NEHEMÍAS 4 - Biblia Quichua Cañar 2010

Jarcacucpipish pircata tucuchishcamanta

1Jerusalén muyundi jatun pircata ñucanchic allichicucta Sanbalat yachashpami, yallita piñarishpa, Judá llactapi causaccunataca burlashpa asirca.

2Chashna burlashpami, paipac ricsishcacunapac, shinallatac Samaria llacta soldadocunapac ñaupapi rimarishpaca:

—Judá llactapi causac mana vali gentecunaca, ¿imatatac ruhuacuncuna? ¿Diosman animalcunata cushpa rupachichun saquingami yuyancunachari? ¿Chai jatun pircataca shuc punzhallapichu tucuchinga? ¿Rupachishpa montonashca rumicunahuanchu pircataca cutin allichingacuna?— nirca.

3Shinallatac amonitapuramanta Tobiaspish Sanbalatapac ladopi shayacushpami:

—Paicuna shayachishca rumi pircataca shuc atuc huichicushpallami tigrachinga— nirca.

4Chaimantami ñucaca: «Ñucanchic Dioslla, ñucanchicta piñaccuna burlashcata uyaiyari. Chai rimashcacunaca paicunallatatac llaquichichun. Paicunata piñaccuna shuctac llactaman prezu apashpa llaquichichun saquiyari.

5Paicuna pircata shayachiccunata piñashcamantaca, paicuna mana allita ruhuashcatapish, juchallishcatapish ama cungaringuichu» nishpami mañarcani.

6Tucui gentecuna trabajana munaihuan cacpimi, tucui muyundi jatun pircataca chaupi pircacaman shayachircanchic.

7Shina caticucta, Jerusalén muyundi pircacunata allichishpa caticucta, pirca jutcucunatapish tapacucta Sanbalatpish, Tobiaspish, arabecunapish, amonitacunapish, Asdod pueblopi causaccunapish yachac chayashpami ñucanchic-huan yallita piñarirca.

8Chaimantami paicunaca shuc yuyailla tucushpa, Jerusalenta llaquichishpa tucuchinata yuyarirca.

9Paicuna ama yaicuchunca, Diosta mañashpami, tutapish, punzhapish cuidachun cuidaccunata churarcanchic.

10Shina cacpipish, Judá llactapi causaccunaca: «Cai pircata ruhuanaca yalli achcami. Pircata ruhuaccunapish yalli shaicushcami. Chaimantami pircata ruhuanataca mana pudishun» nircacuna.

11Cutin ñucanchicta piñaccunaca: «Paicuna ama pircata ruhuashpa catichunca, pacalla paicunapac chaupiman yaicushpa, huañuchishun» nircacuna.

12Ashtahuanpish paicunapac ladopi causac Judá llactamanta caccunaca: «Chai llaquichiccunaca tucui ladomantami cancunata llaquichingapac shamunga» nishpami cutin cutin huillarcacuna.

13Shina huillacpimi, gentecunataca familiapura tucushpa, bajolla pircacunapipish, jutcushca pircacunapipish espadacunahuan, lanzacunahuan, arcocunahuan cuidachun churarcani.

14Chai quipaca tucui ima tucushcata ricushpami, alli nishca runacunatapish, quipa mandaccunatapish, tucui caishuc gentecunatapish rimashpaca:

—¡Paicunapac ñaupapica ama manchaichicchu! Ashtahuanpish tucuita ruhuac jatun Diosta yuyarichic. Cancunapac huauquicunamanta, churicunamanta, ushicunamanta, huarmicunamanta, cancunapac huasicunamanta macanacuichic— nircani.

15Paicuna llaquichigricushcata ñucanchic ña yachac chayashcata, shinallatac Dios paicuna yuyaricushcata yangapi churashcata paicuna yachac chayacpimi, ñucanchicca jatun pircata ruhuashpa catircanchic.

16Chai punzhamanta pachami ñucata serviccunamanta chaupica pircata allichishpa, caishuc chaupica espadacunahuan, lanzacunahuan, arcocunahuan, fierro churanacunata churarishca shayacurcacuna. Paicunapac huashapica Judapac huasi ucupurata mandaccunami cuidacurca.

17Pircata allichiccunapish, rumita apariccunapish chulla maquihuanca trabajashpa, chulla maquihuanca espadata apashcami carcacuna.

18Pircata shayachiccunaca tucuimi cinturapi espadata apashca jatun pircata shayachircacuna. Cutin trompetapi tocacca ñuca ladopimi carca.

19Alli nishcacunatapish, mandaccunatapish, tucui caishuc gentecunatapish rimashpaca:

—Caipica jatun, shinallatac achca ruhuaicuna cashcamantami ñucanchicca caipi chaipi caruyashpa trabajacunchic.

20Chaimanta maipimi trompeta tocashca uyarin, chaiman shamushpa ñucahuan tandanacunguichic. Ñucanchic Mandac Diosmi ñucanchicmanta macanacunga— nircani.

21Chashnami ña punzhayamucucmanta pacha lucerocuna ricuringacaman ñucanchic trabajacucpica, maquipi lanza apashca caishuc gentecunaca shayacurca.

22Chashnallatac tucui gentecunata ñucaca:

—Tucui cancunami serviccunandi tutaca cuidashpa, punzhaca pircata allichishpa, cai Jerusalenpi saquirina canguichic— nircani.

23Chaimantami ñucapish, ñuca huauquicunapish, ayudaccunapish, cuidaccunapish churanacunataca mana llucchircanchic. Armaringapacllami churanataca llucchirircanchic.