1Benjaminpac huahuacunalla,
jahua lado llactamantami
cancunata llaquichishpa
tucuchicca shamucun.
Chaimanta Jerusalenmanta
llucshishpa, Tecoa llactapi
cornetapi tocaichic.
Bet-haquerem llacta ladopi
cushnichishpa ricuchichicyari.
2Sumaimana Sión llactataca
tucuchigrinimi.
3Paita llaquichingapacca
michiccunami ovejacunahuan shamun.
Llacta muyundipi carpa huasicunata
shayachishpami, michina pambata
japishpa michinga» nirca.
Piñaccunaca:
4«¡Macanacungapac
allichirishunchic!
¡Jatarichic! ¡Chaupi punzha
macanacungapac yaicushunchic!»
ningacuna.
Cancunaca: «¡Aij, ñucanchiclla!
¡Ña amsayagrinmi!
¡Ñami tutayacun!
5¡Jatarishunchic!
¡Tuta rishpa, mandana huasicunata
tucuchishunchic!» ninguichicmi.
6Tucuita Mandac Diosca:
«¡Jerusalenta llaquichingapac
yuracunata pitichic!
¡Allpata montonaichic!
Tucui cai llactapica
llaquichina yuyaillami tiyan.
Chaimantami caipi causaccunaca
llaquichishca canga.
7Yacu tucyacuc shinami,
cai llactapica
millaita ruhuana yuyaica tiyan.
Shuctac llaquichinallata,
millaita ruhuanallatami parlanacun.
Punzhantami ñuca ñaupapica
ungushcacunapish,
chugrichishcacunapish ricurin.
8Jerusalenpi causaccunalla,
cancunamanta ñuca ama caruyachunca,
mana allita ruhuanata saquishpa,
allita ruhuaichicyari.
Cai llactapipish mana causana,
shitashca pamba shina,
ama saquirichunca
allita ruhuashpa causaichicyari»
nishpami mandan.
9Tucuita Mandac Diosca:
«Saquirishca israelcunataca
uvasta pallashca quipa,
ramacunata tigrashpa cutin
mashcashpa pallac shinami
mashcanga» ninmi.
10Ñucaca: «¿Pitatac
ama chashna ruhuaichu nishpa
rimashayari?
Paicunaca ringri huichcashca
cashcamantami mana uyancuna.
Can Mandac Dios rimashcataca
pingashpami mana uyasha nin.
11Chaimantami can Mandac Dios
piñarishca shinallatac ñucapish
yallita piñarishpa,
mana ricunayachini» nircani.
Shina nicpimi, Mandac Diosca:
«Ñanpi puricuc huahuacunatapish,
tandanacushca mosocunatapish
llaquichi.
Cusapish, huarmipish,
tauca huatayuc yuyacpish,
prezu apashcami canga.
12Ñuca chai llactapi causaccunata
llaquichicpimi, huasicunatapish,
allpatapish, huarmicunatapish shuccuna japinga.
13Paicunapurapica
uchilla huambracunapish,
yuyaccunapish
chayucyanallatami munan.
Huillac runacunapish,
curacunapish llullashpami
umaccuna.
14Ñuca acllashcapac chugrita
jahuallata jambishpaca:
“Cushi causaimi tiyan,
cushi causaimi tiyan”
nishpami jambincuna.
¡Ashtahuanpish cushi causaica
mana tiyanchu!
15¿Millana juchata
ruhuashcamantaca pinganchu?
¡Paicunaca mana pinganchu!
¡Ima shina pinganatapish
mana yachanchu!
Chaimantami paicunaca ñuca
llaquichi punzhapica,
urmaccunahuan pacta llaquipi
urmanga.
Chaitaca Mandac Dios ñucami
nini» nirca.
Israelcuna mana cazushcamanta16Mandac Diosca: «Ñancunapi
shayarishpa ricuichicyari.
Ñaupa ñancunata tapushpa,
maijan ñan alli cashcata
acllashpa purichicyari.
Chashna ruhuacpica,
cancunapac alma samaringami» nirca.
Shina nicpipish cancunaca:
«Chai ñantaca mana purishunchu»
nircanguichicmi.
17Torre jahuapi chapaccunata churashpaca:
“¡Cornetapi tocashcata
uyaraichic!” nircanimi.
Shina nicpipish cancunaca:
“Mana uyashun ninchicchu”
nircanguichicmi.
18Chaimantami Mandac Diosca:
«Cai llactapi causaccuna uyaichic.
Tandanacushca gentecunapish
ima tucuna cashcata alli yuyarichic.
19Cai pachapi causaccuna uyaichic.
Cai pachapi causaccuna
millaita ruhuashcamanta,
ñuca rimashcata mana uyashpa,
ñuca mandashcacunata
mana cazushcamantami
chashna llaquichigrini.
20¿Imapactac Sabá llactamanta
inciensota apamunguichic?
¿Imapactac caru llactamanta
mishquilla ashnacuc huiruta
apamunguichic?
Cancuna tucui rupachishcatapish,
Cancunapac ofrendatapish
mana munanichu nini» ninmi.
21Chaimantami Mandac Diosca:
«Cai gentecunamanca
mitcarinatami churagrini.
Chaipi mitcarishpami
taitacunapish, churicunapish,
vecinopish, shuctac gentecunapish
huañunga» nin.
22Mandac Diosca: «Jahua lado
llactamantami achca gentecuna
shamun.
Cai pacha tucurimantami
sinchi gentecuna shamun.
23Paicunaca flechacunahuan,
lanzacunahuanmi shayaringa.
Paicunaca mana llaquic,
yalli millai gentecunami.
Mama cucha manchanayaita
jataric shinami,
tulun nishpa shamun.
Sión llactapi causaccunalla,
cancunahuan macanacungapacca
caballocunapimi shamun» ninmi.
24Jerusalenpi causaccuna
chaicunata uyashpaca: “Ñucanchicca
fuerza illacmi saquirishcanchic.
Ñucanchictaca yalli llaquimi
japishca.
Shuc huarmita sajuari nanai
japic shinami,
ñucanchictaca nanai japishca.
25Paicunaca espadahuanmi chapacun.
Tucui llactapimi manchai tiyan.
Chaimanta pambamanpish, ñanmanpish
ama llucshinguichicchu” nirca.
26Chaimantami ñucaca:
«Ñuca llactapi causaccunalla,
sharpa churanata churarishpa,
uchupapi singüichicyari.
Shuclla huahua huañushcamanta
llaquiric shina,
yana churanata churarishpa,
caparishpa huacaichicyari.
Ñucanchicta tucuchicca
ñallami shamunga» nircani.
27Mandac Diosca: «Cantaca
ñuca acllashcacunapac
chaupipimi cuidac soldado shina,
cachun churarcani.
Paicuna ima shina cacta
ricushpa yachaiyari.
28Tucui paicunami ñucata
mana cazushpa, huashalla
parlanacushpa purincuna.
Paicunaca bronce shina,
fierro shinami tucushca.
Paicunaca ismushca shina
millaicunami.
29Ninata pucucpica,
plomo fierroca yacuyanmi.
Yangallami cullquimanta
plomo fierrota anchuchic shina,
llactamanta mapata anchuchinata
munani.
Chai mapaca manatac anchuringachu.
30Mandac Dios mana ricusha nishpa,
shitashcamantami “caica
shitashca cullqui” nincuna» nirca.
Who We AreWhat We EelieveWhat We Do
2025 by iamachristian.org,Inc All rights reserved.
