1Ñuca cuyashca criccuna, ama taucacuna Diosmanta yachachiccuna tucushunchic. Diosca ñucanchictami tucuimanta yallica ashtahuan taripanga.
2Tucuimi tauca cutin imapipish pandarinchic. Maijan imata rimashpa mana pandaricca, mana juchanchipac alli runami. Chashnaca, paipac cuerpotapish ima mana allimantaca jarcarinmi.
3Caballopi maiman ringapacca, shimipimi frenota churanchic. Shina churashpaca, ñucanchic maiman risha nicushcamanmi apanchic.
4Chashnallatac shuc barco jatun cacpipish, huaira yallita jatarishpaca, maiman cashpapish apanllami. Chashna cacpipish barcota purichic runaca, shuc uchilla caspillahuanmi maiman cashpapish apanlla.
5Chai shinallatacmi calluca ñucanchic cuerpopi uchilla cashpapish, imatapish rimashpaca, yallita llaquichinlla. Shinallatac ninapish pitillamanta mirarishpaca, mashna jatun sachacunatapish tucui rupachinllami.
6Calluca shuc nina shinami millaita callarichichishpa runata mapayachin. Calluca ucu pacha nina rupacuc shinami, tucui causaipi mana allita ruhuachishpa rupachic shina llaquichicun.
7Gentecunaca sachapi causac, volashpa puric, allpata aisarishpa puric, yacupi causac animalcunatapish mansoyachi pudinmi.
8Shina cashpapish callutaca pipish mana jarcai pudinchu. Calluca pipish mana jarcaipac huañuchic veneno shina jundami can.
9Chai callullahuantacmi Diostapish allimari cangui ninchic, shinallatac Dios pai shina ruhuashca gentecunatapish, imapish tucushca canman ninchic.
10Chaillamantatacmi alli shimicunapish mana alli shimicunapish llucshin. Ñuca cuyashca criccuna, chaica mana chashnachu cana can.
11Mishqui yacupish, jayac yacupish chaillamantatacca mana tucyanchu.
12Ñuca cuyashca criccuna, higo yuraca olivos murutaca mana pucunchu. Uvas yurapish higotaca mana pucunchu. Chashnallatacmi cachi yacupish, mishqui yacupish chaillamantacca mana tucyan.
Dios alli yuyaita cuc cashcamanta13Cancunapuramanta maijan alli yachac, yuyaisapa cashpaca, imatapish allita ruhuashpa, mana piñaric alli shungu tucushpa, yachac cashcataca ricuchichic.
14Shina cashpapish shuccuna shina casha nishpa shungupi canirishpa, quiquinlla imata ruhuashpaca ama ñucaca yachacmi cani nichicchu, shinallatac, cashcata nic huillashcatapish mana cazucunguichicchu.
15Chai shina yachac canaca mana Diosmantachu shamun, ashtahuanpish cai pacha gentecuna yuyashcallamanta shinallatac diablomantami shamun.
16Shuccuna shina casha nishpa, quiquinlla imatapish ruhuana yuyaicuna tiyacpimi tucuilaya mana allicuna shinallatac imapish maipipish cachun ruhuarin.
17Ashtahuanpish Dios cushca yachaita chariccunaca ima millaita mana ruhuashpami sumacta causanata munancuna. Paicunaca alli shungucuna, mana piñariccuna, llaquiccuna, pimanpish mana tucuccuna, imatapish mana huashalla rimaccuna ashtahuanpish allitac ruhuaccunami can.
18Maijanpish sumac causaita causachun munaccunaca, allita tarpushpa tandac shinami, cashcata ruhuashpa causanata japingacuna.
Who We AreWhat We EelieveWhat We Do
2025 by iamachristian.org,Inc All rights reserved.
