DEUTERONOMIO 11 - Biblia Quichua Cañar 2010

Mandac Dios tucuita ruhuac cashcamanta

1Cancuna Mandac Diosta cuyanguichic. Pai mandashcacunata, pactachinacunata, yachachishcacunata punzhanta cazunguichic.

2Mandac Dios cancunata ima shina llaquichishcata yuyarichic. Chaitaca cancunapac huahuacunaca mana yachanchu, mana ricushcachu. Paicunaca Mandac Dios llaquishcatapish, pai poderta charishcatapish, paipac poderhuan llucchishcatapish mana yachanchu.

3Egipto llactata jatun mandacta, chaipi causaccunata llaquichishcatapish, jatun mancharinacunata ruhuashcatapish,

4Egipto gentecuna ñucanchicta caticucpi, Puca Cuchapi carretacunandi, caballocunandi cunancaman ucuyachishcatapish, mana yachanchu.

5Shinallatac cancunata shitashca pambapi caiman chayamungacaman imata ruhuashcatapish,

6Rubenpac aillupura Eliabpac churi Datantapish, Abiratapish imata ruhuashcataca mana yachanchu. Paicunataca familiandi, carpacunandi, paicuna charishcacunandimi israelcunapac chaupipi allpa pascarishpa millpuc shina tucuchirca.

7Ashtahuanpish cancunami Mandac Dios tucui ima ruhuashcataca quiquin ñahuihuan ricurcanguichic.

Cusha nishca llactapi allicunata cunamanta

8Cancunaman cunan ñuca huillashca tucui mandashcacunata pactachinguichic. Chashna pactachishpami alli sinchiyashpa llactaman yaicushpa, chaipi causaccunata llucchishpa cachashpa chai allpata japinguichic.

9Mandac Dios cancunapac taitacunamanpish, quipa huiñaicunamanpish cushami nishca lechepish, mishquipish callpacuc llactapi unaita causangapacca tucui mandashcacunatami pactachina canguichic.

10Cancuna japigricushca llactaca mana cancuna llucshimushca Egipto llacta shinachu. Chaipi tarpushpaca shuc huertata parcuc shinami chaquihuan aisashpa parcuc carcanguichic.

11Cancuna japingapac yaicugricuc llactaca urcucunapish, pambacunapish jahua cielomanta tamyahuan pucuna allpacunami.

12Chai llactataca Mandac Diosmi cuidacun. Mandac Diosca huata callarimanta, huata tucuringacamanmi cuidacunlla.

13Cunan ñuca yachachishca cazushpa, Mandac Diosta tucui shunguhuan, tucui almahuan servishpa, paita cuyacpica,

14punta tamyatapish, quipa tamyatapish cachangami. Chaimantami granotapish, vinotapish, aceitetapish japinguichic.

15Quihuapish cancunapac animalcunaman tiyangami. Cancunaca huicsa pactatami micunguichic.

16Shungupi pandarishpa, Diosta catinata saquishpa, shuctac dioscunapac ñaupapi ama cunguringuichicchu.

17Chashna mana allita ruhuacpica, Mandac Dios nina japiric shina piñarishpami, pai cusha nishca sumac llactapica jahua cielota huichcac shina mana tamyachinga. Allpacunapish mana pucucpica, utcami tucuringuichic.

18Ñuca yachachishcacunata cancunapac shungupi, cancunapac yuyaipi churaichic. Cai mandashcacunataca cancunapac maquipi, frentepi tucuipac ricuna cachun, huatashca shina apaichic.

19Caicunataca huasipipish, ñanta purishpapish, samarishpapish, jatarishpapish cancunapac churicunaman yachachinguichic.

20Huasi pilarcunapipish, llacta yaicuna pungucunapipish quillcanguichic.

21Mandac Dios cancunapac taitacunaman cushami nishca llactapica cancunapish, cancunapac huahuacunapish ima shinami jahua pacha, cai pacha huiñaita can, chashnami cancunapish huiñaita causanguichic.

22Mandac Diosta cuyashpa, ñuca yachachishca mandashcacunata pactachishpa, Mandac Diosllata catinguichic.

23Chashna pactachicpica, Mandac Diosca chai llactapi causaccunata cancunapac ñaupamanta catishpa cachangami. Cancunata yalli achca, shinallatac sinchi gentecunatami llucchishpa cachashpa, chaipi causai callaringuichic.

24Maipimi cancuna sarunguichic, chai llactaca cancunapacmi canga. Cancunapac llactaca shitashca pambamanta Libanocaman, Eufrates yacumantaca inti llucshina lado cuchacamanmi canga.

25Cancunahuanca pipish mana cariyangachu. Mandac Diosca, pai ruhuasha nishca shinami, tucui cai pachapi manchaita chucchuita churanga.

26Riquichic, cunanmi bendiciontapish, maldiciontapish cancunapac ñaupapi churani.

27Chaica, cunan ñuca huillashca Mandac Dios mandashcacunata cazushpaca bendiciashcami canguichic.

28Ashtahuanpish ñuca mandashcata mana uyashpa, Mandac Diosta mana cazushpa, mana ricsishca shuctac dioscunata catishpaca, maldiciashcami canguichic.

29Cancuna causana llactata Mandac Dios cucpimi, Gerizim urcupi bendiciontaca ricuchinguichic. Cutin maldiciontaca Ebal urcupimi ricuchinguichic.

30Chai urcucunaca Jordán yacumanta chimbaman, inti tigrana lado Arabá pambapi causac cananeocunapac llactapimi. Canaán llactaca encina yuracuna tiyac Moré pamba ladollapi cac Gilgal ladopimi.

31Mandac Dios cushca llactata japingapacmi Jordán yacuta pasagringuichic. Chai llactata japishpami, chaipi causanguichic.

32Chaipica cunan cancunaman yachachishca mandashcacunatapish, pactachinacunatapish tucuita cazushpa causanguichic.