1Mandac Dioslla,
Davidtapish,
pai llaquita apashcatapish yuyariyari.
2Pai can Mandac Dios-huan
ari nishcatapish yuyariyari.
Paillatacmi,
Jacobopac tucuita ruhuac Diostaca:
3«Ñuca huasimanca mana yaicushachu.
Ñuca camamanpish mana huichicushachu.
4Ñuca ñahuitapish
mana sueñuchun saquishachu.
Ñahuillatapish mana huichcashachu.
5Chashnami Mandac Diospac huasita
ruhuana pushtuta,
Jacobopac tucuita ruhuac Dios causana
huasita taringacaman mana samarisha» nirca.
6Arcamantaca
Efrata pueblopimi uyarcanchic.
Achca yuracuna tiyac
pambapimi tarircanchic.
7¡Dios-huan tupana huasiman jacuchic!
Chaiman yaicushpa paipac chaqui saruna
ñaupapi cungurishunchic.
8Mandac Dioslla,
poderyuc Arcandi
can samarina pushtuman shamuiyari.
9Cambac curacunaca cashcata ruhuanata
churarishca shina cachun.
Cambaclla caccunaca yallita cushicuchun.
10Canta servic Davidta cuyashcamanta
jatun mandac cachun aceitehuan cahuishca
mandactaca ricuraiyari.
11Mandac Diosca pactachishatacmi nishpami
Davidhuan ari ninacushpaca:
«Can mandashpa tiyarinapica
cambac huahua huahuapurallatatacmi churasha.
12Paicuna ñucahuan ari nishcatapish,
ima shina causanata
ñuca yachachishcatapish pactachishpaca,
huiñaitami can mandashpa tiyarinapica
tiyaringa» nirca.
13Mandac Dios Sión pueblota acllashpa,
chaipi causanata munashpaca:
14«Caipimi ñucaca huiñaita causasha.
Caipi causanata munashpami acllarcani.
15Achca micunatami bendiciasha.
Huacchacunapish mana nictami micunga.
16Shinallatac curacunamanca
quishpirishca churanatami churachisha.
Diospaclla causaccunaca
cushicushpami caparingacuna.
17Chaipimi David mandanataca
cutinllatac callarichisha.
Aceitehuan cahuishca
ñuca jatun mandactami
lamparahuan achicyachic shina
achicyachisha.
18Paita piñaccunamanca
churanata churachic shinami pingaichisha.
Ashtahuanpish paipac umapica,
jagan nicuc coronatami
churachisha» nirca.
Who We AreWhat We EelieveWhat We Do
2025 by iamachristian.org,Inc All rights reserved.
