EZEQUIEL 14 - Biblia Quichua Cañar 2010

Ruhuashcalla dioscunata adoraccunata llaquichinamanta

1Israelcunata pushac yuyaccunapuramanta ñucapacman shamushpa, ñuca ñaupapi tiyacucpi,

2Mandac Dios ñucata rimashpaca:

3«Huañunalla runa, cai runacunaca ruhuashcalla dioscunata yallita adorashpami, juchapi urmashcacuna. Chashna ruhuashca jahua ñucata tapungapac shamuchunca, ¿maitatac saquishayari?

4Chaimanta canca: “Mandac Diosca: Israelcunapuramanta maijan ruhuashcalla dioscunata tucui shunguhuan adorashca jahua, shinallatac juchapi urmachicta ricushca jahua ñuca ima nishcata huillacman tapungapac shamuc runataca pai ruhuashcalla dioscunata charishca shinallatacmi llaquichisha.

5Ruhuashcalla dioscunata adorangapac ñucamanta anchuric israelcunata paicunapac shungupi yuyachingapacmi chashnaca ruhuasha” ninmi ningui.

6Chaimanta canca: “Israelcunata Mandac Diosca: Cancunapac ruhuashcalla dioscunata saquishpa, ñucapacman cutimuichic. Cai tucui millanacunata ruhuashcataca ama ashtahuan ricuichicchu.

7Maijan israelcunapish, Israel llactapi causac shuctac llacta runacuna ñucata saquishpa, ruhuashcalla dioscunata adorashpa, juchapi urmashpa, ñuca ima nishcata huillacta tapungapac shamucpica, ñuca quiquinmi cutichisha.

8Chai runata chashna llaquichishpami tucuipac yuyarina cachun, shuc señalta ruhuasha. Chashnami ñuca acllashcapuramanta anchuchisha. Shina ruhuacpimi, ñucataca Mandac Dios cashcata yachanguichic.

9Ñuca ima nishcata huillac llullashpa huillachunca, ñucallatacmi cacharcani. Paicunataca llaquichishpami, ñuca acllashca israelcunapac chaupimanta anchuchisha.

10Ñuca ima nishcata huillacpish, paiman tapuc runapish juchanchishpa, llaquichishcami canga.

11Chashnami, tucui israelcuna ñucamanta ama anchurichun, ama ashtahuan mana cazushpa mapayachun llaquichisha. Paicunaca ñuca acllashcacunami canga, ñucaca paicunapac Diosmi casha” ninmi ningui» nirca.

Jerusalenpi causaccunata llaquichinamanta

12Mandac Dios ñucata rimashpaca:

13«Huañunalla runa, cai llactapi causaccuna ñucata saquishpa, juchata ruhuacpica, ñucallatacmi ñuca maquita alzashpa llaquichisha. Micunata mana cushpami, yarcaihuan tucuchisha. Chashnami yalli yarcaihuan gentecunatapish, animalcunatapish tucuchisha.

14Noé, Daniel, Job cai llactapi causanman carca, cai quimsa runacunallami paicuna cashcata ruhuaccuna cashcamanta quishpirinman. Chaitaca Mandac Dios ñucami nini.

15Cai llactaman piña animalcunata cachashpa, llaquinayaita tucuchicpica, chai llacta chaupitaca pipish mana pasai pudinmanchu, cai llactaca shitashcami saquirinman.

16Mandac Dios ñuca shutipimi nini: Chai quimsa runacuna cai llacta chaupipi causacucpica, paicunapac churicunapish, ushicunapish mana quishpiri pudinmanchu. Ashtahuanpish paicunallami quishpirinman. Cai llactaca llaquinayaitami shitashca saquirinman.

17Jatun macanacuita cai llactapi callarichishpaca gentecunatapish, animalcunatapish tucuchimanmi.

18Mandac Dios ñuca shutipimi nini: Chai quimsa runacuna cai llacta chaupipi causacucpica, paicunapac churicunapish, ushicunapish mana quishpiri pudinmanchu, ashtahuanpish chai quimsa runacunallami quishpirinman.

19Mana cashpaca, ñuca yallita piñarishpa, jatun ungüita cai llactaman cachashpaca, gentecunatapish, animalcunatapish huañuchimanmi.

20Mandac Dios ñuca shutipimi nini: Noé, Daniel, Job chaipi cacpipish, shuc churillapish, shuc ushillapish mana quishpirinmanchu. Ashtahuanpish paicunallami cashcata ruhuac cashcamanta quishpirinman.

21Mandac Dios ñucaca: “Jerusalenpi causacuc gentecunata, animalcunata tucuchingapacca, jatun macanacuitapish, yarcaitapish, piña animalcunatapish, ungüicunatapishmi cachasha. Chai chuscu llaquicunahuanmi tucuchisha.

22Chai pueblopica asha churicuna, ushicunallami saquiringa. Shina cacpipish, paicunataca llucchishpami apanga. Paicuna cancunapacman shamucpimi, paicuna ima shina causashcatapish, imata ruhuashcatapish ricunguichic. Chaita ricushpami, Jerusalenpi causaccunata ñuca ima shina llaquichishcamanta cushicunguichic.

23Paicuna ima shina causashcata, imata ruhuashcata ricushpami cushicunguichic. Chaimantami chai pueblopi causaccunataca mana yangamanta llaquichishcata yachanguichic. Chaitaca Mandac Dios ñucami nini” ninmi» nirca.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help