2 CORINTIOS 4 - Biblia Quichua Cañar 2010

1Chaimantami Dios llaquishpa cai ruhuanata ñucanchicman mingashcamantaca, mana saquishpa ruhuacunchiclla.

2Pacallapi pinganayai ruhuanacunata saquishpami, pitapish mana umashpa, Dios rimashca shimitaca mana chagrushpa huillacunchic. Dios rimashca mana llulla cashcata ricuchishpami, Diospac ñaupapi tucui mashna ñucanchic allita ruhuac cashcata ricuchun rimanchic.

3Ñucanchic huillacushca alli huillai pañohuan jarcashca shina ricurishpaca, chingarinaman riccunallamanmi chashnaca ricurin.

4Paicunaca mana crinchu. Dios ima shina cashcata ricuchic, sumac Cristomanta achicyachic luz shina alli huillaita ama entendichunmi, paicunapac yuyaitaca cai pachapi mandac Satanasca amsayachishpa charicun.

5Ñucanchicca mana ñucanchic quiquinllamantatacchu huillacunchic, ashtahuanpish Apunchic Jesús Mandac cashcatami huillacunchic. Ñucanchicca Jesusta cuyac cashcamantami, cancunata serviccuna canchic.

6Amsamanta luz achicyachichun nishca shinami, Diosca ñucanchic shungupi achicyachirca. Jesucristopac ñahuipi Dios sumaimana cashcata shuccunaman ricuchichunmi, chashnaca ruhuarca.

Jesusta crishpa causanamanta

7Ashtahuanpish cai mai valishca alli huillaitaca, allpamanta ruhuashca manga shina, ñucanchic cuerpopimi charinchic. Chaica mana ñucanchic imata ruhuaipac cashcata, ashtahuanpish Diosllatac imatapish ruhuaclla cashcatami ricuchin.

8Ima llaquicuna japishpapish, mana atishcachu. Llaquihuan cashpapish, mana chai yuyailla puricunchicchu.

9Mana ricushun nishpa llaquichicucpipish, Diosca mana saquinchu. Huactashpa pambaman shitacpipish, mana tucuchishca canchicchu.

10Ñucanchic maiman rishpapish, Jesús shinallatacmi huañuchinalla purinchic. Mana huañushpaca, Jesús causacuc cashcatami ricuchinchic.

11Jesús causacushca ñucanchic huañunalla cuerpopi ricurichunmi, paita caticushcamanta cai causaipica huañuchishunmi nishca purinchic.

12Chashna cacpimi ñucanchicca huañuna cashcata ricuchinchic. Cutin cancunaca huiñai causaita charishcatami ricuchinguichic.

13Dios quillcachishcapica: «Crishcamantami chai shinaca huillarcani» ninmi. Chai shinallatacmi ñucanchicpish crishpa huillacunchic.

14Apunchic Jesusta huañushcacunapuramanta causachic Diosllatacmi, ñucanchictapish Jesusta shinallatac causachishpa, cancunahuan pacta paipac ñaupaman ñucanchicta pushanga. Chaitaca yachanchicmi.

15Ñucanchicca cancunata cuyashpa cai llaquicunata apacushcatami yachanchic. Dios mai cuyac cashcata yachashpaca, pagui nishpami achcacuna Diostaca «allimari cangui» ningacuna.

16Ñucanchic cuerpo punzhanta maucayashpa tucurimucpipish, ñucanchic almaca punzhantami mushucyashpa caticun. Chaimantami mana shaicunchic.

17Cai causaipi ashacamanlla llaquita apacushcaca tucuringami. Shina cashpapish, llaquicunaca tucuimanta yalli huiñai causaiyuctami ruhuacun.

18Ñucanchicca cai pachapi ima ricunalla tiyashcacunapica mana yuyaita churanchicchu, ashtahuanpish mana ricushcacunapimi yuyaita churanchic. Chai imapish ricushcacunaca chingarinllami, ashtahuanpish chai mana ricushcacunaca huiñaipacmi can.