1Mishquilla ashnacuc jambita yallica,
tucuipac alli nishca canami alli.
Huañuna punzhami,
huacharina punzhata yalli ashtahuan alli.
2Jatun micuiman rinapac randica,
duelopac huasiman rinami ashtahuan alli.
Huañuimi tucui runacunata tucuchin.
Causaccunaca chaitami yuyarina can.
3Llaquilla ñahuimi shungupacca alli.
Asinapac randica, huacanami ashtahuan alli.
4Alli yachac runaca
duelo huasitami yuyacun.
Mana entendic runaca,
cushicuna huasitami yuyacun.
5Mana entendic runacuna
cantashcata uyanapac randica,
alli yachac runa cunashcata
uyanami ashtahuan alli.
6Mana entendic runa asishcaca,
ninapi mangata shayachishpa,
casha yantata saticpi tucyacuc shinami.
Chaipish yangallami.
7Llaquichishpa charicpica,
yachac runapish yuyai illacmi tucun.
Pacalla pagashcaca shungutami pandachin.
8Callarinapac randica,
ruhuanata tucuchinami ashtahuan alli.
Jatun tucuna yuyaita charinapac randica,
mana piñaric yuyaita charinami
ashtahuan alli.
9Piñarina atichunca ama saquinguichu. Mana entendic runapac yuyaipimi piñarina yuyaica tiyan.
10Canca ama: «¿Imamantatac punta huatacunaca cai punzhata yalli alli carca?» ninguichu. Chaitaca mana alli yachacmi tapun.
11Alli yachac, shinallatac herenciata charic runaca allimi. Paica intita ricushpa causaccunapacca mai allimi.
12Alli yachaipish, cullquipish escudo shinami jarcan. Shina cacpipish alli yachaimi yachaccunamanca causaita cun.
13Dios ruhuashcata ricushpa yuyari. Pai huishtuta ruhuashcataca, ¿pitac derechai pudinga?
14Alli punzha cacpica, chai punzhamanta cushicui. Cutin mana alli punzha cacpica, Dios chai ishcai punzhacunatatac ruhuashcata yuyari. Chaica runa paipac quipa ima tucunata ama yachachunmi, chashnaca churarca.
15Tucui caicunatami ñuca yanga causai punzhacunapi ricushcani. Cashcata ruhuac runaca, cashcata ruhuac cashpapish huañunllami. Mana allita ruhuac runaca, mana allita ruhuac cashpapish unaitami causan.
16Ama yallita cashcata ruhuacpish,
ama yallita yachacpish canguichu.
¿Ima shinatac canllatac tucurigringui?
17Ama yalli millaipish,
ama yalli yuyai illacpish canguichu.
¿Ima nishpatac huañui manarac
chayacpi huañungui?
18Caita chariranaca allimi.
Caishuctapish cambac maquimantaca,
ama cacharinguichu.
Diosta manchac runaca
tucuipimi alli llucshinga.
19Alli yachac runataca pai yachacushcami,
shuc pueblopi causac
chunga mandaccunatapish yalli sinchiyachinga.
20Cai pachapica cashcata ruhuac, allita ruhuac, jucha illac runaca shucllapish mana tiyanchu.
21Tucui imatapish ama shungupi chasquinguichu. Pacta canta servic runa, canta mana alli nishpa rimashcata uyanguiman.
22Canpish tauca cutinmi shuccunata mana alli nishpa rimarcangui. Chaitaca canllatac yachanguimi.
23Tucui chaicunatami alli yuyaihuan allita ricurcani. Ñucaca: «Alli yachacmi tucusha» nircanimi. Shina cacpipish, alli yachaica ñucamanta caruyarcami.
24Chashna yachana carupi cacpi, yallita ucupi cacpica, ¿pitac tari pudingayari?
25Chaimantami cutinllatac alli yachangapac, ima shina cacta ricungapac, allita yachac cangapac, yuyaita charingapacpish cutin ricurcani. Shinami yuyaita mana charishpa, mana allita ruhuashpa loco shina pandarishpa causacushcata yacharcani.
26Tuclla shina, linchi shina shunguta charic,
huatana huascata shina
maquita charic huarmica
huañuitapish yalli jayac cactami ricurcani.
Diosta cushichic runallami
chai huarmimantaca quishpiringa.
Ashtahuanpish juchayuc runaca,
chai huarmihuanmi prezushca shina saquiringa.
27Riquichic, huillac runa ñucaca, yuyaita japingapac shucta callarishpa alli ricushpaca caitami ricurcani.
28Ñuca almahuan mashcashpapish, huaranga caricunamantaca shucllatami allitaca tarini. Ashtahuanpish cai tucui huarmicunamantaca, shuc huarmillatapish allitaca mana tarinichu.
29Riqui, ñucaca caillatami tarircani. Diosca runataca allitami ruhuashca. Ashtahuanpish paillatacmi mana allita yuyarishca ninmi.
Who We AreWhat We EelieveWhat We Do
2025 by iamachristian.org,Inc All rights reserved.
