DANIEL 8 - Biblia Quichua Cañar 2010

Cari ovejatapish, cari chivotapish Daniel muscushcamanta

1Jatun mandac Belsasar quimsa huatata mandacucpimi, Daniel ñucaca utcapi ricushca shinata cutin muscuipi shina ricurcani.

2Chaitaca Elam llactapi tiyac jatun llacta Susapi cashpami ricurcani. Shinallatac Ulai yacu ladopi cashpami, chashna muscuipi shina ricurcani.

3Ñuca alzarishpa ricushpaca, chai yacu ladopi ishcai gachuyuc shuc cari ovejatami ricurcani. Chai gachucuna mai jatun cashpapish, shuc gachumi ashtahuan jatun carca. Chai ashtahuan jatun gachuca quipata huiñashcami carca.

4Chai cari ovejaca inti tigrana ladoman, jahua ladoman, ura ladoman causaccunatami gachucunahuan llaquichicurca. Chai cari ovejahuanca ima animalpish mana chimbapurai pudircachu. Chai animalpac fuerzamantaca imapish mana quishpiri pudircachu. Pai munashcata ruhuashpami, punzhanta jatunyashpa caticurca.

5Chaita ricushpa yuyaricushpallatacmi inti llucshina ladomanta shuc cari chivo pambapi mana sarushpa shamucucta ricurcani. Chai chivoca ishcai ñahuiyuc, cutin chai ñahuicuna chaupipica shuc jatun gachutami charirca.

6Chai chivoca ñuca ricushca yacu ladopi shayacuc ishcai gachuyuc cari ovejapacmanmi yallita piñarishpa, tucui fuerzahuan llaquichingapac rirca.

7Chai cari ovejapac cuchuman chayashpami, yallita piñarishpa llaquichirca. Chashna paipac gachuhuan tacashpami, chai cari ovejapac ishcai gachucunata paquirca. Chaimantami chai cari ovejaca shayaringapacllapish mana fuerzata charirca. Shina cacpimi, pambaman urmachishpa sarunacurca. Chashna chai cari chivo llaquichicucpica, chai cari ovejataca pipish mana misarcachu.

8Shinami chai cari chivoca yallita sinchiyashpa, jatun tucushpa catirca. Chashna yallita sinchiyashpa, jatunyacucpimi, chai jatun gachuca paquirirca. Chashna paquiricpica, chai gachupac randica chuscu jatun gachumi cai pacha chuscu ladoman huiñarca.

9Chai gachucunapuramanta shuc gachupica shuc huahua gachumi ura ladomanpish, inti llucshina ladomanpish, sumaimana allpa ladomanpish huiñarca.

10Jahua pachacaman huiñashpami, chaipi ima tiyaccunatapish, lucerocunatapish, pambaman urmachishpa sarunacurca.

11Chashna ruhuashpami, jahua pachapi tiyaccunata mandac-huanpish piñarishpa shayarirca. Chashnami punzhanta Diosman cushpa rupachinatapish anchuchishpa Diospaclla huasitapish urmachirca.

12Gentecuna Diosta mana cazushcamantami jahua pachapi imalla tiyaccunatapish, punzhanta Diosman cushpa rupachinatapish paipac maquipi churarca. Chashna churacpimi, cashcata ninatapish chingachishpa, pai munashcata ruhuashpa, maipipipish alli nishca carca.

13Chashna ruhuacpimi, shuc jucha illac ángel caishuc angelcunaman tapucucta uyarcani. Chashna tapushpaca: “Punzhanta Diosman cushpa rupachinata muscuc shina ricunaca, ¿ima horascamantac canga? Shinallatac ¿ima punzhacamantac mana cazunapish, Diospac huasitapish, jahua pachapi ima tiyaccunatapish sarucucta muscuipi ricuc shina ricuna canga?” nirca.

14Chashna tapucpimi caishuc angelcunaca: “Ishcai huaranga quimsa patsac chishicunata, tutamantacunatami chashna canga” nirca.

15Daniel ñuca tucui chaicunata muscuipi shina ricushcata entendinata yuyacucpimi, ñucapac ñaupapi shuc runalaya shayacuc ñapish ricurirca.

16Chai quipaca Ulai yacu chaupipi shuc runa caparishpaca: “¡Gabriel chai muscuipi shina ricurishca imata nisha nicushcata huillai!” nirca.

17Shina nishca quipami ñuca shayacuc cuchuman shamurca. Chaimantami ñucaca yallita mancharishpa cumurishpa urai urmarcani. Shina urmacpica paica: “Can muscuipi shina ricushcaca tucurina punzhacunatami ricuchicun. Chaimanta huañunalla runa allita entendiyari” nirca.

18Pai ñucahuan parlacucllapitacmi pambapi urai urmashpa sueñushpa saquirishcarcani. Shina cacpimi, pai tuparishpa,

19riccharishpaca: “Tucuri punzhaca chai nishca punzhapimi canga. Chaimanta Dios piñarishpa llaquichinatami huillagrini.

20Can ricushca gachuyuc cari ovejaca Media, Persia llactacunata jatun mandaccunatami nisha nin.

21Cari chivoca Grecia llactata jatun mandactami nisha nin. Ñahuicunapi jatun gachuca chai llactata punta jatun mandactami nisha nin.

22Shuc gachu paquiricpi, chaipac randi chuscu gachucuna huiñashcaca chai llactamanta chuscu jatun mandaccuna llucshinatami nisha nin. Chai jatun mandaccunaca mana punta mandac shina poderta charingachu.

23Chai chuscu mandaccuna

tucuricpica, Diosta mana cazuccunami

yalli mana allita ruhuanga.

Chai punzhacunami fierro shina

mandac, shinallatac mana yachashcata

entendic jatun mandac llucshinga.

24Paica yallita sinchi cashpapish

mana paipac poderhuanchu

chashna sinchi canga.

Paica mai llaquicunata

ruhuashpapish, maipipipish

alli nishca canga.

Quiquin munashcata ruhuashpami,

yallita sinchicunatapish,

Diospaclla caccunatapish tucuchinga.

25Yallita yuyaisapa cashpami,

pitapish jahualla urmachishpa,

shungupi jatun tucunga.

Cungaillami achcata tucuchinga.

Mandaccunata mandaccunahuanmi

macanacungapac shayaringa.

Gentecunapac maquipi mana

huañushpapish huañungallatacmi.

26Chishicunapi, tutamantacunapi

can muscuipi shina ricushcaca

chashnatacmi canga.

Chaicunaca tauca huatacuna

quipami pactanga,

chaimanta cambac shungupi

huacaichi” nirca.

27Daniel ñucaca yallita irquiyashpami, maijan punzhacunata ungushca carcani. Ña alliyashpaca jatun mandacpac ima ruhuaicunatami ruhuashpa catircani. Ñuca muscuipi shina ricurishcata yuyarishpa manchaihuanmi carcani, pi chaimanta huillacca mana tiyarcachu.