NÚMEROS 34 - Biblia Quichua Cañar 2010

1Mandac Diosca Moisestaca:

2«Israelcunata: “Cancuna Canaán llactaman yaicushpaca, cancunapac allpa linderocunaca caicunami canga.

3Ura lado Zin shitashca pambamantaca Edom llacta tupanacuitami canga. Chai ura inti llucshina lado linderoca Cachi Cucha tucuricamanmi canga.

4Chai linderoca ura ladota muyushpa, Acrabim lomaman chayashpa, shitashca pamba Zintami catinga. Chai ura ladota rishpaca, Cades-barneacamanmi canga. Chaimantaca Hazar-adarta pueblota rishpami Hasmoncaman canga.

5Chai linderoca Asmonmantaca Egipto huaicu jatun yacuta rishpami, mama cuchapi tucuringa.

6Inti tigrana ladomanca cac linderoca mama cucha huaicutami catinga.

7Jahua lado linderoca mama cuchamanta Hor urcucamanmi canga.

8Chaimantaca Hamatman yaicunacamanmi linderohuan churashca canga. Chai linderoca Zedadcamanmi ringa.

9Chaimantaca Zifronta pasashpami Hazar-enanpi tucuringa.

10Cutin inti llucshina ladomanca Hazar-enanmantaca Sefamcamanmi canga.

11Sefammantaca Ayinmanta inti llucshina ladoman cac Riblacamanmi canga. Chaimanta uraiman rishpaca, inti llucshina ladoman cac Cineret cucha ladocamanmi canga.

12Chaimantaca Jordán yacu uraita rishpa, Cachi Cuchamanmi chayanga. Chai shinami cancunapac llactaca canga” ninmi ningui» nirca.

Llactacunata raquinacushcamanta

13Moisés israelcunata mandashpaca: «Cai llactatami cancunaca suerteta ruhuashpa japinguichic. Cai llactataca Mandac Diosmi iscun aillucunaman, caishuc chaupi aillumanpish cuchun mandarca.

14Rubenpac, Gadpar aillucunapish, Manasespac chaupi aillupish paicunapac huasi ucu familia mashna cashca shinallatacmi allpataca japirca.

15Chai ishcai aillucuna, shinallatac caishuc ailluca Jericó chimba ladopi cac Jordán yacu ladopimi japirca. Chaica inti llucshina ladomanmi saquirin» nirca.

16Mandac Diosca Moisestaca:

17«Allpata chaupishpa cuc runacunapac shuticunaca: Eleazar cura, Nunpac churi Josuemi.

18Paicunata ayudachunca tucui aillucunamanta shuc mandacta acllangui.

19Chai mandaccunapac shuticunaca:

Judapac aillumantaca Jefonepac churi Caleb,

20Simeonpac aillumantaca Amihudpac churi Semuel,

21Benjaminpac aillumantaca Quislonpac churi Elidad,

22Danpac churicunapac aillumantaca Joglipac churi mandac Buqui,

23Josepac ishcai churipac aillumantaca Manasespac aillumanta Efodpac churi mandac Haniel,

24Efrainpac aillumantaca Siftanpac churi mandac Quemuelmi canga.

25Shinallatac Zabulonpac churicunapac aillumantaca Parnacpac churi mandac Elizafán,

26Isacarpac churicunapac aillumantaca Azanpac churi mandac Paltiel,

27Aserpac churicunapac aillumantaca Selomipac churi mandac Ahiud,

28Neftalipac churicunapac aillumantaca Amihudpac churi mandac Pedaelmi canga.

29Mandac Diosca paicunatami Canaanta israelcunaman chaupishpa cuchun mandarca» nirca.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help