APOCALIPSIS 14 - Biblia Quichua Cañar 2010

Patsac chuscu chunga huarangaquishpirishcacuna cantashcamanta

1Chai quipaca Sión urcu jahuapi Pactalla Oveja shayacuctami ricurcani. Paihuanca pasac chuscu chunga chuscu huaranga quishpirishcacunami frentepi Pactalla Ovejapac shutita, shinallatac Diospac shutita quillcashca carcacuna.

2Chaipac quipa jahua pachamantaca achca yacu huaj nicuc shina, urcucuna sinchita tulun nicuc shina, shinallatac tauca tocaccuna arpapi tocacuc shinami uyarirca.

3Chaicunaca mushuc cantotami mandashpa tiyarinapac ñaupapi, chuscu causaita chariccunapac ñaupapi shinallatac ishcai chunga chuscu yuyaccunapac ñaupapi cantacurcacuna. Chai cantotaca pipish mana yachacui pudircachu, ashtahuanpish chai pasac chuscu chunga chuscu huaranga cai pachamanta quishpirishcacunallami yachacurca.

4Paicunaca huarmihuan mana chayarishca chuyacuna, Pactalla Oveja maita ricpipish caticcuna, gentecunapuramanta Diosmanpish, Pactalla Ovejamanpish cungapac, punta acllashcacuna shina quishpirishcacunami can.

5Paicunaca jaicapi imata mana llullacchu carcacuna. Shina cashpami Diospac ñaupapica jucha illac cancuna.

Quimsa angelcuna huillashcamanta

6Chai quipaca shuc ángel jahuata volacuctami ricurcani. Chai angelca tucui llactacunapi causaccunaman, tucui aillucunaman, tucuilaya rimaita rimaccunaman, shinallatac tucuilaya gentecunaman huiñaicaman cac alli huillaita huillangapac huillanatami charicurca.

7Pai huillashpaca: «¡Dios taripana punzhaca ñami pactamushca! Shina cashcamanta Diosta manchaichic, shinallatac paita alabaichic. ¡Cai pachatapish, jahua pachatapish, mama cucha yacutapish, shinallatac tucyacuc yacutapish ruhuacta alli nichic!» nirca.

8Chaipac catic angelca: «¡Babilonia jatun puebloca ñamari tucui tucurin! Paica vinota ubiachic shinami, pai huacllirishpa tucui llactacunapi causaccunata huacllirinapi urmachishca» nirca.

9Chaipac catic quimsaniqui ángel sinchita rimashpaca: «Maijanpish chai manchana animalta shinallatac paiman ricchata alli nic, mana cashpaca maquipi cashpa, frentepi cashpa sellota churashca cacca,

10Diosmanta shamuc jatun llaquitami imahuan mana chagrushca vinota vasopi tallishpa ubiac shina Diospac piñaitaca chasquinga. Chaicunaca Pactalla Ovejapac ñaupapi, shinallatac Diospaclla cac angelcunapac ñaupapimi ninahuanpish, azufrehuanpish llaquichishca canga.

11Chai jatun llaquimantami cushnica huiñaita llucshicunga. Chai manchana animaltapish, paiman ricchatapish ‘allimari cangui’ nishpa, paipac shutita alli nishpa sellota apaccunamanca tutapish, punzhapish llaquimanta samarinaca mana tiyangachu» nirca.

12Chaimantami Diospaclla caccunaca Dios mandashcacunata cazushpa, mana shaicushpa Jesusta alli caticcuna cashcata ricuchingacuna.

13Cutin jahua pachamanta shuc rimashca uyarishpaca: «Caita quillcai: Caimanta quipaman Apunchic Jesus-huan shuclla tucushpa huañuccunamanca, ¡mai cushicuimi canga! Diospac Espiritupish: Ari, chashnami can. Paicuna ima ruhuacushcamantaca samaringacunami. Paicuna ima ruhuashcapish paicunahuanmi canga» nishcatami uyarcani.

Granota tandac shina, cai pachapi causaccunatatandachinamanta

14Chai quipaca shuc yuranlla puyutami ricurcani. Chai puyu jahuapica Runa Tucungapac shamushcaman riccha tiyacuctami ricurcani. Paica umapica curi coronata churashca, shinallatac maquipica shuc jinu hosis apashcami carca.

15Cutin Diosta mañana huasimanta shuc ángel llucshishpa, puyupi tiyacucta sinchita rimashpaca: «Granota tandana punzhaca ñami pactamushca. Granoca ñami pucushca. ¡Chaimanta hosista japishpa piti!» nirca.

16Shina nicpimi chai puyu jahuapi tiyacucca paipac hocis-huan cai pachamanta granota tandarca.

17Chai quipaca, shuctac angelmi jahua pachapi cac Diosta mañana huasimanta shuc jinu hosishuan llucshirca.

18Cutin ninata cuidachun churashca ángel altarmanta llucshishpami jinu hosista charicucta sinchita rimashpaca: «¡Cambac jinu hosista llucchishpa, cai pachapi tiyac uvasta piti. Uvasca ñami pucushca!» nirca.

19Shina nicpimi chai angelca hosista japishpa, cai pachapi tiyac uvasta pitirca. Shina pitishpaca, capingapacmi huacaichinapi shitarca. Chaica Diosmanta shamuc jatun llaquichinatami nisha nin.

20Chai uvascunataca pueblomanta canzhamanmi capishca carca. Chai uvascuna huacaichinamantaca yahuarmi quimsa pasac kilometrocaman rishpa, caballopac shimi shinacaman jundarca.