canga» ninmi.

11Shinallatac mandashcacunata pactachishpalla pipish Dios-huanca mana alli tucungachu. Dios quillcachishcapica: «Dios-huan alli tucushcacunaca crishcallamantami causanga» ninmi.

12Mandashcacunata pactachinaca mana crina shinachu, ashtahuanpish Dios quillcachishcapica: «Maijanpish mandashcacunata pactachicca, chaita pactachishcamantami causanga» ninmi.

13Chaimantami mandashcacunata mana pactachishpa, llaquiman rinalla cacpi Cristoca ñucanchicpac randi cruzpi llaquita apashpa quishpichirca. Dios quillcachishcapica: «Maijanpish cruzpi chacatashca huañucca, Dios llaquichishcami huañun» ninmi.

14Taita Abrahamman Dios allicunata cusha nishcata Jesucristomanta mana israelcunapish chasquichun, shinallatac Dios cusha nishca Espirituta ñucanchic crishcamanta chasquichunmi, chashnaca tucurca.

15Cuyashca criccuna, caita uyaichic: Gentecunapurallapish imata ari nishpaca, shuc quillcatami ruhuachin. Chashna ruhuacpica pipish mana paquipac, shinallatac maita mana yallichipacmi can.

16Diosca pai cusha nishcataca taita Abrahamman shinallatac paipac huahua huahuamanmi cusha nishca. Dios quillcachishcapica mana huahua huahuacunamanchu cusha nishca, ashtahuanpish Abrahamtaca: «Cambac huahua huahuacunapuramanta shucllamanmi cusha» nishcami. Chaica Cristomi can.

17Shina cacpica caitami nini: Diosca Abrahamman cusha nishcataca “pactachishatacmi” nishcami. Chaimantami chuscu patsac quimsa chunga huata quipa Moisesman mandashcacunata cushpapish, Diosca pai ari nishcataca mana chingachishpa, pai cusha nishcatapish mana yangapi churashca.

18Mandashcacunata pactachishpalla Dios cusha nishcata japina cacpica, mana Dios cusha nishcamantachu canman. Ashtahuanpish Diosca Abrahamman cushami nishcamantami, pai cusha nishcataca curca.

Moisés mandashcacuna imapac alli cashcamanta

19Shinashpaca, ¿imapactac Moisés mandashcacunaca alli canga? Chai mandashcacunaca Dios ari nishca quipami, taita Abrahampac aillupuramanta maijanman pai cusha nishca shamungacaman, maijanpish mana allita ruhuacushcata ricuchingapac carca. Chai mandashcacunataca angelcuna Moisesman cucpimi paica gentecunaman yachachirca.

20Diosca cusha nishcataca, pi shucta huillaccunaman mana huillachircachu, ashtahuanpish paillami chaitaca ruhuashca.

21Shina cacpica, ¿mandashcacunaca Dios cusha nishcata chingachingapacchu canga? ¡Mana chashnachu yuyana canchic! Moisés mandashcacunata pactachishpa causanalla cacpica, maijanpish chai mandashcacunata pactachishpaca, Dios-huan alli tucunmanllami.

22Ashtahuanpish Dios quillcachishcapi nishca shinaca, maijanpish Jesucristota crishcallamanta Dios cusha nishcata japichunmi, juchaca tucui gentecunata huatashca shina charicun.

23Jesucristota crina manarac tiyacpica, chai crinamanta huillangacamanmi Moisés mandashcacunaca ñucanchicta huatashca shina charicurca.

24Chai mandashcacunaca Jesucristota crishcamanta ñucanchic Dios-huan alli tucuchunmi, Cristo shamungacaman huahuacunata shuc servic cuidac shina charicurca.

25Shina cacpimi crina punzhacuna chayamucpica, chai mandashcacunaca ña mana charicun.

26Tucui cancunami Cristo Jesusta crishcamantaca, Diospac huahuacuna canguichic.

27Bautizarishpaca, Cristohuan shuc shinalla tucushpami shuctac churanata churarishca shina Cristohuanca shuctaclaya tucushcanguichic.

28Chaimantami cancunaca Judío cashpapish, griego cashpapish, servic cashpapish, mana servic cashpapish, cari cashpapish, huarmi cashpapish Cristo Jesus-huan shuclla tucushcamantaca, tucui mashnami shuc shinalla canguichic.

29Ña Cristopac cashpaca, Taita Abrahampac huahua huahuacunami tucushcanguichic. Shinallatac Dios ñaupaman cusha nishcata japiccunapish canguichicmi.