1 SAMUEL 8 - Biblia Quichua Cañar 2010

Jatun mandacta churachun nishpa israelcuna mañashcamanta

1Samuelca ña yuyac cashpami israelcunapac juezcuna cachunca paipac churicunata churarca.

2Paipac punta churica Joelmi carca. Quipa churica Abiasmi carca. Paicunami Beerseba pueblopi juezcuna carca.

3Ashtahuanpish churicunaca paicunapac taita shinaca mana causarcacunachu. Paicunaca charicyangaraicu cullquita pacalla japishpami cashcataca mana ruhuarcacuna.

4Chaimantami israelcunata mandac yuyaccunaca tucui tandanacushpa Samuelman parlangapac Ramá puebloman rirca.

5Chaipimi:

—Riqui, canca ñami yuyac cangui, cambac churicunaca mana can shina mandacuncunachu. Chaimanta cunanca tucui llactacuna shinallatac ñucanchicpish juezta charingapac, jatun mandacta churaiyari— nirca.

6Paicuna: «Ñucanchicpac juez cachun shuc jatun mandacta churaiyari» nishpa mañacpimi, Samuelca yallita llaquirirca. Chaimantami Samuelca Mandac Diosta mañarca.

7Mandac Diosca: «Israelcuna imata mañashcataca ruhuailla. Paicunaca mana cantachu mana valichincuna, ashtahuanpish ñucatami yangapi churashpa, paicunata ama ashtahuan ñuca mandachun shuc mandacta charishun nincuna.

8Paicunaca Egiptomanta ñuca llucchimushca punzhamanta cunan punzhacamanmi shuctac dioscunata servishpa ñucata mana cazuncuna. Chashnallatacmi canhuanpish ruhuancuna.

9Cunanca paicuna ima mañashcata ruhuailla. Ashtahuanpish shuc jatun mandac yaicushpa paicunata ima shina mandashpa charina cashcata allita yapachishpa huillangui» nirca.

10Samuelca jatun mandacta churai nishpa mañac gentecunamanca Mandac Dios ima nishcatami tucui huillarca.

11Paica:

—Caita alli yuyarichic. Cancunata jatun mandacca cancunapac churicunata apashpami macanacuna carretacunapi, caballocunapi tiyachishpa paipac carretapac ñaupata richun churanga. Maijancunataca paicunata cuidac cachunmi churanga.

12Shuccunataca huaranga soldadocunata mandachun, shuccunataca pichca chunga soldadocunata mandachunmi churanga. Shinallatac shuctaca paipac allpacunapi yapushpa tarpuchun, chai chagracunatapish tandachichunmi churanga. Shuccunataca macanacunata ruhuachunpish, carretacunapi ima minishtishcacunata ruhuachunpish churangami.

13Cancunapac ushicunatapish maijancunataca mishquilla ashnacuc jambicunata ruhuachun, shuccunataca yanuchun, shuccunataca tandata ruhuaccuna cachunmi churanga.

14Shinallatac cancunapac ashtahuan alli uvascunata pucuc, alli olivos yuracuna pucuc allpacunata quichushpami paita serviccunaman cunga.

15Cancunapac huagracunatapish, uvascunatapish chungamanta shucta japishpami, pai churashca mandaccunaman, paita serviccunaman cunga.

16Paita servishpa imatapish ruhuachingapacmi, cancunata servic caricunatapish, huarmicunatapish, alli huagracunatapish, burrocunatapish paipacta ruhuachun quichushpa apanga.

17Cancunapac ovejacunatapish, chungamanta shuctami japinga. Cancunapish paita servishpami causanguichic.

18Cancunallatac acllashca jatun mandac llaquichicuc punzhacunapi caparishpa mañacpipish, Mandac Diosca mana uyangachu— nirca.

19Ashtahuanpish gentecunaca Samuel chashna nicpipish mana uyashpami:

—Ima cachunpish jatun mandacta charinatami munanchic.

20Chashna cacpica, ñucanchicpish shuctac llactacuna shinami cashun. Ñucanchictaca jatun mandacmi mandanga. Paimi ñucanchic ñaupata rishpa, ñucanchicpac jatun macanacuitapish ruhuanga— nirca.

21Israelcuna tucui ima nishcata uyashpami Samuelca Mandac Diosman tucui huillarca.

22Shina huillacpimi Mandac Diosca Samueltaca:

—Paicuna nishcata uyashpa jatun mandacta churailla— nirca.

Shina nicpimi, Samuelca Israelcunataca:

—Cancuna causana pueblocunaman cutichiclla— nishpa cacharca.