1Sumac Dioslla,
ama chunlla saquirichu.
Dioslla, ama upalla imatapish
mana ruhuashpa saquirichu.
2Riqui, canta piñaccunaca
león shinami caparicuna.
Canta mana ricunayachiccunaca
sinchiyashcacunami.
3Can acllashcacunata
llaquichingapacmi pacalla
yuyarinacuncuna.
Cambac maquipi causaccunata
tucuchingapacmi huashalla parlanacuncuna.
4Paicunaca: «Paicunapac llactapish,
Israel shutipish ama ashtahuan tiyachun
shamuichic tucuchingapac» nincunami.
5Shuc shinalla tucushpami,
tucui mashna tandanacushpa,
canta llaquichingapac
ari nishcacuna.
6Carpa huasicunapi causac edomitacunapish,
ismaelitacunapish, moabitacunapish,
agarenocunapish,
7shinallatac Gebalpi causaccunapish,
amonitacunapish, amalecitacunapish,
filisteocunapish,
Tiro llactapi causaccunapish
shuc shinallami tandanacushca.
8Asiria llactapi causaccunapish
paicunahuanmi tandanacushca.
Tucui paicunami Lotpac huahuacunataca
rigra shina ayudashcacuna.
9Paicunataca madianitacunata shina,
mandac Sisarata shina ruhuaiyari.
Shinallatac Cisón yacu huaicupi
Jabinta shina ruhuaiyari.
10Paicunaca Endor pueblopi huañushpami,
allpapi shitana huanu shina tucurcacuna.
11Paicunapac soldadocunata mandaccunataca
Oreb, Zeeb runacunata shina huañuchiyari.
Zebata shina, Zalmunata shina
paicunapac mandaccunataca chingachiyari.
12Paicunaca:
«Dios causacuc pambacunataca
quichushpa japishunchic» nishcami carca.
13Dioslla,
paicunataca acapana huaira
sacha pangata ruhuac shina ruhuaiyari.
Tamota huaira apac shina cachaiyari.
14Paicunataca sachata rupachic shina,
urcucunata nina muyushpa
rupachic shina tucuchiyari.
15Cambac tamya huairahuan
catishpa llaquichiyari.
Cambac jatun acapana huairahuan
manchachiyari.
16Mandac Dioslla,
paicuna canta mashcachun
pingaichishpa ñahuita pucayachiyari.
17Paicunaca huiñaita pingaichishca cachun.
Chashna pingaichishca tucurichun.
18Cambac shutica
Mandac Dios cashcata yachachun.
Jahua pachapi causac Diosca
tucui cai pachata mandac
cashcata ricsichuncuna.
Who We AreWhat We EelieveWhat We Do
2025 by iamachristian.org,Inc All rights reserved.
