1 REYES 14 - Biblia Quichua Cañar 2010

Ahías Jeroboam llaqui tucunata huillashcamanta

1Chai huatacunapimi Jeroboampac churi Abiasca ungurca.

2Shina tucucpimi, Jeroboamca paipac huarmitaca: «Can ñuca huarmi cacta ama pi ricsichunca shuc churanata churarishpa, Silo pueblopi causac Dios ima nishcata huillac Ahías runapacman ri. Cai llactapi ñuca jatun mandac tucunataca paimi huillarca.

3Paiman cungapacca chunga tandata, galletata, mishquitapish shuc mangapi apashpa paipacman ri. Paimi cai huahua ima tucunataca huillanga» nirca.

4Jeroboampac huarmica pai nishca shina ruhuashpami, Silo pueblopi causac Ahiaspac huasiman chayarca. Ahiasca ña yuyac cashpami, paipac ñahui amsayacpi, mana alli ricui pudirca.

5Ashtahuanpish Mandac Diosca Ahiastaca: «Uyai, Jeroboampac huarmimi paipac huahua ungushcata ricungapac shamugrin. Paita ama ricsichunca, shuctac churanata churarishcami shamunga» nishca carca.

6Ahiasca paipac huasi punguta chai huarmi tulun tulun shamucta uyashpaca: «Jeroboampac huarmi, yaicumuilla. ¿Ima nishpatac shuctac huarmi tucushpa shamunguiyari? Ñucaca mana alli huillaita huillachun cachashcami shamuni.

7Jeroboampacman cutishpa, israelcunata Mandac Diosca: “Ñucami cantaca israelcunapac chaupimanta acllashca israelcunata mandachun churarcani.

8Davidpac huasi ucupuramanta mandanata quichushpami, canman curcani. Canca ñucata servic David shinaca mana canguichu. Davidca ñuca mandashcacunata pactachishpami, tucui shunguhuan ñucata cazushpa, ñuca ñaupapi allita ruhuashpa causarca.

9Ashtahuanpish, canca cambac ñaupa mandaccunata yallimari mana allita ruhuashcangui. Canca curita yacuyachishpa shuctac dioscunata ruhuashpami huashata ricuchishpa ñucata llaquichishpa causangui.

10Chaimantami Jeroboampac huahua huahuamanca jatun llaquita cachagrini. Jeroboampac huahua huahuacunataca servic cachun mana servic cachun tucui caricunatami israelcunapuramantaca tucuchisha. Jeroboampac huahua huahuacunataca mapata pichac shinami tucuita chingachisha.

11Jeroboampac huahua huahuacunamanta pueblopi huañucpica, allcucunami micunga. Pueblomanta canzha pambapi huañucpica, jahuata volac animalcunami micunga. Chaica, Mandac Dios ñuca chashna nishcamantami chashnaca tucunga” nircami.

12Canca jatarishpa, cambac huasiman rilla. Bet-el puebloman can chayacucpica, ñami cambac huahuaca huañunga.

13Paitaca tucui israelcunami llaquirishpa, huacashpa enterrangacuna. Jeroboampac huahua huahuacunamantaca paillami israelcunata Mandac Diospac ñaupapica alli ricurishca. Chaimantami chai huasi ucupuramantaca paillatac enterrangacuna.

14Israelcunata mandachunca Mandac Diosllatacmi shuc jatun mandacta churanga. Chai mandacmi Jeroboampac huahua huahuacunataca pai mandacui punzhallapitac tucui tucuchinga. Cunanmanta pachami,

15Mandac Diosca yacu patapi cuyuricuc totorata shina israelcunataca caiman chaiman cuyuchinga. Paimi israelcunataca paicunapac ñaupa taitacunaman cushca sumac llactamanta llucchishpa, Eufrates yacu chimba ladocaman cachanga. Asera huarmi dioslayacunata ruhuashpa, Mandac Diosta piñachishcamantami chashnaca ruhuanga.

16Jeroboam juchata ruhuashpami, israelcunatapish juchapi urmachishca. Chaimantami Diosca Jeroboam juchata ruhuashcamantaca israelcunataca shucpac maquipi churanga» nirca.

17Chashna nicpimi, Jeroboampac jatarishpa rishpaca, Tirsa puebloman chayarca. Pai ña punguta yaicucucpica, huahuaca huañurcami.

18Chai huahua huañucpica, tucui israelcunami huacashpa enterrarca. Mandac Dios chashna tucuna cashcataca paita servic pai ima nishcata huillac Ahiastami huillachirca.

19Jeroboam ashtahuan ima ruhuashcapish, jatun macanacuita ruhuashcapish, shinallatac ima shina mandashcapish, Israel llactata jatun mandaccuna imata ruhuashcacunata quillcashcapimi tiyacun.

20Jeroboamca ishcai chunga ishcai huatatami mandarca. Pai huañushpa, paipac ñaupa taitacunahuan tandanacucpica, paipac randica paipac churi Nadabmi mandarca.

Judá llactata Roboam mandashcamanta(2 Cr 12.1-16)

21Judá llactataca Salomonpac churi Roboammi mandarca. Roboamca chuscu chunga shuc huatata charishpami mandai callarirca. Paica chunga canchis huatatami Jerusalenpi mandarca. Chai pueblotaca Mandac Diosmi tucui aillupuramantaca paipac shutita chaipi churangapac acllarca. Roboampac mamaca amonitapuramanta Naamami carca.

22Judá llactapi causaccunaca Mandac Diospac ñaupapi paicunapac ñaupa taitacuna tucui juchata ruhuashcatapish, ashtahuan yalli mana allita ruhuashpami yallita piñachircacuna.

23Shinallatac lomacunapi, pangasapa yura ucucunapi, ruhuashcalla dioscunapac huasicunata, Asera huarmi diosman ricchacunatapish ruhuarcacuna.

24Chashnallatac allitami ruhuacunchic nishpami chai llactapi causac caricunaca huarmicunahuan sueñuc shinallatac caripura huaclliriccuna carca. Israelcunapac ñaupamanta Mandac Dios llucchishpa cachashca millai gentecuna ruhuashpa causashca shinallatacmi, paicunapish ruhuarca.

25Roboamca ña pichca huatata mandacpimi, Egipto llactata jatun mandac Sisacca Jerusalenpi causaccunahuan macanacungapac huichai rirca.

26Shina shamushpami, Mandac Diospac huasimanta, jatun mandacpac huasimantapish sumac allicunata llucchishpa, shinallatac Salomón ruhuashca curi escudocunatapish tucui aparca.

27Chai escudocunapac randica jatun mandac Roboamca bronce escudocunatami ruhuarca. Chai escudocunataca jatun mandacpac huasi pungupi cuidac soldadocunata mandaccunamanmi curca.

28Mandac Diospac huasiman jatun mandac ricpica, cuidac soldadocunaca chai escudocunata apashpami riccuna carca. Ña cutimushpaca, soldadocunapac ucullapitacmi churaccuna carca.

29Roboampac shuctac ruhuashcacunapish, imacunallata ruhuashcacunapish Judá llactata jatun mandaccuna imata ruhuashcacunata quillcashcapimi tiyacun.

30Roboamca Jeroboamhuanmi tucui causaipi macanacushpalla causarca.

31Roboam huañushpa, paipac ñaupa taitacunahuan tandanacucpica, paipac taitacunata enterrashca ladollapitacmi Davidpac pueblopi enterrarca. Paipac mamaca amonitapuramanta Naamami carca. Paipac randica paipac churi Abiasmi mandarca.