ROMANOS 4 - Biblia Quichua Cañar 2010

Taita Abraham crishpalla Dios-huan alli tucushcamanta

1¿Imatatac ñaupa taita Abrahammantaca nishun? ¿Paica imatatac japishca canga?

2Dios Abrahamta pai imata ruhuashcamanta chasquishca cacpica, jatun tucunmanmi carca. Shina cacpipish, mana Diospac ñaupapi jatun tucunmanchu carca.

3Dios quillcachishcapica: “Abrahamca Diostami crirca. Chaimantami Diosca paita chasquirca” ninmi.

4Trabajashcamanta pagashca cullquica mana yanga cushcachu, ashtahuanpish debimanta cushca cullquimi.

5Ashtahuanpish Diosca ima allita mana ruhuacpipish, paita cricpica, juchacunata perdonashpa chasquinmi. Chaica, crishcallamantami chasquin.

6Ima allita mana ruhuacpipish, Dios chasquicpi, cushicunamanta David huillashpaca:

7«Millaita ruhuashcatapish,

juchacunatapish perdonashca

runaca cushicuchun.

8Dios mana juchanchishca runapish

cushicuchun» nishcami.

9Chai cushicuica, ¿circuncisionta ruhuashcacunallamanchu? Mana cashpaca, ¿circuncisionta mana ruhuashcacunamanpishchu canga? Ñami: “Diosca Abrahamtaca crishcallamantami chasquirca” nishcanchic.

10¿Abrahamtaca manarac circuncisionta ruhuacpichu chasquirca? Mana cashpaca, ¿circuncisionta ruhuashca quipachu chasquirca? Mana, chaica manarac circuncisionta ruhuacpimi, Diosca chasquirca.

11Abrahamtaca crishcallamantami Diosca chasquirca. Ashtahuanpish Dios chasquishcata ricuchingapacmi, quipata circuncisionta ruhuarca. Chaica, Abrahamca mana circuncisionta ruhuashca cashpapish, tucui criccunapac taitami tucurca. Diosca paicunatapish crishcallamantami chasquirca.

12Abrahamca circuncisionta ruhuashcacunapacpish taitami. Paicunaca mana circuncisionta ruhuashcallachu carca. Chaica, Abraham manarac circuncisionta ruhuashpa, crishpa causacushcata caticcunami carca.

Crishpalla Dios cusha nishcata japinamanta

13Diosmi Abrahammanpish, paipac huahua huahuacunamanpish cai pachata cusha nishpa ari nirca. Chaica, mana Abraham Moisés mandashcacunata pactachishcallamantachu cusha nirca, ashtahuanpish crishcamantami chasquirca.

14Mandashcacunata pactachishpalla Dios cusha nishcata chasquina cacpica, crinapish, Dios cushami nishcapish yangallami canman.

15Mandashcacunata mana pactachicpica, Diosca llaquichingami. Mandashcacuna mana tiyacpica, pipish mana juchanchishcachu canga.

16Diosca cuyashcallamantami Abrahamman cushca nishcataca paipac huahua huahuacunamanpish cushca. Dios cushami nishcaca mana mandashcacunata cazuccunallamanchu, ashtahuanpish Abraham shina criccunamanpishmi can. Abrahammi tucuipac taita tucushca.

17Dios quillcachishcapica: «Tauca llactacunapac taita cachunmi churani» ninmi. Abrahamca huañushcacunatapish causachic, ima mana tiyashcacunata ruhuac Diosta crishcamantami tucuipac taita tucushca.

18Dios Abrahamta: «Cambac huahua huahuacunaca achcami canga» nishcamantami Abrahamca maita mana huahuata charipac cashpapish, tauca llactacunapac taita tucurca. Chaitaca Abrahamca crishpami shuyarca.

19Abrahamca patsac huatayuc cashpapish, ña huañunalla cashpapish, paipac huarmi Sara yuyac cacpipish, huahuata charinataca crircami.

20Dios cusha nishcataca chasquina yuyaillami carca. Chashnami Diosta “allimari cangui” nishpa, crishpa shuyacurca.

21Abrahamca: “Diosca, pai cusha nishcata cungapac poderta charinmi” nishpami shuyacurcalla.

22Diosca Abrahamtaca crishcamantami chasquirca.

23Dios quillcachishcapica mana Abrahamllata chasquinamantachu nicun,

24ashtahuanpish ñucanchicta chasquinamantapishmi nicun. Ñucanchictapish Apunchic Jesusta huañushcacunapuramanta causachic Diosta cricpica, chasquinamantapishmi nicun.

25Apunchic Jesusca ñucanchic juchacunamantami huañurca. Diosca ñucanchictapish chasquingapacmi Jesustaca huañushcacunapuramanta causachirca.