1Diospac Arcata filisteocuna quichushpaca Eben-ezer pueblomantaca Asdod pueblomanmi aparca.
2Diospac Arcata filisteocuna quichushpaca Dagón diospac huasi ucuman apashpami Dagón diospac ladopi churarca.
3Asdod pueblopi causaccuna cayandi tutamanta jatarishpaca Dagón diosca Mandac Diospac Arca ñaupapi urai singa urmashpa siricushcatami ricurca. Chaimantaca tucuilla jatarichishpami, pai tiyacushca pushtullapitac cutin churarca.
4Shinallatac cayandi tutamanta cutin yaicucpipish, Dagón diosca Mandac Diospac Arca ñaupapimi cutin urai singa urmashpa siricushca carca. Dagón diosca cungamanta uraillaman saquirishca carca. Paipac uma, rigracunaca paquirishpami pungu umbralpi siricushca carca.
5Chaimantami Dagón diospac curacunapish, Dagón diosta yuyarina huasiman yaicuccunapish, Asdod pueblopi tiyac Dagón diospac huasi pungu humbralpica cunan punzhacaman mana saruncuna.
6Mandac Diosca Asdod pueblopi causaccunataca ashtahuanmi llaquichic callarirca. Shinami Asdod pueblopipish, chai muyundi llactacunapipish chupu ungüihuan yallita llaquichishpa tucuchirca.
7Chaita ricushpami Asdod pueblopi causaccunaca: «¡Israelcunapac Diospac Arcataca mana caipi charinachu canchic. Paica ñucanchictapish, ñucanchic Dagón diostapish yallitami llaquichicun!» nirca.
8Chaimantami filisteocunata tucui mandaccunata cayachishpaca:
—¿Israelcunapac Diospac Arcataca imatatac ruhuanchic?— nishpa tapurca.
Shina nicpimi paicunaca:
—Israelcunapac Diospac Arcataca Gat puebloman apachun— nirca.
Chaimanmi israelcunapac Diospac Arcataca aparca.
9Chai puebloman apacpimi, Mandac Diosca chai pueblopi causaccunahuan piñarishpa, yallita llaquichirca. Chai pueblopi causaccunataca uchillacunamanta callarishpaca yuyaccunacamanmi chupu ungüihuan manchanayaita llaquichirca.
10Shina cacpimi, Diospac Arcataca Ecrón puebloman cacharca. Diospac Arcata chai Ecrón puebloman cachacpica, chaipi causaccunaca: «¡Israelcunapac Diospac Arcataca ñucanchictapish, ñucanchic gentecunatapish huañuchunmi ñucanchicpacman apamushca!» nishpa caparirca.
11Chaimantami filisteocunata tucui mandaccunata cayachishpa tandanacushpaca: «Israelcunapac Diospac Arcata maimanta apamushca pushtullamantac apaichic. Pacta ñucanchicpish, ñucanchic gentecunapish huañunchicman» nirca.
Chai pueblopi causaccunaca Diospac poderhuan ashtahuan llaquichishpa yalli huañuchishcamantami mancharirca.
12Mana huañuccunaca chupu ungüihuanmi yallita llaquita aparca. Chaimantami pueblopi tucui causaccuna caparishcaca jahua pachacaman uyarirca.
Who We AreWhat We EelieveWhat We Do
2025 by iamachristian.org,Inc All rights reserved.
