1Mandac Dios ayudangacamanmi
shuyacurcanilla.
Jahua pachamanta cumurishpami
ñuca caparishpa mañashcata uyarca.
2Paimi ñucataca llaquihuan
jutcupi huañucucta llucchirca.
Ñucata aguachicuc guzumantami
llucchirca.
Chaimanta llucchishpaca
ñuca chaquicuna sinchita
purichunmi jatun rumi
jahuapi churarca.
3Ñuca shimipica mushuc
cantotami churarcangui.
Chai cantohuanmi
ñuca Diosta alli nini.
Chaita ricushpaca achcacunami
mancharishpa, paicunapac shungutaca
Mandac Diospi churanga.
4Jatun tucushcacunatapish,
ruhuashcalla dioscunahuan llullashpa,
pandachiccunatapish mana catishpa,
Mandac Diospi shunguta
churacca cushicunmi.
5Mandac Dioslla, ñuca Dioslla,
jatun mancharinacunataca
achcatami ruhuashcangui.
Ñucanchicman allita ruhuana
yuyaillami cangui.
Can ruhuashca allicunaca
mana yupaipacmi.
Can tucui allicunata ruhuashcata
cambac ñaupapi yupashpa
huillasha nishpapish
maita mana yupaipacmi can.
6Animalcunata canman cushpa
huañuchichunpish, ofrendata
cuchunpish mana munanguichu.
Juchacunamanta animalcunata cushpa,
tucui rupachichunpish
mana mañashcanguichu.
7Chaimantami ñucaca:
«Can quillcashca pillushca
carapica ñucamantami huillacun.
Ñucaca chaita ruhuangapacmi shamuni.
Chai carapica:
8“Ñuca Dioslla,
cambac munaita ruhuashpami cushicuni.
Can mandashcataca ñuca shungupimi
huacaichini” ninmi» nircani.
9Cashcata can ruhuac cashcataca
jatun tandanacuipimi huillarcani.
Mandac Dioslla,
ñuca mana upalla saquirishcataca
canllatacmi yachangui.
10Cashcata can ruhuashcatapish,
allita ruhuac cashcatapish,
can llaquic cashcatapish,
mana llullac cashcatapish
mana pacashpami, jatun
tandanacuipi huillarcani.
11Mandac Dioslla, ñucata
llaquinataca amatac saquichu.
Can llaquic cashcahuan,
mana llullac cashcahuan,
huiñaita huacaichiyari.
12Ñucataca mana yupaipac
llaquicunami chaupinchishca.
Millaita ruhuashcamantami
cashna llaqui tucuni.
Huichai ricunallatapish
mana pudinichu.
Llaquicunaca ñuca uma acchatapish
yalli achcamari.
Ñuca shungupish ña huañucunmi.
13¡Mandac Dioslla,
quishpichingapac utca shamuiyari!
¡Mandac Dioslla,
ñucata ayudangapac utcamuiyari!
14Ñucata ima shinapish
huañuchishun nishpa puriccunaca
pingaichishca,
mana valichishca cachun.
15Ñucata huañuchisha niccunaca
huashaiman cutishpa
muspachishca cachun.
Ñucata burlashpa asiccunaca
pingaichishpa tucuchishca cachun.
16Canta mashcaccunaca
tucui mashna yallita cushicuchun.
Can quishpichichun munaccunaca:
«¡Mandac Diosca jatunmi!»
ninataca amatac saquichun.
17Ñuca ima illaclla huaccha
cacpipish, Mandac Diosca
yuyaringami.
Mandac Dioslla, ñucata ayudac,
ñucata quishpichicmi cangui.
¡Mandac Dioslla, ama unayaichu!
Who We AreWhat We EelieveWhat We Do
2025 by iamachristian.org,Inc All rights reserved.
