2 SAMUEL 16 - Biblia Quichua Cañar 2010

Siba runa Davidhuan parlanacushcamanta

1David urcuta pasashpa, ashata chimbaman ricpimi, Mefi-bosetta servic Sibaca Davidhuan tuparca. Paica ishcai burrota parejashpami ishcai patsac tandata, patsac huayunga uvasta, patsac tortillata, shuc vino capachutapish apachishpa tuparca.

2Chashna tupacpimi, jatun mandac Davidca:

—¿Imapactac caita apamungui?— nishpa tapurca.

Shina tapucpi Sibaca:

—Cai burrocunaca can jatun mandacpac familia montangapacmi. Cutin tandapish, pasaspish canta serviccuna micuchunmi. Vinoca shitashca pambapi yacunayacpi ubiangapacmi— nirca.

3Shina nicpimi, jatun mandac Davidca:

—¿Cambac amopac churica maipitac?— nishpa tapurca.

Shina tapucpimi Sibaca jatun mandactaca:

—Paica: “Ñuca aillu mandanataca cunan punzhallatacmi israelcunaca ñucaman cunga” yuyashpami Jerusalenllapitac saquirca— nirca.

4Shina nicpimi, jatun mandacca Sibataca:

—¡Riqui, tucui Mefi-bosetpac cashcacunaca cambacmi canga!— nirca.

Shina nicpimi, Sibaca jatun mandacpac ñaupapi cumurishpa:

—Jatun mandac ñuca amitolla, ñucaca cambac ñaupapi alli ricurishpami alli caiman— nirca.

5David ña Bahurim llactata ricucpimi, Saulpac aillupuramanta Gerapac churi Simei llucshishpaca jatun mandac Davidtapish, paita serviccunatapish maldiciashpa,

6rumicunahuan shitarca. Shina cacpipish, jatun mandac Davidtaca alli ladotapish, lluqui ladotapish alli sinchi runacunami cuidashpa ricurca.

7Simei maldiciashpaca: «¡Huañuchic millai runa caimanta llucshi!

8Can Saulpac randi mandangapac paipac huasi ucupuracunata tucui huañuchishcamantami Mandac Diosca canta llaquichicun. Can mandanataca cambac churi Absalonmanmi cushca. Canca huañuchic cashpami llaquita apacungui» nirca.

9Chaimantami Sarviapac cari huahua Abisaica jatun mandactaca:

—¿Ima nishpatac cai huañushca allcu shinaca, ñuca jatun mandactaca maldicianyari? ¡Ñuca paipac cungata pitigrichun saqui!— nirca.

10Shina nicpimi, jatun mandacca:

—Sarviapac huahuacunalla, ¿Caicunataca ñucaca ima ricunatatac charini? Mandac Diosllatac: “Davidta maldiciai” nishca cacpica, ¿pitac paicunataca “mana allitami ruhuacungui” ninga?— nirca.

11Chai quipami Davidca Abisaitapish, paita serviccunatapish rimashpaca:

—Ñucamanta llucshishca churillatac huañuchisha nicucpica, ¡Benjaminpac aillupuramantacarin mashnatapish rimangallami! Mandac Diosmi chashna nichun nishca canga. Chaimanta mashnatapish maldiciachun saquilla.

12Mandac Diosca ñuca llaquihuan cacta ricushpaca llaquingapishchari. Shina llaquishpa, cunan cai runacuna maldiciashcamantaca, ashtahuanpish ñucamanca allicunatami cunga— nirca.

13Davidpish, paihuan cac runacunapish ñanta ricucpica, Simeica jana lado urcu quingraita maldiciashpa, rumicunahuan shitashpa, allpa polvota jatarichishpami ricurca.

14Davidpish, paihuan cac runacunapish Jordán yacuman shaicushca chayashpami, chaillapi samarirca.

Absalón Jerusalenman yaicushcamanta

15Shinallatac Absalonca tucui israelcunahuan, Ahitofelhuanmi Jerusalenman yaicurca.

16Davidpac alli ricsishca arquitapuramanta Husai Absalonhuan tupangapac llucshishpaca:

—¡Jatun mandaclla, causacunguimi! ¡Jatun mandaclla, causacunguimi!— nirca.

17Chaita uyashpami Absalonca:

—¿Chashnachu canhuan apanacuctaca ruhuangui? ¿Ima nishpatac paihuan mana rircangui?— nirca.

18Shina nicpimi Husaica:

—Paihuan rinataca mana pudinichu. Ñucaca Mandac Diospish, tucui israelcunapish acllashca jatun mandac-huanmi saquirina cani.

19¿Ñucaca pitatac servina cani? ¿Manachu paipac churillatac servina cani? Cambac taitata servishpa causashca shinallatacmi canta servishpa causasha— nirca.

20Chai quipami Absalonca Ahitofeltaca:

—Ñucanchicman imata ruhuanata yuyaita cuiyari— nirca.

21Shina nicpimi, Ahitofelca Absalontaca:

—Cambac taita mandana huasita cuidachun saquishca paipac caishuc huarmicunapi chayari. Chashna ruhuacpimi, tucui israelcunaca cambac taitapac piñana tucushcata yachashpa, canhuan cac gentecunaca ashtahuan sinchiyanga— nirca.

22Chashna nishpami, Absalonmanca mandashpa tiyana huasi jahuapi shuc uchilla carpa huasita shayachirca. Chaipimi Absalonca tucui israelcuna ricucucpi, paipac taita Davidpac caishuc huarmicunapi chayarirca.

23Cai punzhacunapica Ahitofel yuyaita cushcataca Dios rimashpa yuyaita cushcata shinami yuyac carca. Chashnallatacmi Davidpish, Absalonpish yuyac carca.